Tirhisa Buku Leyi Nge Reasoning Eka Maendzo Yo Vuyela
1 “Mina ndzi byarile, Apolosi ú cheletile.” Sweswo swi vuriwe hi muapostola Pawulo. (1 Vakor. 3:6) Marito lawa ya tsevu ma nyikela nkatsakanyo wo olova wa magoza yo sungula yo endla vadyondzisiwa. Ntirho wa riendzo ro vuyela hakanyingi wu vuriwa ntirho wo ‘cheleta.’ I buloho ra nkoka exikarhi ka riendzo ro sungula ni leswaku munhu a va mudyondzisiwa la khuvuriweke. Ntirho wa riendzo ro vuyela wu hi pfuna ku ‘nghenisa vutivi’ byo khathalela mbewu ya ku tsakela loku kombisiweke ku kondza yi dzima timitsu kutani hi sungula dyondzo ya Bibele.—Swiv. 15:7.
2 Van’wana va nga ha loloha ku vuyela laha ku tsakela ku kombisiweke kona hi ku ka va nga tiyiseki hi leswi va nga ta swi vula. Buku ya hina leyi khomekaka leyi nge Reasoning From the Scriptures yi tikombe yi pfuna swinene loko hi ya eku cheleteni ka muxaka lowu. Hakanyingi loko n’wini wa muti a nga si yi amukela dyondzo ya Bibele ya nkarhi na nkarhi leyi hleriweke, hi fanele ku endla maendzo yo koma yo hlayanyana. Buku leyi nge Reasoning yi nyikela nxaxamelo wa swihloko swa Matsalwa leswi ku nga buriwaka ni n’wini wa muti ha swona. Lunghiselela riendzo ro vuyela hi ndlela leyinene, kumbexana u tirhisa xin’we kumbe swimbirhi swa swiringanyeto leswi landzelaka.
3 Loko u fambise kopi ya “Xihondzo xo Rindza” xa April 15, 1992 lexi nga ni mhaka ya xikhongelo, u nga tlakusa xivutiso lexi loko u vuyela:
◼ “I yini lexi nga endlaka xikhongelo xa munhu xi nga amukeleki eka Xikwembu?” Endzhaku ko nyika n’wini wa muti nkarhi wo hlamula, humesa buku ya wena leyi nge Reasoning ivi u pfula eka tluka 293. Bula na yena hi matsalwa yo karhi lama nga exihlokweni xexo, u n’wi khutaza ku ma hlaya ebukwini hi ku kongoma. Nyikela xikhokhelo, kumbe timagazini timbirhi loko nyiko yi ariwa.
4 Eka riendzo rin’wana ro vuyela, endzhaku ko vutisa n’wini wa muti leswaku Mfumo wa Xikwembu u wu twisisa wu ri yini, hi laha ku vulavuriwaka ha wona eXikhongelweni xa Hosi, pfula matluka 226-32. Loko nkarhi wu pfumela, ndlandlamuxa matsalwa wolawo ehansi ka “Is God’s Kingdom a Real Government?” na “What Will God’s Kingdom Accomplish?” Dlaya mianakanyo leyi hoxeke leyi toloveriweke ya leswaku Mfumo wu le mbilwini ya munhu. Mfumo i hulumendhe ya xiviri! Ematshan’wini yo hlanganisa mhaka hinkwayo hi nkarhi wun’we, tlakusa swivutiso swin’wana leswi mi nga ta bula ha swona enkarhini lowu taka.
5 Nkarhi wun’wana, n’wini wa muti a nga teka kopi ya Awake! ya April 22, 1992 leyi nge “Life—What Is Its Purpose?”
U nga vutisa:
◼ “Xana ku ni vumbhoni byo karhi bya leswaku miri wa munhu a a wu vumberiwe ku hanya hi masiku emisaveni?” Kumbe, “Xana u anakanya leswaku vafi va swi tiva leswi endliwaka hi lava hanyaka?” Swivutiso leswi swi nga pfuxa ku tsakela ko karhi eka n’wini wa muti hikuva swi khumba yena hi yexe. Endla malunghiselelo yo tlhela u vuya ni tinhlamulo ta kona, hi laha ti kumekaka ha kona ebukwini leyi nge Reasoning eka matluka 247 na 100, hi ku landzelelana ka wona.
6 Loko bulo ro sungula a ri khumba vumundzuku bya misava, u nga vutisa:
◼ “Xana vanhu va nga pfumeleriwa hi Xikwembu leswaku va onha misava hi ndlela yo karhi?” Kutani pfula eka matluka 44-5 ya buku leyi nge Reasoning ivi u hlamusela nhlamulo ya Matsalwa. Kumbe n’wini wa muti a nga vutisa a ku: “Loko tibiliyoni ti pfuxiwa eku feni, ti ta hanya kwihi hinkwato?” Nhlamulo yi nga kumiwa ebukwini leyi nge Reasoning, tluka 340.
7 Ringeta leswaku u nga fumbi n’wini wa muti hi ntiyiso hinkwawo nkarhi wun’we. Siya swivutiso swin’wana leswaku swi hlamuriwa eka maendzo lama landzelaka. Tanihi vatirhi-kulobye va Xikwembu, hi lava ku byala ni ku cheleta hi vutshila, hi ku tirhisa buku leyi nge Reasoning hi laha ku humelelaka. Hi nga tiyiseka leswaku Xikwembu xi ta swi mirisa.