Maendzo Yo Sungula Lama Humelelaka

¹ Ku sungula mabulo evutirhelini swi nga ha nonon’hwa swinene tanihi leswi vanhu va khomekeke ngopfu hi timhaka ta vona kumbe hi leswi va nga ni mianakanyo leyi tiyeke hi vukhongeri. I yini leswi hi nga swi ehleketaka leswaku swi hi pfuna ku endla riendzo ra hina ro sungula ri humelela?

² Tanihi leswi lowu ku nga nkarhi lowu ha wona vanhu vo tala va anakanyaka hi Yesu, u nga sungula bulo ra wena hi ku vula u ku:

◼ “Enkarhini lowu wa lembe, gandzelo ra Yesu ri le mianakanyweni ya hina hakunene. Xana u ehleketa leswaku Yesu u endla yini sweswi?” Yimela nhlamulo. Kutani u nga ha hlanganyela swin’we ni n’wini wa muti eka tsalwa ra Nhlavutelo 6:2, leri hlamuselaka Yesu tanihi la tshameke ehenhla ka hanci yo basa naswona u ya emahlweni a ya hetisa ku hlula kakwe. Hlamusela xiphemu xakwe xa vuhosi ni mimpfuno leyi nga heriki leyi vulawuri byakwe byi nga ta yi tisela vanhu hinkwavo lava yingisaka.

³ Loko u fambisa nkandziyiso wa April 1 lowu nga ni xihloko lexi nge “Ntshunxeko Wa Ntiyiso—Wu Huma Eka Xihlovo Xihi?,” u nga ku:

◼ “Vanhu emisaveni hinkwayo va lwela ntshunxeko. Kambe switshembiso swa ntshunxeko swa tihulumendhe ta vanhu swi tsandzekile ku hetiseka. Vugandzeri bya Yehova, Xikwembu xa ntiyiso, byi tisa ntshunxeko lowu nga heriki.” Hlaya 2 Vakorinto 3:17, ivi u kombisa leswaku nkandziyiso lowu wa Xihondzo xo Rindza wu kandziyisa xitshembiso xa Xikwembu naswona wu kombisa mhaka leyi ha yona swiendlakalo swa misava swi tiyisekisaka leswaku ntshunxeko wa hina wu tshinele.

⁴ U nga tivisa “Xihondzo xo Rindza” xa April 15, 1992, hi ku kandziyisa mhaka ya xikhongelo, u ku:

◼ “Vanhu hi ntolovelo va khongelela ku hlula emikarhini ya nyimpi. Xana u anakanya leswaku Xikwembu xa swi twa swikhongelo swo tano ivi xi pfuneta? [Yimela nhlamulo.] Xiya nhlamulo ya Bibele.” Kutani, hlaya u tlhela u hlamusela 1 Petro 3:12. Endzhaku ka nhlamuselo yo koma, kombetela eka xin’wana lexi nga eka xihloko xa Xihondzo xo Rindza lexi xi nga ha pfuxaka ku tsakela ka munhu yoloye leswaku a hlaya magazini. Nyikela xikhokhelo.

⁵ Tsundzuka leswaku pakani ya hina i ku fambisa tidyondzo ta Bibele. Tanihi leswi vo tala va nga ta phayona nkarhinyana hi April, hi ta va ni nkarhi wo tala wo kuma vanhu lava tsakelaka ku dyondza Bibele. Kambe hambi loko swiyimo swa hina swi nga hi pfumeleli ku phayona hi April, hinkwerhu hi nga tivekela pakani yo sungula dyondzo ya Bibele.

⁶ Vahuweleri van’wana va tirhise swiphephana ku sungula tidyondzo ta Bibele eriendzweni ro sungula.

Loko u fambisa xiphephana lexi nge “Vutomi eMisaveni Leyintshwa Ya Ku Rhula,” u nga ha ku:

◼ “Hina hi vatirhi vo tirhandzela lava tshamaka ekusuhi na wena. Yimanyana ndzi ku nyika xiphephana lexi, lexi hlamuselaka xivumbeko xa ntirho wa hina. Xana u ehleketa leswaku misava yi nga languteka hi ndlela yoleyo?” Endzhaku ko kuma nhlamulo, u nga burisana ni munhu yoloye hi tindzimana ti nga ri tingani to sungula, u kandziyisa Matewu 6:9, 10 na Psalma 37:29.

⁷ Anakanyisisa hi vukheta mayelana ni ndlela leyi u nga ta titivisa ha yona. Swiringanyeto leswinene swa nyikeriwa ebukwini leyi nge Reasoning eka matluka 9-15. Ku tirhisa swingheniso leswi hi vutshila swi ta pfuna ku endla maendzo ya wena yo sungula ma humelela.