Ku Twarisa Mahungu Lamanene

Hi Vutlhari

1 Xivuriso lexi huhuteriweke xi ri: “La hlayisaka mianakanyo u ta vona ku kateka.” (Swiv. 19:8) Vutlhari bya marito lawa hakanyingi byi tikombise byi ri ntiyiso entirhweni wa hina wa ku chumayela. Hi xikombiso, hi ku tirhisa vutlhari ni vuxiyaxiya, vahuweleri vo tala va hundzule swi tsema bulo swi va minkarhi yo nyikela vumbhoni lebyi engetelekeke. Kumbe va veka xisekelo xo nyikela vumbhoni enkarhini lowu taka. Xana leswi swi nga endlisiwa ku yini?

KU LANGUTANA NI SWITSEMA-BULO

2 Hakanyingi hi hlangana ni vanhu lava nge, “Ndzi khomekile.” Xana n’wini wa muti u khomekile hakunene kumbe wo vula leswi ntsena leswaku a nga katseki eka bulo ro leha? Vutlhari bya laveka. Loko a tikomba a nga khomekanga swinene, hi nga ha ringeta ku hlula xitsema-bulo lexi. Hi nga ha ku, “Kutani ndzi ta komisa.” Endzhaku ka sweswo, hi nga komisa leswi a hi lava ku bula ha swona, hi tsundzuka mpfumelelano wo komisa bulo ra hina. Hikwalaho ka nkhathalelo ni tinhlamuselo ta hina leti pfuxaka ku tsakela, munhu a nga ha tlhela a kombisa ku tsakela ku ya emahlweni ni bulo enkarhini wolowo.

3 A hi nge loyi u n’wi tshinelelaka u khomekile hakunene. Hambi leswi hi nga swi laviki ku tlherisiwa hi ku olova, loko hi phikelela kumbe hi sindzisa, hi nga ha siya langutelo leri nga riki rinene. Loko n’wini wa muti a ta enyangweni a khome xo hakasa ha xona evokweni ra yena naswona hi twa swakudya swi ri karhi swi swekiwaka, entiyisweni u khomekile hakunene. Kutani vutlhari ni ku avanyisa lokunene swa laveka. Ku ta va ku nga ri nkhathalelo ku phikelela ni bulo hi nkarhi wolowo. Swa antswa swinene ku nyika n’wini wa muti xiphephena naswona hi ringanyeta ku tlhela hi vuya endzhakunyana. Leswi swi ta siya langutelo lerinene swinene, naswona vumbhoni lebyinene byi nga ha nyikeriwa nkarhi lowu taka loko Mbhoni yi endza.

KU TWISISA LANGUTELO RA MUNHU

4 Minkarhi yin’wana hi hlangana ni vanhu lava nga ni vukarhi loko hi va endzela evutirhelini bya yindlu na yindlu. Hi fanele ku endla yini emhakeni leyi? Swivuriso 17:27 ya tsundzuxa: “La tisivelaka nomu u ni ku twisisa.” Mawaku xitsundzuxo lexinene swonghasi! Rito ro titsongahata leri kombisaka nkhathalelo hakanyingi ri pfuna ku horisa munhu wo tano. Ku tlula kwalaho, loko hi vutlhari ho n’wi endla a tiphofula hi mhaka leyi n’wi khumbaka, a nga hela matimba. Hambi loko o tsema mhaka, entiyisweni ku hlamula ka hina ka ku titsongahata ku ta n’wi siya a ri eka xivumbeko lexi antswaka xa mianakanyo ehenhleni ka ntirho wa Timbhoni ta Yehova. Wolowo wu ta va wu ri ntirho lowunene. Kavula, loko n’wini wa muti a yimayimeka ni ku hlundzuka, swi nga antswa ku suka hi ku rhula ivi kumbexana hi ringeta ku nyikela vumbhoni eka yena nkarhi wun’wana.

5 Hambi swi ri tano, ku na vanhu lava hambi loko va kaneta, va nga ha vaka va tshembekile. Eka swiyimo leswi, ku nga ha va ndzingo wa xiviri wa ku lehisa ka hina mbilu hi ya emahlweni hi bula na vona. Kambe loko hi ri ni vutlhari, a hi nge gimeti hi leswaku n’wini wa muti a nga tsakeli, ntsena hi leswi a phofulaka langutelo leri hambaneke hi matimba. Hi nga ha tsakela ku vutisa swivutiso swa vutlhari leswaku hi kuma leswaku ha yini a pfumela hi ndlela leyi a pfumelaka ha yona ivi hi n’wi kombisa leswi Bibele yi swi vulaka emhakeni yoleyo. (Swiv. 20:5) Hi ku ya hi mahlamulelo ya yena, hi nga ha kunguhata loko swi ri swinene ku yisa bulo emahlweni.

6 Muhuweleri la nga ni vutlhari u xiya leswaku nkarhi ni swiyimo hakanyingi swi cinca langutelo ra n’wini wa muti ehenhleni ka rungula ra Mfumo. Mahlamulelo ya yena ma nga ha va ma hambanile swinene loko hi tlhela hi endza. Hi fanele hi papalata ku ehleketa leswaku hi ta kuma nhlamulo leyi nga tsakisiki hikwalaho ka ndlela leyi n’wini wa muti a hlamuleke ha yona nkarhi lowu hundzeke loko hi endza ekaya ra yena.

7 Ku kota ku vona loko hi fanele ku yisa bulo emahlweni a swi olovi. Hambi swi ri tano, hi ku kurisa vuswikoti byo dyondzisa, hi ta humelela swinene eku nyikeleni ka mahungu lamanene hi vutlhari, hi ri karhi hi languta eka Yehova leswaku a katekisa matshalatshala ya hina.—1 Vakor. 3:6; Tito 1:9.