Ku Antswisa Vutshila Bya Hina eNsin’wini—Ku Sungula Bulo Leswaku U Ta Chumayela Hi Xitshuketa

Lexi Endlaka Swi Va Swa Nkoka: Loko hi chumayela hi yindlu ni yindlu, hakanyingi hi kuma vanhu vo tala va nga ri kona emakaya. Hambiswiritano, hi nga ha hlangana na vona loko hi tirhisa swo famba swa mani na mani, loko hi rindzele ku nghena eka dokodela, loko hi ri entirhweni hi nkarhi wo wisa kumbe exikolweni ni le tindhawini tin’wana. Ku rhandza ka Yehovha hi leswaku vanhu hinkwavo va twa rungula ra Mfumo. (1 Tim. 2:3, 4) Hakanyingi, leswaku hi kota ku chumayela, hi fanele hi teka goza ro sungula bulo.

Ndlela Leyi U Nga Swi Endlaka Ha Yona:

Vana ni vuxiyaxiya. Xana munhu wa kona u vonaka a ri ni xinghana naswona a swi tsakela ku bula? Xana swiyimo swa mi pfumelela leswaku mi bula mi ntshunxekile? Vahuweleri van’wana va rhanga va languta munhu yoloye ematihlweni ivi va n’wayitela. Loko munhu yoloye a va n’wayitelela, va ringeta ku sungula bulo.
Endla xikhongelo xo koma hi mbilu, loko u nga ri na xona xivindzi xo vulavula.—Neh. 2:4; Mint. 4:29.
Kumbexana u nga sungula hi ku xeweta. Yesu a nga sungulanga bulo rakwe ni wansati wa Musamariya hi ku vulavula hi Mfumo. (Yoh. 4:7) Minkarhi yin’wana bulo ri nga sunguriwa hi ku vula xibumabumelo lexi nge: “Vana va wena va ni mahanyelo lamanene!” Ndlela yin’wana yo sungula bulo i ku vutisa xivutiso lexi nge: “Xana u ma vonile mahungu tolo?”
Loko bulo se ri sungurile, lava tindlela to chumayela mahungu lamanene, kambe u nga jahi. Endla leswaku bulo ri ya emahlweni. Kumbexana u nga vula mhaka leyi kokaka munhu yoloye rinoko leyi nga ta endla leswaku a ku vutisa xivutiso. Hi xikombiso, loko mhaka leyi mi bulaka ha yona yi khumba ndyangu, u nga ha ku: “Ndzi kume nkongomiso wo kurisa vana lowu tshembekaka.” Loko mi bula hi mhaka leyi nga emahungwini, u nga ha ku: “Ndza ha ku hlaya mahungu yo tsakisa.” U nga heli matimba loko bulo ri hela u nga si n’wi chumayela.
Tshama u ri ni swiphephana kumbe minkandziyiso yin’wana leyi u nga yi nyikaka munhu loyi a tsakelaka.

Ringeta Ku Endla Leswi N’hweti Leyi:

Vhiki ni vhiki ringeta ku sungula bulo hi xikongomelo xo chumayela hi xitshuketa.