Ku Twarisa Mahungu Lamanene

Hi Ku Vulavula Ni Vanhu

1 Hi ku ya hi dikixinari, bulo i “ku nyiketana ka mintlhaveko hi marito, tinhlamuselo, mianakanyo kumbe miehleketo.” Kambe xana u nga ri sungurisa ku yini bulo leri sekeriweke eBibeleni loko vanhu lava u hlanganaka na vona kumbexana va kaneta hi tlhelo ra vukhongeri kumbe va khomekile hi timhaka ta vona vini? Yesu u vutise swivutiso leswaku a katsa vayingiseri.—Yoh. 4:9-15, 41, 42.

2 Hi fanele ku khongela hi matimba eka Xikwembu leswaku xi hi pfuna ku kuma vanhu va timbilu letinene ni ku hi pfulela ndlela yo vulavula na vona. Ku veka vumbhoni swi va leswi olovaka loko hi languta n’wini un’wana ni un’wana wa muti tanihi loyi a nga vaka nandza wa Yehova. Xiyimo lexi xa mianakanyo xi ta hi pfuna ku hlamusela ntiyiso hi mukhuva lowu kufumelaka, wo tshembeka lowu wu nga ta koka vanhu lava va tsakelaka.

TIRHISA LESWI HI NGA NA SWONA

3 Buku leyi nge Reasoning yi nyikela swingheniso swo tala leswinene eka tluka 9-15. Swo tala swa swona swi tirhisa swivutiso hi laha ku humelelaka. Loko n’wini wa muti a hlamula xivutiso, yingisela hi ndlela ya ku xixima ivi endzhaku u hlamula hi mukhuva lowu wu nga ta kombisa n’wini wa muti leswaku hi swi xiyile leswi a swi vuleke.—Vakol. 4:6.

4 Kavula, loko u vutisa xivutiso, a wu swi tivi leswi n’wini wa muti a nga ta hlamurisa swona. Tiyimiseli ku lulamisa bulo ra wena hi laha ku faneleke. Ringeta ku hambetisa bulo hi ku nghenisa rungula rin’wana leri humaka eBibeleni leri yelanaka ni leswi a swi tsakelaka na hi ku vutisa swivutiso swin’wana leswi lavaka mianakanyo.

LUNGHISELELA KA HA RI EMAHLWENI

5 U nga ha va ana se u tolovelane ni mianakanyo leyi tolovelekeke ya vanhu lava va nga ensin’wini ya ka n’wina. Loko swi ri tano, kutani hlawula swingheniso leswi swi nga ta va leswi humelelaka swinene ensin’wini ya ka n’wina ebukwini leyi nge Reasoning. Ku twananisa xin’wana xa swingheniso leswi ni Mhaka Yo Vulavurisana ya sweswinyana ku nga ha va leswi u swi lavaka. Sungula bulo ra wena hi swilo leswi u kholwaka leswaku hi swona n’wini wa muti a swi khathalelaka, u nyikela xiphiqo hi ku komisa ivi u yisa eka ntlhatlho wa Bibele. Loko a nyikela nhlamuselo, vulavula hi ndlela leyinene, hayi hi ndlela ya ku kuma swihoxo ehenhleni ka leswi a swi vulaka. Ku khathalela ka wena mianakanyo ni mintlhaveko ya yena swi fanele swi n’wi khutaza ku hambeta a vulavula na wena. Ringeta ku kuma tinhla ta ku pfumelelana ivi u nyikela nhlamuselo ehenhla ka tona. Hlayisa bulo ri ri lerinene hi ku kandziyisa mikateko ya Mfumo tanihi ntlhatlho wa Bibele wa swiphiqo swa munhu.

6 Xiya malangutelo lama hambaneke tanihi swilotlelo swo yisa bulo emahlweni. Loko n’wini wa muti a tiyimisele ku anakanyisisa, u nga ha vutisa u ku, “Xana u kale u anakanya hi swona hi langutelo leri ke?” Kutani kombisa leswi Rito ra Xikwembu ri vulaka swona emhakeni leyi. Loko u kuma leswaku munhu wa kona u tiomisa nhloko, u nga sindzisi leswaku a amukela leswi u swi vuleke. Ku ri na sweswo, gimeta hi marito ya xinghana, u tshika ndlela yi pfulekela nkarhi lowu taka wo nyikela mahungu lamanene eka yena.—Swiv. 12:8, 18.

7 Vanhu van’wana va voyamele swinene eku vulavuleni loko u hlangana na vona hi xitshuketa. U nga kanakani ku sungula mabulo ni vanhu lava u hlanganaka na vona exitarateni kumbe lava va tirhaka kumbe lava tshamisekeke ejaratini ra vona. Va nga ha amukela nkhathalelo wa wena wa xiviri eka ntirho wa vona, naswona u nga swi kota ku yisa ku vulavurisana eka bulo ra xitshembiso xa Bibele xa leswaku ku nga ri khale misava yi ta va paradeyisi. Loko u sungula bulo, ringeta ku ri endla ntokoto lowu tsakisaka eka n’wini wa muti. Loko swi koteka eka wena, siya munhu ni langutelo leri tsakisaka swinene eka Xikwembu, Rito ra xona ni malandza ya xona. Hi ndlela leyi, hambi loko u nga humeleli eku sunguleni hi ku fikelela mbilu ya yena, a nga va loyi a amukelaka swinene nkarhi lowu landzelaka loko Mbhoni yi endza.