Pfuna Lava Nga Ni “Mboyamelo Lowunene”
1. I vamani lava Yehovha a tihlengeletelaka vona esikwini ra hina?
1 Munhu un’wana ni un’wana u ni mboyamelo lowu lawuriwaka hi mbilu ya yena yo fanekisela. (Mat. 12:35) Bibele yi vulavula hi munhu loyi “mbilu yakwe yi voyamele[ke] eku lweni.” (Ps. 55:21) Van’wana va ‘voyamele evukarhini.’ (Swiv. 29:22) Nakambe ku ni lava nga ni “mboyamelo lowunene eka vutomi lebyi nga heriki.” (Mint. 13:48) Esikwini ra hina, Yehovha u tihlengeletela vanhu vo tano lava nga ni mboyamelo lowunene. (Hag. 2:7) Xana hi nga va pfuna njhani leswaku va va vagandzeri va Yehovha?
2. I yini lexi katsekaka eku hetisiseni ka ntirho wa hina wo endla vadyondzisiwa?
2 Endla Maendzo Yo Vuyela Hi Vukheta: Ku va ni vonelo lerinene malunghana ni ntirho wo endla maendzo yo vuyela swi nga hi pfuna leswaku hi kota ku hetisisa ntirho wa hina wo endla vadyondzisiwa. (Mat. 28:19, 20) Xana hi hatla hi tlhelela eka vanhu lava va kombiseke ku tsakela? Xana ha tlhelela eka vanhu hinkwavo lava amukeleke tibuku kumbe lava kombiseke ku tsakela mahungu lamanene? Xana ha phikelela eku va pfuneni leswaku va kula hi tlhelo ra moya? Tanihi leswi vutomi byi katsekaka, hi fanele hi tlhelela eka vanhu lava va kombiseke ku tsakela.
3. Xana hi fanele hi endla yini endzhaku ka loko hi bule ni munhu wo karhi ensin’wini?
3 Loko wa ha ku heta ku vulavula ni munhu la tsakelaka, tsala vito ni adirese ya yena. Tsala mhaka leyi mi vulavuleke ha yona, tsalwa rin’wana ni rin’wana leri mi ri hlayeke swin’we ni vito ra nkandziyiso lowu u n’wi fambiseleke wona. Endzhaku ka sweswo, tiyiseka leswaku wa tlhelela hi ku hatlisa.
4. Xana hi nga ma endla njhani maendzo yo vuyela lama humelelaka?
4 Ndlela Yo Endla Maendzo Yo Vuyela: Loko u endla maendzo yo vuyela, i swinene ku va ni xinghana ni ku kombisa n’wini wa muti leswaku wa n’wi tsakela. Loko u vulavula u nga vulavuli hi swilo swo tika naswona tirhisa Matsalwa. Lunghiselela mhaka leyi tsakisaka, leyi sekeriweke eBibeleni, leswaku mi ta bula ha yona naswona loko u gimeta bulo, vutisa xivutiso lexi u nga ta xi hlamula eka riendzo leri landzelaka. I swinene ku papalata ku dodombisana ni mavonelo ya n’wini wa muti, lama nga sekeriwangiki ematsalweni. Ringeta ku vulavula hi swilo leswi hinkwenu mi pfumelelanaka ha swona.—Kol. 4:6.
5. I matshalatshala wahi lawa phayona rin’wana ri ma endleke, naswona vuyelo byi ve byihi?
5 Ku endla maendzo yo vuyela swi lava matshalatshala, kambe vuyelo bya kona bya tsakisa. Phayona ra le Japani ri tivekele pakani yo endla maendzo yo vuyela lama engetelekeke n’hweti yin’wana ni yin’wana. Ri sungule hi ku tsala mavito ya vanhu hinkwavo lava ri hlanganeke na vona entirhweni wa yindlu na yindlu, kutani ri tlhelela ku nga si hela vhiki. A ri lunghiselela kahle leswi ri nga ta swi vula naswona loko ri ya ensin’wini a ri ya ri ri ni xivindzi hikuva a ri swi tiva kahle leswi ri nga ta fika ri vula swona. Eka un’wana wa vanhu lava ri va endzeleke, ri sungule dyondzo ni munhu loyi a vuleke leswi: “A ndzi nga pfumeli ku endzeriwa hi vanhu vo fana na n’wina. I ro sungula ndzi tshama ehansi ndzi yingisela.” Phayona leri ri kume vuyelo lebyinene hikwalaho ko lehisa mbilu. Loko n’hweti yi hela se a ri ri ni tidyondzo ta Bibele ta khume.
6. Ha yini hi fanele hi phikelela hi endla maendzo yo vuyela?
6 Swiyimo swa vanhu swi tshama swi ri karhi swi cinca. (1 Kor. 7:31) Hakanyingi swi lava leswaku munhu a tlhelela ko tala leswaku a kuma munhu loyi a tsakelaka. Loko hi endla maendzo yo vuyela hi vukheta, hi nga swi kota ku pfuna lava nga ni mboyamelo lowunene leswaku va kuma gondzo leri yisaka evuton’wini lebyi nga heriki.—Mat. 7:13, 14.