Nyikela Mbilu Ya Wena Eku Twisiseni
“Yehova hi yena l’a nyikaka v̌utlhari; ku tiv̌a ni ku twisisa ŝi huma e noṅwini wa yena.”—SWIVURISO 2:6.
1. Hi nga yi nyiketa njhani mbilu ya hina eku twisiseni?
YEHOVHA i Muleteri wa hina Lonkulu. (Esaya 30:20, 21) Kambe, hi fanele hi endla yini leswaku hi ta vuyeriwa eka ‘vutivi bya Xikwembu’ lebyi paluxiweke eRitweni ra xona? Hi ku komisa, hi fanele hi ‘nyiketa timbilu ta hina eku twisiseni’—hi tikarhatela ku kuma ni ku tirhisa mfanelo leyi. Leswaku hi endla leswi, hi fanele hi languta eka Xikwembu, hikuva wanuna wo tlhariha u te: “Yehova hi yena l’a nyikaka v̌utlhari; ku tiv̌a ni ku twisisa ŝi huma e noṅwini wa yena.” (Swivuriso 2:1-6) Xana vutivi, vutlhari ni ku twisisa i yini?
2. (a) Vutivi i yini ke? (b) U nga byi hlamusela njhani vutlhari? (c) Ku twisisa i yini?
2 Vutivi i ku tolovelana ni mintiyiso leyi kumiwaka hi ku va ni ntokoto, vuxiyaxiya kumbe hi ku dyondza. Vutlhari i vuswikoti byo tirhisa vutivi hi ndlela ya kona. (Matewu 11:19) Hosi Solomoni u kombise vutlhari loko vavasati vambirhi va kokelana n’wana, kutani a tirhisa ku tiva ka yena ku tinyiketela loku manana a nga na kona eka n’wana wa yena, leswaku a ahlula xirhalanganya lexi. (1 Tihosi 3:16-28) Ku twisisa i “ku avanyisa hi ku pakanisa.” I “matimba kumbe vuswikoti bya mianakanyo lebyi endlaka leswaku yi kota ku hambanisa nchumu wun’wana eka wun’wana.” (Webster’s Universal Dictionary) Loko hi nyiketa timbilu ta hina eku twisiseni, Yehovha u ta hi nyika kona hi ku tirhisa N’wana wakwe. (2 Timotiya 2:1, 7) Kambe, xana ku twisisa ku nga swi khumbisa ku yini swiyenge swo hambana-hambana swa vutomi?
Ku Twisisa Ni Mavulavulelo Ya Hina
3. U nga yi hlamusela njhani Swivuriso 11:12, 13, naswona ku ‘pfumala mbilu’ swi vula yini?
3 Ku twisisa ku hi endla hi xiya leswaku ku ni “nkari wa ku miyela, wu kona nkari wa ku v̌ulav̌ula.” (Eklesiasta 3:7) Nakambe mfanelo leyi yi hi endla hi xiya leswi hi swi vulaka. Swivuriso 11:12, 13 ya hlamusela: “L’a sanḍaka warikwav̌o a nga na [mbilu, NW] kambe l’a nga ni ku twisisa wa miyela. L’a šušaka hi mahlev̌o a boša makungu; kambe l’owa mbilu yo ṭhembeka o hlayisa timhaka.” Ina, wanuna kumbe wansati loyi a sandzaka munhu un’wana “a nga na mbilu.” Hi ku ya hi Wilhelm Gesenius mutsari wa swihlamusela-marito, munhu wo tano “u kayivela ku twisisa.” U pfumala maavanyiselo lamanene, naswona ku tirhisiwa ka rito leri nge “mbilu” swi kombisa ku kayivela ka timfanelo letinene ta vumunhu bya le ndzeni. Loko munhu loyi a tivulaka Mukreste a sandza lerova a kala a hleva kumbe ku hemba, vakulu lava hlawuriweke va fanele va teka goza ro herisa xiyimo lexi lexi nga tengangiki evandlheni.—Levhitika 19:16; Pisalema 101:5; 1 Vakorinto 5:11.
4. Xana Vakreste lava nga ni ku twisisa ni lava tshembekeke, va endla yini hi mhaka leyi nga ya xihundla?
4 Ku hambana ni lava ‘nga riki na mbilu,’ vanhu lava nga ‘ni ku twisisa loku anameke’ va miyela loko swi fanerile ku endla tano. A va paluxi swihundla. (Swivuriso 20:19) Hi ku tiva leswaku ku vulavula loku nga fanelangiki ku nga vanga khombo, lava nga ni ku twisisa va ‘tshembekile emoyeni.’ Va tshembeka eka vapfumeri-kulobye naswona a va paluxi timhaka ta xihundla, leti nga ha va nghenisaka ekhombyeni. Loko Vakreste lava nga ni ku twisisa va twa timhaka ta xihundla ta muxaka wihi na wihi leti khumbaka vandlha, va tshama na tona ku fikela laha nhlengeletano ya Yehovha yi vonaka swi fanerile leswaku yi ti paluxa, hi ku tirhisa tibuku ta yona.
Ku Twisisa Ni Mahanyelo Ya Hina
5. ‘Swihunguki’ swi ku languta njhani ku tikhoma loko biha, naswona hikwalaho ka yini?
5 Swivuriso swa Bibele swa hi pfuna leswaku hi tirhisa ku twisisa leswaku hi papalata mahanyelo lama nga fanelangiki. Hi xikombiso, Swivuriso 10:23 (NW) yi ri: “Eka xihunguki ku tikhoma hi ndlela yo biha swi fana ni ntlango, kambe vutlhari i bya munhu wo twisisa.” Lava eka vona ku tikhoma hi ndlela yo biha ‘swi fanaka ni ntlango’ a va byi voni vubihi bya swiendlo swa vona naswona Xikwembu a va xi teki xi ri xona lexi un’wana ni un’wana a faneleke a tihlamulela eka xona. (Varhoma 14:12) ‘Swihunguki’ swo tano swi anakanya hi ndlela leyi hambukeke, ku fikela laha swi vonaka onge Xikwembu a xi byi voni vubihi bya swona. Hi swiendlo swa swona kahle-kahle swi ri: “A ku na Šikwembu!” (Pisalema 14:1-3; Esaya 29:15, 16) Hikwalaho ka leswi va nga kongomisiwiki hi yona misinya ya milawu ya Xikwembu, va hava ku twisisa naswona a va nge swi koti ku avanyisa timhaka hi ndlela leyinene.—Swivuriso 28:5.
6. Hikwalaho ka yini ku tikhoma loko biha ku ri vuhunguki, naswona hi nga ku languta njhani loko hi ri ni ku twisisa?
6 “Munhu wo twisisa” wa swi xiya leswaku ku tikhoma loko biha a hi “ntlango.” Wa swi tiva leswaku a ku xi tsakisi Xikwembu naswona ku nga onha vuxaka bya hina na xona. Ku tikhoma ko tano i vuhunguki hikuva ku tekela vanhu ku tixixima ka munhu hi xiyexe, ku onha vukati, ku vavisa mianakanyo ni miri, naswona ku endla vumoya byi lahleka. Kutani a hi nyiketeni timbilu ta hina eku twisiseni leswaku hi papalata mahanyelo layo biha kumbe ku tikhoma loko biha ka muxaka wihi na wihi.—Swivuriso 5:1-23.
Ku Twisisa Swin’we Ni Mintlhaveko Ya Hina
7. Hi byihi vuyelo byin’wana bya le mirini lebyi vangiwaka hi ku hlundzuka?
7 Ku nyiketa timbilu ta hina eku twisiseni, swi tlhela swi hi pfuna ku lawula mintlhaveko ya hina. Swivuriso 14:29 yi ri: “L’a hlwelaka ku kariha o ni ku anakanya lo’kukulu, kambe wa mbilu ya tihanyi, o ṭhov̌ela v̌uhung[u]ki.” Xivangelo xin’wana lexi endlaka leswaku munhu la nga ni ku twisisa a lwela ku papalata xifafa hi leswaku xi ni vuyelo byo biha emirini wa hina. Xi nga tlakusa nsusumeto wa ngati, ni ku endla ku hefemula swi nonon’hwa. Madokodela ma vula leswaku ku hlundzuka ni xifafa i mintlhaveko leyi engetelaka kumbe ku vanga mavabyi yo tanihi phika, vuvabyi bya nhlonge, swiphiqo swa mpfuvelo ni swilondza swa le ndzeni.
8. Ku va ni ximbilwambilwana swi nga yisa eka yini, kambe, xana ku twisisa ku nga hi pfuna njhani emhakeni leyi?
8 Xikongomelo xa hina xa ku kombisa ku twisisa ni “ku hlwela ku kariha” a hi ku papalata ku vavisa rihanyo ra hina ntsena. Ku va ni ximbilwambilwana swi nga hi vangela ku endla swilo hi ndlela ya vuhunguki leswi hi nga ta tisola ha swona. Ku twisisa swi hi endla hi anakanya hi vuyelo bya ku vulavula handle ko ringanisela kumbe magugu, kutani hi “ṭhov̌ela v̌uhung[uki]” hi ku endla swilo hi ndlela ya vuphukuphuku. Ngopfu-ngopfu ku twisisa ku hi pfuna ku lemuka leswaku ximbilwambilwana xi nga kavanyeta ndlela leyi hi anakanyaka ha yona, kutani hi nga ha swi koti ku avanyisa hi ndlela leyinene. Leswi swi nga hunguta vuswikoti bya hina byo endla ku rhandza ka Xikwembu ni ku hanya hi ku pfumelelana ni misinya ya milawu ya Xikwembu leyo lulama. Ina, ku pfumelela xifafa swa onha hi tlhelo ra moya. Entiyisweni, “ku kariha” ku katsiwa exikarhi ka ‘mintirho ya nyama’ leyi nga ya hava, leyi nga endlaka leswaku hi nga dyi ndzhaka ya Mfumo wa Xikwembu. (Vagalatiya 5:19-21) Leswi hi nga Vakreste lava twisisaka, a hi “hatlise[ni] ku twa, [hi] hlwela ku vulavula, [hi] hlwela ku kariha.”—Yakobo 1:19.
9. Xana ku twisisa swin’we ni rirhandzu ra vumakwerhu swi nga hi pfuna njhani leswaku hi lulamisa timholovo?
9 Loko hi tshuka hi hlundzuka, ku twisisa ku nga endla leswaku hi miyela leswaku hi papalata ku onha. Swivuriso 17:27 yi ri: “L’a tikhomaka e maritweni o tiv̌a ku tlhariha, l’a tisiv̌elaka nomu o ni ku twisisa.” Ku twisisa ni rirhandzu ra vumakwerhu swi ta hi endla hi lwela ku papalata ku vula marito lama tlhavaka. Loko ku tshuke ku va ni timholovo, rirhandzu ni ku titsongahata swi ta hi susumetela leswaku hi kombela ndzivalelo ni ku lunghisa xiyimo. Kambe a hi nge un’wana u hi dyoherile. Kutani a hi vulavuleni na yena a ri yexe, hi ndlela leyinene ni hi ku titsongahata, naswona hi xikongomelo xo lava ku kondletela ku rhula.—Matewu 5:23, 24; 18:15-17.
Ku Twisisa Ni Ndyangu Wa Hina
10. Hi xihi xiphemu lexi vutlhari ni ku twisisa swi nga na xona evuton’wini bya ndyangu?
10 Swirho swa ndyangu swi fanele swi kombisa vutlhari ni ku twisisa, hikuva timfanelo leti ti ta aka ndyangu. Swivuriso 24:3, 4 yi ri: “Yindlu yi akiwa hi v̌utlhari, yi tiyisiwa hi ku twisisa; hi ku tiv̌a, makamera ya yona ma tala [h]i rifuwo ra risima leri ṭakisaka.” Vutlhari ni ku twisisa swi fana ni switina leswinene swo aka vutomi bya ndyangu lebyi humelelaka. Ku twisisa ku pfuna vatswari lava nga Vakreste leswaku va kota ku kumisisa mintlhaveko ni swilaveko swa vana va vona. Munhu la nga ni ku twisisa wa swi kota ku vulavula, ku yingisela ni ku tiva mintlhaveko ni mianakanyo ya munghana wakwe wa vukati.—Swivuriso 20:5.
11. Xana wansati la tekiweke la nga ni ku twisisa a nga ‘aka yindlu yakwe’ hi ndlela yihi?
11 Handle ko kanakana, ku twisisa ni vutlhari i swa nkoka leswaku vutomi bya ndyangu byi va lebyi tsakisaka. Hi xikombiso, Swivuriso 14:1 yi ri: “Wansati l’a tlhariheke o aka yindlu ya yena, kambe wa mihoni wa yi hahlula hi mav̌oko ya yena.” Wansati la tekiweke la nga ni vutlhari ni ku twisisa, loyi a titsongahataka eka nuna wakwe u ta tikarhatela swa ndyangu wakwe, kutani u ta hoxa xandla eku akeni ka ndyangu wakwe. Nchumu wun’wana lowu nga ta endla leswaku a “aka yindlu yakwe” i ku vulavula kahle hi nuna wakwe minkarhi hinkwayo, leswi nga ta endla leswaku vanhu van’wana na vona va n’wi xixima. Naswona wansati wa migingiriko, wo twisisa la nga ni xichavo lexikulu eka Yehovha, wa dzunisiwa.—Swivuriso 12:4; 31:28, 30.
Ku Twisisa Ni Ndlela Leyi Hi Hanyaka Ha Yona
12. Lava ‘pfumalaka mbilu’ va byi languta njhani vuhunguki, naswona ha yini?
12 Ku twisisa ku hi pfuna leswaku hi endla swilo hi ndlela leyinene etimhakeni hinkwato. Leswi swi kombisiwe eka Swivuriso 15:21, leyi nge: “V̌uhunguki i ku ṭaka ka l’a pfumalaka ku twisisa, kambe munhu wa ku anakanya o famba hi ku lulama.” Hi fanele hi xi twisisa njhani xivuriso lexi? Mahanyelo ya vuhunguki kumbe vuhomboloki, ya tsakisa eka vavanuna, vavasati ni vantshwa lava nga swihunguki. Va pfumala “mbilu,” a va na nsusumeto lowunene, naswona va hunguke ngopfu lerova va tsakisiwa hi vuhunguki.
13. Xana Solomoni u ri yini hi ku hleka ni ku va ni swilo swo tala?
13 Hosi Solomoni wa Israyele la nga ni ku twisisa u swi vonile leswaku ku va ni swilo swo tala a swi pfuni nchumu. U pfumerile a ku: “Nḍi v̌a nḍi ku e mbilwini ya mina: Tana, nḍi ku korwisa hi ku ṭaka, u ta nantŝa ku ṭaka; kambe v̌onani, na ŝona i v̌uhav̌a. A nḍi ku: E ku hleka i ku hunguka; ni ku ṭaka, ku pfuna yini šana?” (Eklesiasta 2:1, 2) Tanihi wanuna wo twisisa, Solomoni u kume leswaku mafenya ni ku hleka swi ri swoxe a swi enerisi, hikuva a swi wu tisi ntsako wa xiviri ni lowu khomelelaka. Ku hleka ku nga ha hi endla hi rivala swiphiqo swa hina nkarhinyana wo karhi, kambe endzhakunyana ka nkarhi swi nga ha tlhela swi vuya hi mpimo lowukulu. Hilaha ku faneleke Solomoni u swi kotile ku fanisa ku hleka ni “v̌uhav̌a.” Hikwalaho ka yini? Hikuva ku hleka ka vuhunguki ku nga sivela munhu leswaku a avanyisa swilo hi ndlela leyinene. Ku nga ha hi vangela leswaku mhaka ya nkoka swinene hi yi teka hi ku olova. Ku tsaka loku fambisanaka ni marito ni swiendlo swa munhu wa misavu wa le hubyeni, a ku nge vuriwi leswaku ku ni vuyelo lebyinene. Ku twisisa nkoka wa xikombiso xa Solomoni malunghana ni ku hleka swin’we ni mafenya, swi hi pfuna ku papalata ku va “lava rhandzaka ku tiphina ku tlula ku rhandza Xikwembu.”—2 Timotiya 3:1, 4.
14. Xana munhu la nga ni ku twisisa ‘u yisa ku yini emahlweni’?
14 Xana ‘munhu la nga ni ku twisisa u kongoma emahlweni’ hi ndlela yihi? Ku twisisa swilo hi tlhelo ra moya ni ku tirhisa misinya ya milawu ya Xikwembu, swi endla leswaku vanhu va famba hi ndlela leyinene, leyi kongomeke. Vuhundzuluxeri bya Byington byi swi veka hi ku kongoma byi ku: “Vuhunguki i nkateko eka xihunguki, kambe munhu wo tlhariha u ta famba hi ku lulama.” ‘Munhu la nga ni ku twisisa’ u lulamisela milenge yakwe tindlela leto lulama naswona wa swi kota ku hambanisa leswinene ni leswo biha, hi ku tirhisa Rito ra Xikwembu evuton’wini bya yena.—Vaheveru 5:14; 12:12, 13.
Yana Eka Yehovha Leswaku Nkarhi Hinkwawo U Kuma Ku Twisisa
15. Hi dyondza yini eka Swivuriso 2:6-9?
15 Leswaku hi famba hi ndlela leyinene evuton’wini, hinkwerhu hi fanele hi swi xiya leswaku a hi hetisekanga kutani hi ya eka Yehovha leswaku hi kuma ku twisisa hi tlhelo ra moya. Swivuriso 2:6-9 yi ri: “Yehova hi yena l’a nyikaka v̌utlhari; ku tiv̌a ni ku twisisa ŝi huma e noṅwini wa yena. O hlayisela la’v̌o lulama e ku kateka, a v̌a šitlhangu e ka la’v̌a fambaka e ku lulameni. O tiyisa mitila ya la’v̌a fambaka hi fanelo, o hlayisa ndlela ya la’v̌a ṅwi ranḍaka. Hi kona u nga ta tiv̌a ku lulama ni fanelo. Ni ku saseka, ni mikhuv̌a hikwayo ya le’ŝinene.”—Ringanisa Yakobo 4:6.
16. Hikwalaho ka yini ku ri hava vutlhari, ku twisisa, kumbe xitsundzuxo lexi nga fanaka ni xa Yehovha?
16 Ku kombisa leswaku hi titshege hi Yehovha, a hi ringeteni hi ku titsongahata ku twisisa ku rhandza ka yena hi ku hlaya Rito ra yena swinene. U ni vutlhari hi ndlela leyi hetisekeke, naswona ku tsundzuxa ka yena ka pfuna minkarhi hinkwayo. (Esaya 40:13; Varhoma 11:34) Kahle-kahle, xitsundzuxo xin’wana ni xin’wana lexi lwisanaka na yena a xi pfuni nchumu. Swivuriso 21:30 (NW) yi ri: “A ku na vutlhari, ku hava ku twisisa kwihi na kwihi, ku hava ku tsundzuxa kwihi na kwihi loku nga kanetanaka na Yehovha.” (Ringanisa Swivuriso 19:21.) I ku twisisa ka moya ntsena, loku kumiwaka hi ku dyondza Rito ra Xikwembu hi ku pfuniwa hi tibuku leti humesiwaka hi “nandza la tshembekaka, wo tlhariha,” leswi nga hi pfunaka leswaku hi hanya hi ndlela leyi nga yona. (Matewu 24:45-47) Kutani, a hi hanyeni hi ku pfumelelana ni ndzayo ya Yehovha, hi ri karhi hi swi tiva leswaku ku nga khathariseki leswaku xitsundzuxo xin’wana ni xin’wana xi vonaka xi twala ku fikela kwihi, a xi nge fani ni xa Rito ra yena.
17. Ku nga va ni vuyelo byihi loko ko nyikeriwa ndzayo leyi hoxeke?
17 Vakreste lava nga ni ku twisisa, lava nyikelaka ndzayo va swi xiya leswaku yi fanele yi sekeriwa eRitweni ra Xikwembu hilaha ku tiyeke ni leswaku dyondzo ya Bibele ni ku anakanyisisa swa laveka, va nga si hlamula xivutiso. (Swivuriso 15:28) Loko ku hlamuriwa swivutiso swa nkoka hi ndlela leyi hoxeke, ku onhaka ku va kukulu swinene. Hikwalaho, vakulu va Vukreste va lava ku twisisa ka moya naswona va fanele va khongelela nkongomiso wa Yehovha loko va ri karhi va ringeta ku pfuna mupfumeri-kulobye hi tlhelo ra moya.
Vana Ni Ku Twisisa Lokukulu eTimhakeni Ta Moya
18. Loko ku tshuka ku va ni xiphiqo evandlheni, xana ku twisisa ku nga hi pfuna njhani leswaku hi tshama hi ri lava ringaniselaka hi tlhelo ra moya?
18 Leswaku hi tsakisa Yehovha, hi fanele hi “[va ni] ku twisisa etimhakeni hinkwato.” (2 Timotiya 2:7) Ku dyondza Bibele hi ku hiseka ni ku fambisana ni nkongomiso wa moya wa Xikwembu ni nhlengeletano ya xona, swi ta hi pfuna leswaku hi twisisa leswi hi faneleke hi swi endla loko hi langutane ni swiyimo leswi nga endlaka leswaku hi teka goza leri hoxeke. Hi xikombiso, a hi nge nchumu wo karhi evandlheni a wu endliwi hi yona ndlela leyi hi vonaka onge a wu fanele wu endliwa ha yona. Ku twisisa hi tlhelo ra moya ku ta hi endla hi vona leswaku xexo a hi xivangelo xo tshika ku hlanganyela ni vanhu va Yehovha, ni ku lan’wa ku tirhela Xikwembu. Anakanya hi lunghelo leri hi nga na rona ro tirhela Yehovha, ntshunxeko wa moya lowu hi nga na wona, ntsako lowu hi wu kumaka tanihi vahuweleri va Mfumo. Ku twisisa loko swi ta etimhakeni ta moya swi hi pfuna leswaku hi va ni langutelo lerinene ni ku xiya leswaku hi tinyiketele eka Xikwembu, naswona hi fanele hi byi tlangela vuxaka bya hina na xona, ku nga khathariseki leswi van’wana va swi endlaka. Loko ku ri hava lexi hi nga xi endlaka leswaku hi ololoxa xiphiqo xa kona hi ndlela ya Xikwembu, hi fanele hi lehisa mbilu hi rindzela Yehovha leswaku a lulamisa xiyimo. Ematshan’weni yo lan’wa kumbe hi hela matimba, a hi ‘rindzeleni Xikwembu.’—Pisalema 42:5, 11.
19. (a) A wu ri wihi mongo wa xikhongelo xa Pawulo eka Vafilipiya? (b) Ku twisisa ku nga hi pfuna njhani loko hi nga wu twisisi kahle nchumu wo karhi?
19 Ku twisisa hi tlhelo ra moya ku hi endla leswaku hi tshama hi tshembekile eka Xikwembu ni le ka vanhu va xona. Pawulo u byele Vakreste va le Filipi a ku: “Xikhongelo xa mina hi lexi: Ndzi khongela leswaku rirhandzu ra n’wina ri ya mahlweni ri kula masiku hinkwawo, ri va ni vutivi ni ku twisisa loku hetisekeke, mi ta kota ku hlawula leswi nga swinene ku tlula swin’wana; hi mukhuva wolowo, mi ta va lava tengeke, mi nga ha ri na nandzu ku fikela esikwini ra Kriste.” (Vafilipiya 1:9, 10) Leswaku hi anakanya hi ndlela leyinene, hi fanele hi va ni “vutivi ni ku twisisa loku hetisekeke.” Rito ra Xigriki leri laha ri hundzuluxeriweke ri va “ku twisisa” ri vula “ku va ni vuswikoti byo hatla u vona swilo.” Loko hi dyondza nchumu wo karhi, hi lava ku vona ndlela leyi wu khumbaka Xikwembu na Kreste ha yona, ni ku anakanyisisa hi ndlela leyi wu kombisaka ha yona vumunhu bya Yehovha ni malunghiselelo yakwe. Leswi swi engetela ku twisisa ka hina leswi Yehovha Xikwembu na Yesu Kreste va hi endleleke swona. Loko ku ri ni nchumu wo karhi lowu hi nga wu twisisiki kahle, ku twisisa swi ta hi endla hi xiya leswaku a hi fanelanga hi fularhela ripfumelo ra hina ni swilo hinkwaswo leswi hi swi dyondzeke malunghana ni Xikwembu, Kreste ni xikongomelo xa Xikwembu.
20. Hi nga ku kumisa ku yini ku twisisa lokukulu hi tlhelo ra moya?
20 Hi ta kuma ku twisisa lokukulu ka moya, loko nkarhi na nkarhi hi pfumelelanisa mianakanyo ni swiendlo swa hina, ni Rito ra Xikwembu. (2 Vakorinto 13:5) Ku endla leswi hi ndlela leyi akaka, swi hi pfuna leswaku hi titsongahata, hi nga hundzeleti swilo ni ku xopaxopa van’wana. Ku twisisa ku ta hi pfuna leswaku hi vuyeriwa loko hi ololoxiwa, kutani hi tiyiseka hi swilo leswi nga swa nkoka swinene. (Swivuriso 3:7) Kutani, hikwalaho ko navela ku tsakisa Yehovha, a hi tikarhateleni ku va ni vutivi lebyi kongomeke bya Rito ra yena. Leswi swi ta hi pfuna leswaku hi hambanisa leswinene eka leswo biha, hi vona leswi nga swa nkoka hakunene, kutani hi vutshembeki hi namarhela vuxaka bya hina bya risima na Yehovha. Hinkwaswo leswi swa koteka, loko hi tikarhatela ku nyiketa timbilu ta hina eku twisiseni. Kambe, ku ni nchumu wun’wana lowu lavekaka. Hi fanele hi pfumelela ku twisisa ku va xisirhelelo xa hina.
A Wu Ta Hlamurisa Ku Yini?
◻ Hikwalaho ka yini hi fanele hi nyiketa mbilu ya hina eku twisiseni?
◻ Xana ku twisisa ku ma khumba njhani mavulavulelo swin’we ni mahanyelo ya hina?
◻ Xana ku twisisa ku nga va ni vuyelo byihi eka ndlela leyi hi titwaka ha yona?
◻ Hikwalaho ka yini hi fanele hi ya eka Yehovha minkarhi hinkwayo leswaku hi kuma ku twisisa?
[Xifaniso lexi nga eka tluka 13]
Ku twisisa ku hi pfuna leswaku hi lawula ndlela leyi hi titwaka ha yona
[Xifaniso lexi nga eka tluka 15]
Hosi Solomoni loyi a a ri ni ku twisisa u swi vonile leswaku ku va ni swilo swo tala a swi ku tisi ku eneriseka