Ku Lunghiselela Swi Hi Pfuna Ku Endla Maendzo Yo Vuyela Lama Nga Ta Hetelela Ma Ri Tidyondzo Ta Bibele
1. I yini leswi Vakreste vo sungula a va fanele va swi endla leswaku va ndlandlamuxa ntirho wo chumayela?
1 Yesu u va lunghiselele kahle vadyondzisiwa vakwe leswaku va va vadyondzisiwa lavanene va “mahungu lamanene ya mfumo.” (Mat. 4:23; 9:35) U va leterile loko a ri karhi a chumayela ePalestina. Kambe loko a nga si tlhandlukela etilweni, u swi veke erivaleni leswaku ntirho wo chumayela wu fanele wu ndlandlamuxiwa leswaku ‘vanhu va matiko hinkwawo va endliwa vadyondzisiwa.’—Mat. 28:19, 20.
2. Ku yingisa xileriso xa Yesu xa ku ‘endla vadyondzisiwa’ swi katsa yini?
2 Ntirho wolowo a wu ta katsa ku endla maendzo yo vuyela eka vanhu lava kombiseke ku tsakela mahungu lamanene ya Mfumo wa Xikwembu ni ku va dyondzisa ku hlayisa swilo hinkwaswo leswi Kreste a va leriseke swona. Hikokwalaho, leswaku maendzo yo vuyela ma va ni mihandzu hi fanele hi lunghiselela.
3. Eka riendzo ro sungula, xana u nga ma andlala njhani masungulo ya riendzo ro vuyela?
3 Lunghiselela Ka Ha Ri Emahlweni: Vahuweleri van’wana loko va heta bulo ra vona va vutisa n’wini wa muti xivutiso kutani va tshembisa leswaku va ta tlhela va vuya va ta bula hi nhlamulo ya xona. Va kume leswaku ku tirhisa buku leyi nge Leswi Bibele Yi Swi Dyondzisaka loko va endla riendzo ro vuyela swi va pfune ku namba va sungula dyondzo ya Bibele.
4. Ha yini hi nga fanelanga hi yimela ku kuma timagazini letintshwa ku ri kona hi nga ta endla maendzo yo vuyela?
4 Leswi ku humaka timagazini to karhi ntsena hi n’hweti a swi vuli leswaku hi fanele hi yimela ku kuma ta n’hweti leyi landzelaka ku ri kona hi nga ta tlhelela eka lava hi buleke na vona. U nga ha bula ni munhu hi rungula leri nga eka magazini lowu ana se a nga na wona leswaku u n’wi endla a tsakela.
5. Hi byihi vuyelo bya ku tivekela pakani loko u endla riendzo ro vuyela?
5 Vana Ni Xikongomelo: U nga si endla riendzo ro vuyela, rhanga u kambisisa phepha leri u tsaleke vanhu lava u faneleke u tlhelela eka vona, kutani u ehleketisisa hi leswi u lavaka ku swi fikelela. Hi xikombiso, bula hi yinhla leyi nga enkandziyisweni lowu u va siyeleke wona. Kumbe u va siyela nkandziyiso wun’wana lowu vulavulaka hi leswi mi buleke ha swona enkarhini lowu hundzeke. Loko ku ri leswaku u suke u va vutise xivutiso xo karhi, a swi kanakanisi leswaku mi ta bula ha xona. Loko u hlamusela tsalwa leri vulavulaka hi yinhla yo karhi, ri hlaye hi ku kongoma eBibeleni.
6. Hi yihi pakani leyi hi lavaka ku yi fikelela loko hi endla maendzo yo vuyela?
6 Pakani Ya Hina: Pakani ya hina i ku sungula tidyondzo ta Bibele. Makwerhu un’wana loko a tlhelela eka wanuna un’wana u kombele ku n’wi fambisela dyondzo ya Bibele, hiloko a yi ala. Makwerhu loyi u tlhele a n’wi yisela timagazini leti a ta ha ku huma kutani a ku, “Namuntlha hi hlamula vanhu xivutiso xin’we xa le Bibeleni.” Endzhaku ka loko makwerhu a yingisele leswi wanuna yoloye a swi vulaka, u n’wi hlayele tsalwa a tlhela a n’wi komba ndzimana leyi fambisanaka na rona leyi nga enkandziyisweni lowu tirhisiwaka ku fambisa tidyondzo ta Bibele. Kavaloko dyondzo ya Bibele yi sungurile.
7. Xana ku lunghiselela kahle swi ku pfune njhani leswaku u sungula dyondzo ya Bibele?
7 Ku tinyika nkarhi wo lunghiselela maendzo yo vuyela swa pfuna. Ntsako wa hina wu ta va wukulu, naswona hi nga ha va ni lunghelo ro pfuna ‘lava nga ni mboyamelo lowunene’ eka gondzo leri yisaka evuton’wini lebyi nga heriki.—Mint. 13:48.