Ku Antswisa Vutshila Bya Hina Ensin’wini​—Sungula Mabulo Hi Xikongomelo Xo Lava Ku Chumayela

Yesu u kote ku chumayela wansati wa Musamariya hi xitshuketa hikwalaho ka leswi a sunguleke a burisana na yena. Hi nga byi antswisa njhani vuswikoti bya hina loko swi ta emhakeni ya ku sungula bulo ni vanhu lava hi nga va tiviki?

• Vana ni xinghana naswona u burisana ni vanhu. Hambileswi Yesu a karhele, u sungule bulo hi ku kombela mati. U nga ha sungula hi ku pfuxela hi ndlela ya xinghana kutani u vulavula hi ta maxelo kumbe hi swilo leswi swa ha ku endlekaka. Tsundzuka leswaku xikongomelo xa wena i ku sungula bulo, kutani vulavula hi nchumu wun’wana ni wun’wana lowu nga tsakisaka munhu yoloye. Loko a nga swi tsakeli leswaku mi bula u nga vileli, ringeta munhu un’wana. Khongela eka Yehovha leswaku a ku nyika xivindzi.—Neh 2:4; Min 4:29.

• Tshama u lunghekele ku chumayela, kambe u nga hatliseli ku nghena emhakeni. Rindzanyana ku fikela loko munhu wa kona a tsakela bulo. Loko u hatlisela ku nghena emhakeni, a nga ha tsema bulo hi ku hatlisa. U nga heli matimba loko bulo ra n’wina ri hela u nga si sungula ku n’wi chumayela. Loko ku endla leswi swi ku tikela, titolovete ku sungula mabulo ku nga ri hi xikongomelo xo lava ku chumayela. [Tlanga vhidiyo 1 kutani mi bula ha yona.]

• Ringeta ku pfula ndlela yo chumayela hi ku va u vulavula hi ripfumelo ra wena swi hi ku hiseka, sweswo swi nga endla leswaku loyi u bulaka na yena a lava ku tiva swo tala hi ripfumelo ra wena. Yesu u vule mhaka leyi tlhontlhaka mianakanyo leyi endleke leswaku wansati wa Musamariya a vutisa swivutiso. Swivutiso sweswo swi endle leswaku Yesu a kota ku n’wi chumayela. [Tlanga vhidiyo 2 kutani mi bula ha yona, endzhaku tlanga vhidiyo 3 kutani mi bula ha yona.]