U Ta Ku Yini Loko U Tlhelela?
1 Leswaku hi humelela evutirhelini bya hina swi lava ku lunghiselela leswaku loko hi tlhela hi endzela lava va kombiseke ku tsakela eku sunguleni, hi swi kota ku pfuxeta ku tsakela ka vona ivi hi yisa bulo ra hina emahlweni. Xana hi nga swi endlisa ku yini leswi?
2 Tanihi leswi Vakriste va ntiyiso va tsakelaka van’wana hi xiviri, u nga ha sungula u languta xo karhi lexi u xi dyondzeke eka n’wini wa muti eka riendzo leri hundzeke.
Eka munhu loyi a kombiseke ku khumbeka ka yena hi vugevenga, u nga ha ku:
◼ “Nkarhi lowu hundzeke loko hi vulavurisana u vule leswaku u karhatiwa hi ku andza ka vuhomboloki loku nga kona. Xana u anakanya leswaku ku va ni maphorisa yo tala swi nga tlhantlha xiphiqo lexi?”
Loko munhu a phofule leswaku u xanisiwa hi swiendlakalo swa sweswinyana eka swiyimo swa misava, u nga ha ku:
◼ “Nkarhi lowu hundzeke loko hi vulavurisana u vule yinhla leyi tsakisaka swinene ehenhleni ka ku kayivela ka ku rhula emisaveni. Xana u anakanya leswaku varhangeri va misava va ta tisa ntshamiseko lowuntshwa wa misava?”
Eka munhu loyi a kavanyetiwaka hi vutianakanyi bya van’wana, u nga ha ku:
◼ “Nkarhi lowu hundzeke loko hi vulavurisana u vule yinhla leyinene ngopfu malunghana ni makwanga lawa hi ma vonaka eka vanhu hinkwavo. Xana u anakanya leswaku langutelo ra Xikwembu hi rihi ehenhleni ka vanhu va makwanga? [Yimela nhlamulo.] Leswi hi leswi Bibele yi swi vulaka eka Vaefesa 5:5.”
3 Marito man’wana lama tirhisiweke hi laha ku humelelaka ma katsa:
◼ “Ndzi ri tsakele swinene bulo ra hina ra nkarhi lowu hundzeke, kutani ndzi kambisise mianakanyo leyi yo koma ku ku komba ndlela leyi Yehova a xiyaka xiphiqo xa ku pfumala makaya ha yona. Xiya Esaya 65:21-23.”
◼ “Ndzi tsakele nhlamuselo ya wena ya leswaku vanhu va lava hulumendhe leyi antswaka.”
◼ “U vutise xivutiso lexinene leswaku xana vukhongeri hinkwabyo byi amukeriwa hi Xikwembu.”
◼ “Entiyisweni u ndzi kume ndzi ri karhi ndzi anakanya hi leswi u swi vuleke ehenhleni ka ku kunguhateriwa.”
◼ “A ndzi ri karhi ndzi anakanya hi bulo ra hina, naswona ku na yinhla ebukwini leyi nge Ntiyiso Lowu Yisaka eVuton’wini Lebyi Nga Heriki leyi ndzi anakanyaka leswaku u ta yi tsakela. [U nga ha kombisa n’wini wa muti tinhla leti hlawuriweke ebukwini.]”
Swingheniso swo tanihi leswi swi kombisa leswaku hi ri tlangerile bulo ra hina ra nkarhi lowu hundzeke ni leswaku hi tsakela ku vulavula ni n’wini wa muti nakambe.
4 U nga si endla riendzo ro vuyela, anakanyisisa hi leswi u nga ta swi vula. Fanelanisa mhaka ya wena ni munhu un’wana ni un’wana.
5 Loko munhu loyi hi n’wi endzelaka a khomekile, hi nga ha humelela hi ku vula hi ku:
◼ “Ndza swi tiva leswaku u na timinete ti nga ri tingani ntsena, kambe hi leswi leswi u nga anakanyaka ha swona loko u heta ntirho wa wena. [Hlaya Matewu 5:3.]”
Kumbe u nga ha ku:
◼ “Ndzi ku tsalele matsalwa lawa manharhu. Tanihi leswi wu nga riki nkarhi lowunene wo vulavurisana, ndza ya siya kutani loko ndzi vuya, ndzi ta tsakela ku teka timinete ta ntlhanu ndzi burisana na wena ha wona.”
6 Ku Tshinelela Loku Hoxeke Loku Faneleke Ku Papalatiwa: Swivutiso leswi nga ha tisaka nhlamulo leyi hoxeke, kumbe leswi swi nga ha vekaka n’wini wa muti eka xiyimo xo nonon’hwa hakanyingi a swi humesi vuyelo lebyinene. Leswi swi katsa: “Xana u yi hlayile mhaka leyi ndzi ku siyeleke yona?” “Xana u na swivutiso swo karhi?” “Xana wa ndzi tsundzuka?” “Ndzi tele ku vutisa loko wa ha swi tsakela ku vulavula hi ta swikongomelo swa Xikwembu swa misava leyi.”
7 Hi ta hisekela ku endzela vanhu lava va kombiseke ku tsakela enkarhini lowu hundzeke loko hi lunghiselela ka ha ri na nkarhi leswaku hi va nyika mpfuno lowu nga wa nkoka hakunene.