Ku Vuyela U Ya Pfuxa Ku Tsakela
1 Maendzo yo vuyela lama nga ni xikongomelo ma hambeta ma kurisa ni ku engetela nhluvuko wa n’wini wa muti leswaku a va mupfumeri. Xana hi swihi swiringanyeto swin’wana leswi tirhaka leswi hi faneleke hi swi tsundzuka loko hi vuyela eka lava va kombiseke ku tsakela?
2 Xo sungula, lunghiselela kahle. Leswi swi sungula eriendzweni ro sungula. Hi ndlela yihi? Hi ku hlayisa tirhekhodo leti kongomeke ta ku tsakela loku kombisiweke. Tsala vito ra n’wini wa muti, mhaka leyi mi vulavuleke ha yona, ndlela leyi a anguleke ha yona ni xin’wana ni xin’wana lexi u xi fambiseke. Kutani pfuxeta rhekhodo ya wena ya yindlu na yindlu u nga si vuyela, naswona u anakanyela leswi u nga ta swi vula hi xikhongelo.
3 Sweswi u lunghekile. Xana u nga ku yini? Loko u siye n’wini wa muti ni xivutiso eriendzweni ra wena ro sungula, xisweswo u nga ha yisa mhaka yoleyo emahlweni loko u vuyela. Hi xikombiso, loko riendzo ra wena ro sungula, a ri titshege hi mikateko ya Mfumo wa Xikwembu, u nga ha vutisa xivutiso, “Hikwalaho ka yini Xikwembu xi pfumelele vubihi?”
Loko u vuyela, endzhaku ka loko u titivisile, u nga ha ku:
◼ “Enkarhini lowu hundzeke loko hi vulavula, hi bule hi leswaku ha yini Xikwembu xa rirhandzu xi pfumelele vubihi byo tarisa xileswi namuntlha. Xana u ehleketisise ha swona? [Yimela nhlamulo.] Xana u ehleketa leswaku hakunene Xikwembu xa va khathalela vanhu? [Yimela nhlamulo.] Xiya leswi Bibele yi swi vulaka eka Yohane 3:16.” Endzhaku ko hlaya tsalwa, u nga ha n’wi komba mhaka yo karhi eka ndzima 8 ebukwini leyi nge Ntiyiso Lowu Yisaka eVuton’wini Lebyi Nga Heriki, leyi kombisaka xivangelo lexi endleke leswaku Xikwembu xi pfumelela vubihi.
4 Xivutiso xin’wana lexi pfuxaka ku tsakela lexi u nga xi vutisaka hi lexi: “Loko Xikwembu a xi lava leswaku vanhu va hanya hi laha ku nga heriki, ha yini vanhu va dyuhala ni ku fa?” Loko u vuyela, u nga ha va komba nhlamulo ya Bibele leyi kumekaka eka Varhoma 5:12. Endzhaku ko hlaya tsalwa, kombetela eka ndzimana yo sungula eka tluka 35 ra buku leyi nge, Xana Vutomi Lebyi Byo Va Na Sweswi Ntsena?, leyi hlamuselaka xivangelo-nkulu lexi endlaka munhu a dyuhala ni ku fa.
5 Loko eka riendzo ra wena ro sungula u vulavule hi ntshembo wa vutomi lebyi nga heriki emisaveni leyi basisiweke naswona u siye buku leyi nge Ntiyiso Lowu Yisaka eVuton’wini Lebyi Nga Heriki, xivutiso lexi u nga seketelaka riendzo ra wena ro vuyela eka xona xi nga ha va lexi: “Xana hi fanele hi endla yini leswaku hi fanelekela ku hanya hi laha ku nga heriki?” Loko u vuyela, u nga ha vulavula hi tinhla to karhi eka tindzimana 11 na 12 ta ndzima 1 ya buku leyi.
6 Leswi u faneleke u swi tsundzuka. Xiya swivutiso leswi u swi vutisaka loko u vuyela. Ku vutisa hi ndlela leyi, “Xana u yi hlayile mhaka leyi ndzi ku siyeleke yona?” kumbe “Xana wa ha ndzi tsundzuka?” kumbe “Xana wa swi tsundzuka leswi hi vulavuleke ha swona enkarhini lowu hundzeke loko ndzi ri laha?” hakanyingi swi veka n’wini wa muti eka xiyimo xo nonon’hwa. Hakanyingi swivutiso swo tano a swi na vuyelo lebyinene. Hi tlhelo rin’wana, vana ni xinghana, u ehleketelela naswona u komisa. Timfanelo leti ti ta endla leswaku rungula leri ri tsakisa.
7 Manghenelo lawa ni man’wana ma nga ha tirhisiwa ku hlakulela ku tsakela etimbilwini ta lava tsakelaka. Ha yini u nga tivekeli pakani yo endla riendzo ro vuyela, hambi ko va rin’we vhiki rin’wana ni rin’wana? Tirhisa swiringanyeto leswi tirhaka leswi kombisiweke laha henhla, naswona u lava vahuweleri lava nga ni ntokoto lava nga ta ku pfuna. Ntsako wa wena wu ta engeteleka loko u aka ku tsakela ko sungula hi ku endla maendzo yo vuyela lama humelelaka.