Bulo Ra Xinghana Ri Nga Fikelela Mbilu

¹ Ku bula ku nga hlamuseriwa ku ri “ku byelana timhaka.” Ku sungula mabulo ya xinghana hi nhloko-mhaka leyi khumbaka van’wana swi nga pfuxa ku tsakela ka vona naswona swi nga hi pfuna ku fikelela timbilu ta vona hi mahungu ya Mfumo. Ntokoto wu kombe leswaku swa tirha swinene ku nghenisa vanhu ebulwini ra xinghana naswona leri olovaka ku tlula ku va chumayela.

² Ndlela Yo Sungula Bulo Ra Xinghana: Leswaku hi kota ku bula ni van’wana a swi vuli swona leswaku hi fanele hi sungula mhaka leyi hlelekeke ni matsalwa ya kona. Swo lava ntsena hi endla munhu lon’wana leswaku a vulavula na hina. Hi xikombiso, loko hi khome bulo ra xinghana ni muakelani wa hina, ri nga bohani kambe a ri ve ri ntshunxekile. A hi kali hi anakanya hi marito lama hi nga ta ma vula kambe hi ntumbuluko hi angula eka mhaka leyi hi vulavulaka ha yona. Ku kombisa ku tsakela eka leswi a swi vulaka swi nga n’wi khutaza leswaku a ya emahlweni a bula na hina. Ku fanele ku endliwa leswi fanaka loko hi ri karhi hi vula vumbhoni eka van’wana.

³ Tinhloko-mhaka to kota vugevenga, swiphiqo swa vantshwa, timhaka ta kwala tikweni, swiyimo swa misava, kumbe hambi ku ri ta maxelo ti nga tirhisiwa ku sungula mabulo ya xinghana. Timhaka leti khumbaka vutomi bya vanhu hi ku kongoma ta tirha swinene eku pfuxeni ku tsakela. Loko ho kala hi sungula bulo na vona, hi nga ri hundzuluxanyana ri ya eka rungula ra Mfumo.

⁴ Ku bula hi ntshunxekile a swi vuli leswaku ku lunghiselela ka ha ri emahlweni a swi bohi. Swa boha. Hambiswiritano, a swi kali swi lava leswaku u tsala mhaka leyi tiyeke kumbe ku nhlokohata rungula leri nga ta endla bulo leri nga cincekiki kumbe leri nga pfumelelaniki ni swiyimo leswi nga kona hi nkarhi wolowo. (Ringanisa 1 Vakorinto 9:20-23.) Ndlela ya kahle ngopfu ya ku lunghiselela i ku hlawula mhaka yin’we kumbe timbirhi ta le Matsalweni, hi langutelo ro vumba mabulo hi tona. Ku pfuxeta timhaka leti kumekaka ebukwini leyi nge Ku Hlamulana swi ta tirha emhakeni leyi.

⁵ Timfanelo Ta Nkoka Ta Bulo Ra Xinghana: Loko hi bula ni van’wana, hi fanele hi kombisa ntsako ni xinghana. Ku n’wayitela ni ku languteka hi tsakile swi pfuna ku kombisa timfanelo leti. Hi ni rungula ro tlula hinkwawo emisaveni; ri tsakeriwa ngopfu hi lava timbilu letinene. Loko va vona leswaku loko hi va tsakela hi susumetiwa hi ku navela ku avelana na vona mahungu lamanene, kutani va nga susumeteleka ku yingisela.—2 Kor. 2:17.

⁶ Ku byelana timhaka ku fanele ku va nchumu lowu tsakisaka. Hikwalaho, hi fanele hi va ni musa naswona hi xalamuka loko hi vula rungula ra Mfumo. (Gal. 5:22; Kol. 4:6) Tikarhatele ku siya munhu lon’wana a ri ni langutelo lerinene. Hi ndlela leyi, hambiloko hi nga humeleli eka ku fikelela mbilu hi bulo ro sungula, munhu wa kona a nga amukela Mbhoni enkarhini lowu taka loko yi bula na yena.

⁷ Ku sungula bulo ra xinghana a hi ku va u kota ku endla xingheniso lexi rharhanganeke. I ku va u kota ku pfuxa ku tsakela emhakeni leyi khumbaka munhu ntsena. Loko hi lunghiselerile ka ha ri na nkarhi, kutani hi ta lunghekela ku bula na vanhu hi xinghana. A hi tiyimiseleni ku fikelela timbilu ta lava hi hlanganaka na vona hi ku avelana na vona mahungu lamanene ku tlula hinkwawo, ya mikateko leyi nga heriki ya Mfumo.—2 Pet. 3:13.