Ku Laveka—Tidyondzo Ta Bibele Leti Engetelekeke

¹ Yehovha Xikwembu u katekisa nhlengeletano yakwe ya la misaveni hi ku andza loku yaka emahlweni. Eka lembe ra ntirho ra n’wexemu, ku khuvuriwe vanhu vo ringana 375 923 emisaveni hinkwayo—hi avhareji i vadyondzisiwa lavantshwa vo ringana 1000 hi siku, kumbe kwalomu ka 43 hi awara! Hambiloko vamakwerhu va vone maxangu hi makume ya malembe eswiphen’wini swo hambana-hambana swa misava, ntirho wa Mfumo wu ya emahlweni naswona ku ni ku andza loku hlamarisaka. Mayana ku hlaya hi ku andza loku nga kona eku twariseni ka mahungu lamanene!

² Laha Afrika Dzonga eka lembe ra ntirho leri hundzeke, na hina hi vone ku andza ka avhareji ya vahuweleri ni maphayona ya nkarhinyana, tiawara leti hetiweke entirhweni wo chumayela, nhlayo ya swibukwana, tibroxara ni timagazini leti fambisiweke. Ku ve ni ku andza ka nhlayo ya lava khuvuriweke ni nhlohlorhi ya lava veke kona eXitsundzuxweni. Ku vuriwa yini hi maendzo yo vuyela ni ntirho wa ku fambisa tidyondzo ta Bibele? Hi tsakisiwe hi ku vona ku andza kutsongo loku veke kona. Hambiswiritano, tindlela leti ta vutirheli i ta nkoka eku endleni ka vadyondzisiwa. Xana un’wana ni un’wana wa hina a nga endla yini leswaku hi antswisa maendzo yo vuyela ni tidyondzo ta hina ta Bibele?

³ Navela Ku Fambisa Dyondzo: Hina hi hexe hi fanele hi tikarhatela ku tiya ni ku tshama hi hanyile emoyeni. Valandzeri va ntiyiso va Kreste i vanhu lava “hisekelaka mintirho leyinene.” (Tito 2:14) Loko hi kambisisa vutirheli bya hina, xana hi nga vula leswaku hi tikarhatela ku tlhelela eka vanhu hinkwavo lava hi va fambiseleke tibuku ensin’wini? Xana hi lwela ku fambisa dyondzo ya le kaya ya Bibele eka hinkwavo lava kombisaka ku tsakela? (Rhom. 12:11) Kumbe, xana hi ni xilaveko xo engetela ku hisekela ku endla maendzo yo vuyela ni ku sungula tidyondzo ta le kaya ta Bibele?

⁴ Ku hlaya ka Bibele ka munhu hi xiyexe, ku ya eminhlanganweni nkarhi na nkarhi ni ku dyondza tibuku tin’wana swi ta hi pfuna ku tshama hi hanyile emoyeni naswona hi ta nyikiwa matimba hi moya wa Xikwembu. (Ef. 3:16-19) Leswi swi ta tiyisa ripfumelo ra hina ni ku tshemba ka hina Yehovha ni ku rhandza ka hina vanhu-kulorhi. Hi ta susumeteriwa ku dyondzisa munhu un’wana ntiyiso, hi ndlela yoleyo hi endla vutirheli bya hina byi va lebyi tsakisaka, lebyi humelelaka ni ku phyuphyisa. Ina, hi fanele hi lava tidyondzo ta Bibele leti engetelekeke!

⁵ Rhanga U Dyondza Ni Ndyangu Wa Wena: Vatswari va Vakreste lava vana va vona va tshamaka na vona ekaya va fanele va tikarhatela ku fambisa dyondzo ya ndyangu ya Bibele nkarhi na nkarhi. (Det. 31:12; Ps. 148:12, 13; Swiv. 22:6) Swi ta va vuyerisa ngopfu vatswari loko va dyondza broxara leyi nge Leswi Xi Swi Languteleke ni vana va vona ivi va hundzela ebukwini leyi nge Vutivi leswaku va va lunghiselela ku fanelekela ku va vahuweleri lava nga khuvuriwangiki ni ku tinyiketela ni nkhuvulo. Kavula, rungula leri engetelekeke ri nga ha kambisisiwa hi ku ya hi xilaveko ni malembe ya n’wana. Mutswari la dyondzaka ni n’wana la nga siki khuvuriwaka a nga ha vika dyondzo, nkarhi ni maendzo yo vuyela, hilaha swi hlamuseriweke hakona eka Bokisi Ra Swivutiso eka Vutirheli Bya Hina Bya Mfumo bya June 1987.

⁶ Antswisa Ku Hleleka Ka Wena N’wini: Loko u languta nhlayo ya timagazini, tibroxara ni tibuku leti fambisiweke, a swi kanakanisi leswaku ku ni mbewu yo tala leyi haxiweke. Timbewu leti ta ntiyiso leti byariweke ti kombisa leswaku ku ni vanhu vo tala lava nga ha vaka vadyondzisiwa lavantshwa. Kambe xana n’wamapurasi kumbe murimi wa ntanga a nga eneriseka hakunene loko a hambeta a byala, naswona endzhaku ka matshalatshala yakwe lamakulu, a nga wu kumi nkarhi wo tshovela? Nikatsongo. Hilaha ku fanaka, ku tlhelela eka lava tsakelaka loko hi ri evutirhelini i swa nkoka.

⁷ Xana u tivekela nkarhi wo endla maendzo yo vuyela nkarhi na nkarhi? Tlhelela hi ku hatlisa eka hinkwavo lava kombiseke ku tsakela. Endla maendzo yo vuyela hi xikongomelo xo sungula dyondzo ya Bibele. Xana u tshama u ri ni tirhekhodo ta maendzo yo vuyela leti langutekaka, leti nga enkarhini ni leti hlelekeke? Loko u tsala vito ni adirese ya n’wini wa muti, tiyiseka leswaku u tsala siku ra riendzo ro sungula, leswi u n’wi fambiseleke swona, nhlamuselo yo koma ya leswi mi vulavuleke ha swona, ni yinhla leyi mi nga ta burisana ha yona eka riendzo leri landzelaka. Siya ndhawu eka xiphephana xa wena xa rhekhodo laha u nga ta tsala rungula leri engetelekeke eka riendzo rin’wana ni rin’wana ro vuyela.

⁸ Kambisisa Ndlela Yo Endla Riendzo Ro Vuyela: Hi tihi tinhla leti u faneleke u ti tsundzuka loko u endla riendzo ro vuyela eka munhu la tsakelaka? (1) Kombisa rirhandzu, xinghana, ku hiseka ni ku vulavula hi ku ntshunxeka. (2) Burisanani hi tinhloko-mhaka kumbe swivutiso leswi n’wi tsakisaka. (3) Bulo ra n’wina a ri ve leri twisisekaka naswona ri ri ra Matsalwa. (4) Eka riendzo rin’wana ni rin’wana ro vuyela, tikarhatele ku dyondzisa n’wini wa muti leswi a nga ta swi vona swi khumba yena hi byakwe. (5) Endla leswaku a langutela hi mahlo-ngati dyondzo ya riendzo leri landzelaka. (6) U nga tshami nkarhi wo leha. (7) U nga vutisi swivutiso leswi nga endlaka n’wini wa muti a sungula ku kanakana kumbe swi n’wi phasa. (8) Tirhisa vutlhari leswaku u nga soli malangutelo lama hoxeke kumbe mikhuva yo biha ya n’wini wa muti loko a nga si kombisa ku tlangela swilo swa moya.—Vona xiengetelo xa Vutirheli Bya Hina Bya Mfumo bya March 1997 leswaku u kuma mpfuno lowu engetelekeke malunghana ni ndlela yo endla maendzo yo vuyela ni ku sungula tidyondzo ta Bibele hilaha ku humelelaka.

⁹ Tirhisa Tindlela Hinkwato: Evandlheni rin’wana, a swi koteka ku kuma mavito ni tinomboro ta tindlu ta vanhu lava tshamaka etindlwini leti rindziwaka swinene. Ku tsaleriwe muaki un’wana ni un’wana papila, ivi ku nghenisiwa ni swiphephana swimbirhi. Emakumu ka papila, ku hlamuseriwe hi ta dyondzo ya Bibele ya le kaya ni nomboro ya riqingho leswaku munhu la tsaleriweke a ta hlamula. Endzhaku ka masiku ma nga ri mangani, jaha rin’wana ri be riqingho ri kombela dyondzo. Hi siku leri tlhandlameke ku endliwe riendzo ro vuyela, naswona ku sunguriwe dyondzo hi ku tirhisa buku leyi nge Vutivi. Madyambu wolawo u ye eka Dyondzo ya Buku ya Vandlha, naswona u hambete a ya eminhlanganweni hinkwayo. Hi ku hatlisa, u sungule ku hlaya Bibele siku na siku naswona u endle nhluvuko lowu yisaka enkhuvulweni.

¹⁰ Vahuweleri lava a va famba hi movha wun’we va endle malunghiselelo yo endla maendzo yo vuyela swin’we. Loko makwerhu wa xisati a tlhelela eka un’wana wa lava a fanele a va endzela, a nga n’wi kumanga ekaya, kambe wanhwana un’wana u pfule rivanti, a ku: “A ndzi yimele wena.” N’wini wa muti a a kume buku leyi nge Vutivi eka munhu un’wana la tolovelaneke na yena. Hi nkarhi lowu vamakwerhu va xisati va yeke ekaya rakwe, a a hlaye buku leyi kambirhi naswona u tsakisiwe ngopfu hi rungula leri yi nga na rona. U vule leswaku a swi n’wi hlamarisanga ku vona Timbhoni ti fika ekaya rakwe siku rero hikuva a a ri karhi a khongelela ku ta ka vona ni leswaku va dyondza na yena Bibele. Dyondzo yi sunguriwile, u sungule ku va kona eminhlanganweni ya vandlha, naswona u endle nhluvuko hi xihatla.

¹¹ Makwerhu un’wana wa xisati, la khuvuriweke kwalomu ka malembe ya 25 lama hundzeke, wa ha ku nyika mana wakwe buku leyi nge Vutivi. Mana wakwe, loyi a a ri xirho xa kereke, u sungule ku hlaya buku leyi. Endzhaku ka loko a hete ku hlaya tindzima timbirhi, u vitane n’wana wakwe, naswona lexi hlamariseke n’wana wakwe, u te: “Ndzi lava ku va un’wana wa Timbhoni ta Yehovha!” Mana wakwe u sungule ku dyondza naswona sweswi u khuvuriwile.

¹² Ringeta Swiringanyeto Leswi: Xana u tshama u ringeta xingheniso lexi kongomeke leswaku u sungula tidyondzo? U nga ha vula u ku: “Loko u tsakela dyondzo ya mahala ya le kaya ya Bibele, ndzi nga ku kombisa ndlela leyi yi endliwaka ha yona hi timinete ti nga ri tingani ntsena. Loko u yi tsakela, u nga ya emahlweni.” Vanhu vo tala a va kanakani ku amukela nyiko yo tano naswona va lunghekele ku vona ndlela leyi dyondzo ya Bibele yi endliwaka ha yona.

¹³ Loko dyondzo ya ha sungula, kombisa xichudeni ndlela yo lunghiselela ka ha ri emahlweni hi ku hlaya matsalwa lama kombisiweke ni ku khwatihata marito-nkulu loko xi hlamula swivutiso leswi tsariweke. Nyikela nyingiso eka tinhla-nkulu ntsena. Hambiloko hi ta fanela ku olovisa eka tidyondzo ti nga ri tingani leto sungula, i swa nkoka leswaku dyondzo ya Bibele yi khomiwa nkarhi na nkarhi. Tsundzuka ndlela leyi u nga ta hlamusela nkoka wa ku sungula hi xikhongelo tanihi xiphemu xa nkoka dyondzo, ni ndlela leyi u nga ta lunghiselela xichudeni hi ku ya hi Matsalwa leswaku xi langutana ni nkaneto. Tikarhatele ku endla dyondzo yi tsakisa!

¹⁴ Kavula, a hi hinkwaswo swichudeni swa Bibele leswi endlaka nhluvuko wo fana. Swin’wana a swi ti rhandzi timhaka ta moya ku fana ni swin’wana kumbe ku hatlisa swi twisisa leswi swi dyondzisiwaka swona. Swin’wana swi taleriwe hi mintirho naswona swi nga ha tsandzeka ku heta nkarhi lowu lavekaka wa ku dyondza ndzima hinkwayo vhiki rin’wana ni rin’wana. Xisweswo, etimhakeni tin’wana swi nga ha fanela leswaku mi dyondza ndzima yin’we ko tala leswaku mi hlanganisa tindzima to karhi naswona mi tlulela ni le ka tin’hweti tin’wana leswaku mi heta buku. Minkarhi yin’wana hi nga sungula hi ku dyondza broxara leyi nge Leswi Xi Swi Languteleke ivi hi hundzela ebukwini leyi nge Vutivi. Leswi, loko swi engeteriwa hi vukona bya vona eminhlanganweni ya vandlha, swi ta pfuna xichudeni xin’wana ni xin’wana leswaku xi dzima timitsu entiyisweni.

¹⁵ Ku tlula hinkwaswo, khongelela ku kuma dyondzo ya Bibele! (1 Yoh. 3:22) Yin’wana ya mintokoto leyi vuyerisaka swinene eka Mukreste i ku tirhisiwa hi Yehovha leswaku u pfuna munhu un’wana a va mudyondzisiwa wa Yesu Kreste. (Mint. 20:35; 1 Kor. 3:6-9; 1 Tes. 2:8) Lowu i nkarhi wa ku kombisa ku hiseka swinene entirhweni wo fambisa dyondzo ya Bibele, hi ri karhi hi tiyiseka hakunene leswaku Yehovha u ta ma katekisa swinene matshalatshala ya hina yo sungula tidyondzo ta Bibele leti engetelekeke!

[Blurb on page 3]

Xana u khongelela ku sungula dyondzo ya Bibele leyintshwa?