Ku Twisisa A Ku Ve Xisirhelelo Xa N’wina

“Ku anakanya ku ta ku langutela, ku twisisa ku ta ku hlayisa.”—SWIVURISO 2:11.

1. Xana ku twisisa ku nga hi sirhelela eka yini?

YEHOVHA u lava leswaku u tirhisa ku twisisa. Hikwalaho ka yini? Hikuva wa swi tiva leswaku ku ta ku sirhelela emakhombyeni yo hambana-hambana. Swivuriso 2:10-19 yi sungula hi ku: “Loko v̌utlhari byi ta nghena e mbilwini ya wena, ku tiv̌a ku ta ṭakisa moya wa wena; ku anakanya ku ta ku langutela, ku twisisa ku ta ku hlayisa.” Ku ta ku hlayisa eka yini? Eka swilo swo tanihi le “ndleleni le’yo biha,” eka lava hambukaka etindleleni letinene, ni le ka vanhu lava hi ntolovelo va tekeke ndlela leyi hambukeke.

2. Ku twisisa i yini, naswona i ku twisisa ka muxaka muni loku Vakreste va ku lavaka swinene?

² Kumbexana wa tsundzuka leswaku ku twisisa i vuswikoti bya mianakanyo, lebyi endlaka leswaku yi kota ku hambanisa nchumu wun’wana eka wun’wana. Munhu la nga ni ku twisisa u vona mianakanyo kumbe swilo swo hambana-hambana, naswona u avanyisa hi ndlela leyinene. Leswi hi nga Vakreste, hi lava ku twisisa ka moya loku hlawulekeke, loku sekeriweke eka vutivi lebyi kongomeke bya Rito ra Xikwembu. Loko hi dyondza Matsalwa, swi fana ni loko hi ri karhi hi lava switina swo aka ha swona hi tlhelo ra moya. Leswi hi swi dyondzaka swi nga hi pfuna leswaku hi endla swiboho leswi tsakisaka Yehovha.

3. Hi nga ku kumisiwa ku yini ku twisisa hi tlhelo ra moya?

³ Loko Xikwembu xi vutise Hosi Solomoni wa Israyele leswaku hi wihi nkateko lowu a a wu lava, mufumi loyi lontsongo u te: “Nyika nanḍa wa wena e mbilu ya ku tiv̌a e ku av̌anyisa tiko ra wena, ni ku hlawula le’ŝo saseka e ka le’ŝo biha!” Solomoni u kombele ku twisisa, naswona Yehovha u n’wi nyike kona hi ndlela leyi nga tolovelekangiki. (1 Tihosi 3:9; 4:30) Leswaku hi kuma ku twisisa, hi fanele hi khongela, naswona hi fanele hi dyondza Rito ra Xikwembu hi ku pfuniwa hi tibuku leti nyikaka vutlhari leti humesiwaka hi “nandza la tshembekaka, wo tlhariha.” (Matewu 24:45-47) Leswi swi ta hi pfuna leswaku hi kurisa ku twisisa hi tlhelo ra moya ku fikela loko hi “kula hilaha ku heleleke ematimbeni ya ku twisisa,” hi kota ku “hlawula [kumbe ku twisisa] leswinene eka leswo biha.”—1 Vakorinto 14:20, NW; Vaheveru 5:14.

Xilaveko Lexi Hlawulekeke Xo Twisisa

4. Xana swi vula yini ku va ni tihlo leri ‘tsakeke,’ naswona ri nga hi pfuna njhani?

⁴ Loko hi ri ni ku twisisa loku faneleke, hi nga swi kota ku pfumelelana ni marito ya Yesu Kreste lama nge: “Rhangani mi tilavela Mfumo wa [Xikwembu] ni ku lulama ka [xo]na, kutani sweswo [swilo swa nyama] hinkwaswo mi ta engeteleriwa swona.” (Matewu 6:33) Yesu u tlhele a ku: “Rivoni ra miri wa wena i tihlo; loko tihlo ra wena ri tsakile, miri wa wena hinkwawo wu le ku vonakaleni.” (Luka 11:34) Tihlo i rivoni ro fanekisela. Tihlo leri ‘tsakeke’ ri tshembekile, ri vona kahle. Hi ku va ni tihlo ro tano, hi nga swi kota ku kombisa ku twisisa ni ku famba handle ko khugunyeka emoyeni.

5. Etimhakeni ta bindzu, i yini lexi hi faneleke hi xi tsundzuka malunghana ni xikongomelo xa vandlha ra Vukreste?

⁵ Ematshan’weni yo hlayisa tihlo ri olova, van’wana va tikise vutomi bya vona vini ni vutomi bya van’wana, hi ku va kucetela leswaku va nghenela timhaka ta bindzu. Kambe hi fanele hi tsundzuka leswaku vandlha ra Vukreste i “mhandze leyikulu ni xiseketelo xa leswi nga ntiyiso.” (1 Timotiya 3:15) Kukotisa timhandzi ta muako, vandlha ri seketela ntiyiso wa Xikwembu, ku nga ri ku seketela bindzu ra munhu wo karhi. Mavandlha ya Timbhoni ta Yehovha a ma simekeriwanga leswaku ma va tindhawu to ndlandlamuxa swilaveko swa bindzu, nhundzu kumbe mintirho yin’wana. Hi fanele hi papalata ku endla swilo swa bindzu leswi nga swa munhu hi xiyexe eHolweni ya Mfumo. Ku twisisa ku hi pfuna ku vona leswaku Tiholo ta Mfumo, etindhawini leti ku khomeriwaka eka tona Dyondzo ya Buku ya Vandlha, etinhlengeletanweni swin’we ni le mintsombanweni ya Timbhoni ta Yehovha hi le tindhawini ta minhlangano ya Vukreste ni mabulo ya swa moya. Loko ho tirhisa swilo swa moya leswaku hi kondletela muxaka wun’wana ni wun’wana wa bindzu, xana leswi a swi nge kombisi swona leswaku hi ndlela yo karhi hi kayivela ku tlangela swilo swa moya leswi nga swa nkoka? Swilo leswi yelanaka ni vandlha a swi fanelanga swi tirhiseriwa ku vuyeriwa hi timali.

6. Hikwalaho ka yini swilo swa bindzu ni mintirho yin’wana swi nga fanelanga swi xavisiwa kumbe ku ndhundhuzeriwa eminhlanganweni ya vandlha?

⁶ Van’wana va tirhise ku hlangana ni vanhu va Xikwembu leswaku va kota ku xavisa mirhi, swilo swa ku tixongisa, mirhi leyi nga ni tivhitamini, switirhisiwa swo fana ni tinqingho, nhundzu yo aka, makungu ya swa mapfhumba, minongonoko ni switirho swa khompyuta, ni swin’wana. Hambiswiritano, minhlangano ya vandlha a hi tindhawu to xavisela, kumbe to ndlandlamuxa swilo kumbe mintirho ya bindzu. Hi nga xi twisisa xivangelo-nkulu loko hi tsundzuka leswaku Yesu u “va hlongol[e] va huma hinkwavo eTempeleni, ni tinyimpfu ni tihomu; a hangalasa ni mali ya lava bindzulaka, a wisetela ni matafula ya vona. Kutani a byela lava xavisaka matuva, a ku: ‘Susani swilo leswi la; mi nga teki yindlu ya Tata wa mina, mi yi endla ya ku bindzulela eka yona.’”—Yohane 2:15, 16.

Ku Vuriwa Yini Hi Vuvekisi?

7. Hikwalaho ka yini ku twisisa ni ku tivonela swi laveka etimhakeni ta vuvekisi?

⁷ Ku twisisa ni ku tivonela swa laveka loko u anakanya hi vuvekisi etimhakeni ta bindzu. A hi nge munhu u lava ku lomba mali kutani a endla switshembiso swo tanihi leswi nge: “Ndza ku tiyisekisa leswaku u ta vuyeriwa ngopfu.” “A wu nge lahlekeriwi. Lowu i nchumu lowu ndzi tiyisekaka ha wona.” Tivonele loko munhu a ku nyika switiyisekiso swo tano. Swi nga ha endleka a nga ri na ntiyiso kumbe a nga tshembekanga, hikuva vuvekisi hakanyingi a hi nchumu wo tiyiseka ha wona. Entiyisweni, vanhu va ririmi ro tsokombela, lavo biha va kanganyise swirho swin’wana swa vandlha. Leswi swi hi tsundzuxa hi “vanhu lava nga riki na mhaka ni vukhongeri” lava ngungumeleke va nghena evandlheni ra lembe-xidzana ro sungula kutani va ‘gombonyokisa tintswalo ta Xikwembu leti nga faneriwiki va ti yimelela ha tona emahanyelweni layo biha.’ A va fana ni maribye yo tontswa lama nga ehansi ka mati, lama nga kotaka ku tlhava ni ku dlaya vahlamberi. (Yuda 4, 12, ringanisa NW.) I ntiyiso, swikongomelo swa vakanganyisi swa hambana ni swa vagwinehi, kambe na vona va lava ku kanganyisa swirho swa vandlha.

8. Ku humelele yini hi timhaka tin’wana ta mabindzu leti a ti vonaka ti ri ni vuyelo byo karhi?

⁸ Hambi ku ri Vakreste lava nga ni minsusumeto leyinene va avele van’wana marungula ya tindlela leti vonakaka ti vuyerisa, leswi endleke leswaku vona ni lava landzelaka xikombiso xa vona va lahlekeriwa hi mali leyi va yi vekiseke. Hikwalaho ka sweswo, Vakreste vo hlayanyana va lahlekeriwe hi malunghelo evandlheni. Loko swi kumeka leswaku matshalatshala yo lava ku fuwa hi xihatla i marhengu ya vukanganyisi, mukanganyisi hi yena ntsena la vuyeriwaka, loyi hakanyingi a hatlaka a nyamalala. Xana ku twisisa ku nga n’wi pfunisa ku yini munhu leswaku a papalata swiyimo swo tano?

9. Hikwalaho ka yini ku laveka ku twisisa leswaku u kota ku ringanisela swilo leswi yelanaka ni vuvekisi?

⁹ Ku twisisa swi vula ku kota ku vona swilo leswi tumbeleke. Vuswikoti lebyi bya laveka leswaku u kota ku ringanisa swilo leswi yelanaka ni vuvekisi. Vakreste va tshembana, naswona van’wana va nga ha anakanya leswaku vamakwavo va vona va moya va xinuna ni va xisati a va nge kali va katseka eka swilo leswi nga ta nghenisa rifuwo ra vapfumeri-kulobye ekhombyeni. Kambe loko n’wamabindzu a ri Mukreste a swi vuli swona leswaku u ti tiva ngopfu timhaka ta bindzu, kumbe leswaku bindzu rakwe ri ta humelela.

10. Hikwalaho ka yini Vakreste van’wana va lava ku lomba mali eka vapfumeri-kulobye, naswona i yini leswi nga humelelaka hi vuvekisi byo tano?

¹⁰ Vakreste van’wana va lava ku lomba mali eka vapfumeri-kulobye hi ku tiva leswaku hi ku tirhisa maendlelo lawa yo lomba mali a ku nge laveki ntswalo eka leswi va ringetaka ku swi endla. Vo tala va xisiwile va tshemba leswaku hi ku vekisa mali ya vona, va ta kuma ntswalo wo tala handle ko tirha hi matimba, kumbe ni ku tirha va nga kalanga va tirha. Van’wana va kokiwa hi vuvekisi hikwalaho ka ntswalo lowu byi nga na wona, leswi endlaka leswaku va lahlekeriwa hi leswi va swi vekiseke! Mukreste un’wana u vekise mali yo tala, a langutele ntswalo wa 25 wa tiphesente hi mavhiki mambirhi ntsena. U lahlekeriwe hi mali yoleyo hinkwayo loko ku vuriwe leswaku khamphani yakwe yi lahlekeriwe hi mali. Eka mhaka yin’wana, un’wana loyi a pfuxeteke muako u lombe mali yo tala eka van’wana evandlheni. U tshembise ku va vuyisela ntswalo lowukulu, kambe u chonile kutani a lahlekeriwa hi mali leyi a yi lombeke.

Loko Timhaka Ta Mabindzu Ti Nga Humeleli

11. Hi yihi ndzayo leyi Pawulo a yi nyikeleke malunghana ni makwanga ni ku rhandza mali?

¹¹ Ku tsandzeka ka mabindzu swi vange ku khomiwa hi tingana, ni ku lahlekeriwa hi tlhelo ra moya eka Vakreste van’wana lava katsekeke eka timhaka ta bindzu leti kanakanisaka. Ku ve ni ku tshwukiselana mahlo ni timholovo hikwalaho ko tsandzeka ku pfumelela ku twisisa ku va xisirhelelo. Vo tala va phasiwe hi makwanga. Pawulo u tsarile a ku: “Makwanga ma nga tshuki ma kumbukiwa ni ku kumbukiwa exikarhi ka n’wina, hilaha swi fanelaka vanhu lavo kwetsima hakona.” (Vaefesa 5:3, NW) Nakambe u tsundzuxile a ku: “Lava navelaka rifuwo, va wela endzingweni, emintlhan’wini ya ku navela leswo tala leswi nga pfuniki nchumu, ku nga ku navela loku ku dlayisaka vanhu, ni ku va peta ekhombyeni ni le ku loveni. Hikuva ku rhandza ngopfu mali i rimitsu ra leswo biha hinkwaswo; hi yo mhaka ya ku navela mali ngopfu leyi yi nga hambukisa van’wana, va tshika vupfumeri, kutani timbilu ta vona ti ngheniwa hi mivilelo leyo tala.”—1 Timotiya 6:9, 10.

12. Loko Vakreste va endla bindzu exikarhi ka vona, i yini leswi ngopfu-ngopfu va faneleke va swi tsundzuka?

¹² Loko Mukreste a hlakulela moya wo rhandza mali, u ta tivangela ku vaviseka lokukulu hi tlhelo ra moya. Vafarisi a va ri varhandzi va mali, naswona vo tala va na wona mukhuva lowu emasikwini lawa ya makumu. (Luka 16:14; 2 Timotiya 3:1, 2) Ku hambana ni sweswo, ndlela leyi Mukreste a hanyaka ha yona yi fanele yi “nga fumiwi hi mali.” (Vaheveru 13:5) Kavula, Vakreste va nga swi kota ku endla bindzu ni munhu un’wana kumbe ku sungula mabindzu hi voxe. Hambiswiritano, loko va endla tano, mimbulavurisano ni mabulo ya vona swi fanele swi nga hlangani ni timhaka ta vandlha. Naswona tsundzuka: Hambi ku ri exikarhi ka vamakwerhu va moya, nkarhi hinkwawo endla bindzu hi ntwanano lowu tsariweke ehansi. Lexi pfunaka emhakeni leyi i xihloko lexi nge “Tsalani eHansi!,” lexi kandziyisiweke eka Awake! ya February 8, 1983, matluka 13 ku ya ka 15.

13. U nga yi tirhisa njhani Swivuriso 22:7 etimhakeni ta bindzu?

¹³ Swivuriso 22:7 ya hi byela: “Loyi a lombaka i nhlonga wa l’a ṅwi lombeke.” Hakanyingi a hi vutlhari ku tinghenisa kumbe ku nghenisa makwerhu exiyin’weni xo va hlonga ro tano. Loko munhu a hi kombela leswaku hi n’wi lomba mali yo ringeta ku endla bindzu, ku ta va ku ri vutlharhi ku anakanya leswaku u ta swi kota ku tlherisela mali. Xana u tiviwa a ri ni ntiyiso ni ku tshembeka? Kavula, hi fanele hi swi xiya leswaku ku lomba mali hi ndlela yo tano swi nga ha vula ku lahlekeriwa hi mali hikuva timhaka to tala ta mabindzu a ti humeleli. Ku sayina ntwanano a swi ku tiyisekisi ku humelela ka bindzu. Naswona a hi vutlhari nikatsongo leswaku munhu a nghena ekhombyeni ro lombisa mali yo tala kasi u ta lahlekeriwa.

14. Hikwalaho ka yini hi fanele hi kombisa ku twisisa loko hi lombe Mukreste-kulorhi mali, loyi bindzu rakwe ri tsandzekaka?

¹⁴ Hi fanele hi kombisa ku twisisa loko hi lomba Mukreste mali hi xikongomelo xo lava ku endla bindzu kutani mali ya kona yi lahleka, hambi swi nga endlekanga hi ku pfumala ku tshembeka. Loko ku tsandzeka ka bindzu xi nga ri xihoxo xa yena mupfumeri-kulorhi loyi a lombeke mali, xana hi nga vula leswaku hi dyoheriwile? E-e, hikuva hi n’wi lombe mali hi ku swi rhandza, kumbexana a hi ri karhi hi kuma ntswalo eka yona, naswona ku hava ku pfumala ku tshembeka. Tanihi leswi ku nga riki ni ku pfumala ku tshembeka, a hi na xona xisekelo xa le nawini xo lwisana ni mulombi. Xana swi ta pfuna yini ku mangalela Mukreste-kuloni la tshembekeke, loyi a bohekeke ku tsarisa ximfumo leswaku u chonile, hikwalaho ka leswi bindzu leri a a ri endla hi xikongomelo lexinene ri tsandzekeke?—1 Vakorinto 6:1.

15. Hi tihi timhaka leti faneleke ku anakanyeriwa loko munhu a chona?

¹⁵ Lava tsandzekaka etimhakeni ta bindzu minkarhi yin’wana va lava ku ntshunxeka hi ku vula leswaku va chonile. Tanihi leswi Vakreste va nga swi bakanyeriki etlhelo swikweleti, hambiloko milawu ya timali yi va ntshunxile eka swikweleti swo karhi, van’wana va titwa va boheka ku hakela mali leyi se yi suriweke loko va vone onge lava va va lombeke yona va nga yi amukela hakelo. Kambe, ku vuriwa yini hi loko mulombi a lahlekeriwa hi mali leyi nga ya makwavo, kutani endzhaku ka sweswo a tikuma a dya mafehlefehle? Kumbe ku vuriwa yini hi loko mulombi a kuma mali leyi ringaneleke lerova a nga swi kota ku tlherisela leyi a yi lombeke, kambe a honisa xikweleti lexi a nga vaka a ri na xona eka makwavo? Kutani swi ta kanakanisa loko mulombi a ri ni timfanelo to byarhisiwa vutihlamuleri byo karhi evandlheni.—1 Timotiya 3:3, 8; vona Xihondzo xo Rindza xa September 15, 1994, matluka 30-1.

Ku Vuriwa Yini Hi Loko Ku Ri Ni Vukanganyisi?

16. Hi wahi magoza lawa hi nga ma tekaka loko swi tikomba onge hi kanganyisiwile etimhakeni ta bindzu?

¹⁶ Ku twisisa ku hi pfuna ku vona leswaku ntswalo a wu kumeki eka vuvekisi byin’wana. Kambe, ku vuriwa yini loko ku ri ni vukanganyisi lebyi katsekaka? Vukanganyisi i “ku tirhisa vuxisi, mano, kumbe ku soholota ntiyiso hi vomu hi xikongomelo xo lava ku xisetela munhu un’wana leswaku a tshika nchumu wa yena lowu nga wa nkoka kumbe a tshika mfanelo ya le nawini.” Yesu Kreste u boxe magoza lawa ma nga ha tekiwaka loko munhu a anakanya leswaku u kanganyisiwe hi mugandzeri-kulobye. Hi ku ya hi Matewu 18:15-17 Yesu u te: “Loko makwenu a ku dyoherile, yana u ya n’wi komba ku hoxa ka yena, mi ri vambirhi ntsena; loko a ku yingisa, u ta va u vuyisile makwenu. Kambe loko a nga ku yingisi, teka vanhu vambirhi, kumbe un’we, leswaku mhaka hinkwayo yi tiyisiwa hi milomo ya timbhoni tinharhu, kumbe timbirhi. Loko a ala ku va yingisa, byela nhlengeletano; loko a ala ku yingisa na yona nhlengeletano, eka wena a a kotise muhedeni ni muluvisi.” Xikombiso lexi Yesu a xi nyikeleke endzhakunyana xi kombisa leswaku a a swi anakanya swidyoho swo kota leswi katsaka timhaka ta timali, ku katsa ni vukanganyisi.—Matewu 18:23-35.

17, 18. Loko la tivulaka Mukreste a hi kanganyisa, ku twisisa ku nga hi sirhelela njhani?

¹⁷ Kavula, ku ta va ku ri hava xisekelo xa Matsalwa xo teka magoza lawa ma andlariweke eka Matewu 18:15-17 loko ku ri hava vumbhoni kumbe nchumu wo karhi lowu kombisaka vukanganyisi. Kambe, ku vuriwa yini hi loko loyi a tivulaka Mukreste a hi kanganyisile hakunene? Ku twisisa ku nga hi sirhelela leswaku hi nga teki goza leri nga ha onhaka vito ra vandlha. Pawulo u tsundzuxe Vakreste-kulobye leswaku va fanele va pfumela ku hoxeriwa hambi ku ri ku kanganyisiwa, ematshan’weni yo teka makwavo va n’wi yisa ehubyeni.—1 Vakorinto 6:7.

¹⁸ Vamakwerhu va hina va xinuna ni va xisati va xiviri a va ‘talanga hi ku xisa ni manyala,’ kukotisa mungoma la vuriwaka Bariyesu. (Mintirho 13:6-12) Kutani a hi tirhiseni ku twisisa loko mali yi lahlekile etimhakeni ta bindzu leti katsaka mupfumeri-kulorhi. Loko hi anakanya hi ku teka goza ra le nawini, hi fanele hi anakanya hi vuyelo lebyi nga vaka kona eka hina hi hexe, eka munhu un’wana kumbe vanhu van’wana, evandlheni ni le ka vanhu va le handle. Ku hlongorisa tihakelo swi nga hi dyela nkarhi wo tala, ntamu, ni rifuwo rin’wana. Swi nga ha fumisa maqhwetha ni swidyondzeki swin’wana ntsena. Lexi vavisaka, Vakreste van’wana va tshike malunghelo ya vona ya swa le tilweni hikwalaho ko tikarhata swinene hi swilo leswi. Ku kuceteriwa ka hina hi ndlela yo tano, swi tsakisa Sathana, kambe hi lava ku tsakisa mbilu ya Yehovha. (Swivuriso 27:11) Hi hala tlhelo, ku amukela ku lahlekeriwa swi nga hi pfuna leswaku hi papalata ku tshwukiselana mahlo, naswona hi nga hlayisa nkarhi wa hina wo tala ni wa vakulu. Swi ta hi pfuna ku hlayisa ku rhula ka vandlha naswona swi ta hi pfuna leswaku hi ya emahlweni hi lava Mfumo ku sungula.

Ku Twisisa Ni Ku Endla Swiboho

19. Xana ku twisisa hi tlhelo ra moya swin’we ni xikhongelo swi nga hi pfuna njhani loko hi ri karhi hi endla swiboho swo nonon’hwa?

¹⁹ Ku endla swiboho etimhakeni leti khumbaka timali kumbe bindzu ku nga va mhaka yo tika. Kambe ku twisisa ka moya ku nga hi pfuna leswaku hi kambisisa timhaka hi ndlela leyi ringaniseriweke kutani hi endla swiboho swa vutlhari. Ku tlula kwalaho, ku titshega hi Yehovha hi xikhongelo swi nga hi nyika “ku rhula ka Xikwembu.” (Vafilipiya 4:6, 7) I ntsako ni ku rhula loku kumiwaka hi ku va ni vuxaka bya le kusuhi na Yehovha. Entiyisweni, ku rhula ko tano ku nga hi pfuna leswaku hi kota ku ringanisela loko hi fanele ku endla swiboho swo nonon’hwa.

20. Xana hi fanele hi tiyimisela ku endla yini malunghana ni timhaka ta bindzu ni ta vandlha?

²⁰ Onge hi nga tiyimisela ku ka hi nga pfumeleli timhaka ta bindzu ti kavanyeta ku rhula ka hina kumbe ka vandlha. Hi fanele hi tsundzuka leswaku vandlha ra Vukreste ri tirha ku hi pfuna hi tlhelo ra moya, a hi ndhawu yo fambisela timhaka ta bindzu. Timhaka ta bindzu ti fanele minkarhi hinkwayo ti nga hlangani ni mintirho ya vandlha. Hi fanele hi tirhisa ku twisisa ni ku tivonela loko hi lava ku nghenela timhaka ta bindzu. Naswona minkarhi hinkwayo a hi hlayiseni langutelo ra hina leri ringaniseriweke etimhakeni to tano, hi rhangisa swilaveko swa Mfumo emahlweni. Loko bindzu leri katsaka mugandzeri-kulorhi ri tsandzeka, onge hinkwavo lava katsekaka hi nga va endlela leswinene.

21. Xana hi nga ku tirhisa njhani ku twisisa ni ku endla hi ku pfumelelana na Vafilipiya 1:9-11?

²¹ Ematshan’weni yo karhateka ngopfu hi timali ni swilo swin’wana leswi nga nyawuriki, onge hinkwerhu ka hina hi nga nyiketela timbilu ta hina eku twisiseni, hi khongelela nkongomiso wa Xikwembu, kutani hi rhangisa swilaveko swa Mfumo emahlweni. Hi ku pfumelelana ni xikhongelo xa Pawulo, ‘onge rirhandzu ra hina ri nga kula hi vutivi lebyi kongomeke ni ku twisisa leswaku hi ta kota ku tiyiseka hi swilo leswi nga swa nkoka swinene leswaku hi nga khunguvanyisi van’wana’ kumbe hina vini. Tanihi leswi sweswi Kreste Hosi a nga exiluvelweni xa yena etilweni, a hi kombiseni ku twisisa hi tlhelo ra moya eswilweni hinkwaswo. Naswona ‘a hi taleni hi mihandzu ya leswo lulama ha Kreste Yesu, leswaku Xikwembu xa hina xi dzunisiwa ni ku twarisiwa ha swona,’ ku nga Yehovha Hosi Leyikulu. (Xiitaliki i xerhu.)—Vafilipiya 1:9-11.

A Wu Ta Hlamurisa Ku Yini?

◻ Ku twisisa i yini?

◻ Hikwalaho ka yini ku ri ni xilaveko lexi hlawulekeke xo kombisa ku twisisa malunghana ni timhaka ta bindzu exikarhi ka Vakreste?

◻ Xana ku twisisa ku nga hi pfuna njhani loko hi vona onge mupfumeri-kulorhi u hi kanganyisile?

◻ Hi xihi xiphemu lexi ku twisisa ku nga vaka na xona eku endleni ka swiboho?

[Xifaniso lexi nga eka tluka 18]

Ku twisisa ku ta hi pfuna leswaku hi tirhisa ndzayo ya Yesu yo hambeta hi lava Mfumo ku sungula

[Swifaniso leswi nga eka tluka 20]

Nkarhi hinkwawo sayinani ntwanano wa bindzu ehansi