Maendzo Yo Vuyela Lama Olovaka, Lama Humelelaka

 ¹ Xana u tshama u ri karhi u endla maendzo yo vuyela, kumbexana u swi kuma swi nonon’hwa hi ku va u nga tivi leswaku u ta vula yini? A wu fanelanga ku titwa u chava. Swilo swinharhu swi ta ku pfuna leswaku u humelela: (1) ku lunghiselela kahle; (2) vuswikoti byo hlamusela yinhla yin’we kumbe timbirhi ta tinhloko-mhaka ti nga ri tingani ta Bibele; ni (3) ku tiyimisela ku twa mavonelo ya n’wini wa muti.

 ² Loko u lunghiselela ku endla riendzo ro vuyela, ehleketa hi tinhloko-mhaka leti faneleke ta ku bula ha tona ni n’wini wa muti. Xana yena i xichudeni? Swichudeni swo tala swi rhandza ku tivekela nkarhi wo bula hi tinhloko-mhaka ta Bibele loko swi wisile eka tidyondzo ta swona. U nga ha va kuma lava lavaka rungula ra Mfumo. Xana u xi tlakusile xivutiso eku heleni ka riendzo ra wena ra nkarhi lowu hundzeke, kumbe xana n’wini wa muti u tsakele mhaka yo karhi? Kamba leswi u swi tsaleke, ivi u tirhisa buku leyi nge Reasoning leswaku u kuma rungula leri u nga ta ri lava leswaku u endla riendzo ro vuyela leri humelelaka. Loko u endza, vana ni rirhandzu ni vunghana. Pfuxela n’wini wa muti hi vito rakwe.

 ³ Loko u fambise Xihondzo xo Rindza ni Xalamuka! eka n’wini wa muti, riendzo ra wena ro vuyela u nga ri sekela eka yinhla yin’we kumbe timbirhi leti u ti hlawuleke eka magazini. Loko u fambisa xiphephana eka riendzo ro sungula, u nga ha hlamusela xiphephana kumbe u engetela hi ku kombetela eka yinhla leyi faneleke leyi nga eka magazini kumbe broxara.

 ⁴ Loko u fambise xiphephana lexi nge “Vutomi eMisaveni Leyintshwa Ya Ku Rhula,” u nga ha ku:

◼ “Nkarhi lowu hundzeke loko ndzi endza, hi vulavule hi ta xitshembiso xa Xikwembu xa misava leyintshwa ya ku rhula. Hi laha hi nga bula ha kona, swiyimo swo antswa swi ta tisiwa hi Mfumo wa Xikwembu. Xana u ehleketa leswaku hi fanele hi endla yini leswaku hi ta va xiphemu xa misava leyintshwa ya ku rhula?” Yimela n’wini wa muti a hlamula, kutani u avelana na yena yinhla leyi nga eka Pisalema 37:​9, 11, 29.

 ⁵ Loko u fambise lexi nge “Hi Wihi Ntshembo Wa Varhandziwa Lava Feke?,” marito lawa yo koma ma nga sungula bulo:

◼ “Eku heleni ka bulo ra hina ra nkarhi lowu hundzeke, ndzi ku siyele xiphephana lexi nge Hi Wihi Ntshembo Wa Varhandziwa Lava Feke? Ndzimana ya vunharhu yi tlakusa swivutiso leswi tsakisaka: ‘Ha yini vanhu va fa? Vafi va kwihi? Naswona hi nga tiyisekisa ku yini leswaku va nga tlhela va hanya?’ Xihlokwana lexi landzelaka lexi nge ‘Rifu, Ni Leswi Humelelaka Loko Hi Fa,’ xi hlamula xivutiso xin’wana ni xin’wana. Ndzi ni xiphephana xin’wana laha. Vona leswi xi swi vulaka eka ndzimana ya vumune.” Kutani loko n’wini wa muti a landzelela, hlaya ndzimana, u katsa ni matsalwa mambirhi, ivi u kombela mavonelo ya n’wini wa muti. Rhiya ndleve eka leswi a swi vulaka, ivi u n’wi landzelela hi ndlela ya kona.

 ⁶ Eka bulo leri, n’wini wa muti a nga ha boxa mavonelo yo hambana-hambana lama nga kongomangiki. A swi bohi leswaku mi kanerisana hi xin’wana ni xin’wana lexi a xi vulaka. Ematshan’wini ya sweswo tshama emhakeni leyi mi bulaka ha yona. Mianakanyo yihi na yihi leyi nga riki ya matsalwa, leyi a nga vaka na yona, yi nga lulamisiwa eka maendzo ya nkarhi lowu taka.

 ⁷ Hi tindlela hinkwato, kunguhata ku landzelela ku tsakela kwihi na kwihi hi ku endla maendzo yo vuyela lama olovaka, lama humelelaka hi April.