Tlhelela Hi Ntsako U Ya Pfuna Lava Tsakelaka
1 Un’wana ni un’wana la hlanganyelaka entirhweni wa yindlu na yindlu u navela ku pfuna vanhu lava tsakelaka. Hi ku pfuna hi ndlela yoleyo, hi kuma ntsako ni ku eneriseka lokukulu. (Ringanisa Pisalema 126:5, 6.) Leswi swi lava leswaku hi lungheka.
2 Ku lunghiselela ku sungula hi ku hlayisa rungula leri anameke eka rhekhodo ya hina ya yindlu na yindlu. Xiya mhaka leyi hlamuseriwaka eka riendzo ro sungula ni mahlamulelo ya n’wini wa muti. Nakambe u nga ha tsala ndlela leyi u nga ta sungula ha yona bulo loko u vuya.
3 Hi xikombiso, loko u vulavule hi Xikhongelo xa Hosi eku sunguleni ivi u fambisa broxara leyi nge “Hulumendhe,” u nga vula swo fana ni leswi hi ku komisa:
◼ “Eka riendzo ra mina leri hundzeke, hi bule hi ndlela leyi ku rhandza ka Xikwembu ku nga ta endliwa ha yona emisaveni ni leswakku ku rhula ku ta va kona eka swiphemu hinkwaswo swa vutomi. Eka broxara leyi ndzi yi siyeke, ndzi kombela u twa leswi yi swi vulaka eka tluka 29 malunghana ni mikateko yin’wana leyi Mfumo wa Xikwembu wu nga ta yi tisela vanhu.”
4 Loko munhu wa kona a a kombise ku ka a nga pfumeli eka Xikwembu, vula swo fana ni leswi:
◼ “Enkarhini lowu hundzeke loko ndzi endzile, a hi bula hi yinhla leyi vuriweke hi Pawulo eka Vaheveru 3:4, a nyika swivangelo leswi twisisekaka swa leswaku ku fanele ku ri ni Mutumbuluxi wa swilo hinkwaswo, wa vutlharhi.” Tlhela u hlaya tsalwa ivi u pfula eka matluka 4 ku ya ka 9 ya broxara leyi nge Xana Xikwembu Xa Hi Khathalela Hakunene?, u sungula lomu rungula ra wena ro rhanga ri gimeteke kona. Vutisa xivutiso ivi u hlaya ndzimana, u pfumelela n’wini wa muti a hlamula xivutiso. Loko swi koteka, n’wi kombele leswaku a teka broxara ya yena kutani mi kambisisa mhaka leyi swin’we.
5 Loko n’wini wa muti a a tikomba a enerisekile hi swilo leswi vonakaka kumbe hi ndlela yin’wana, eka riendzo ra wena ro sungula, u nga ha tlhela u hlamusela xiphephana lexi nge Xana Misava Leyi Yi Ta Pona? kutani u hlaya leswi tsariweke eka tluka 6. Vutisa n’wini wa muti loko a swi tsakela ku hanya eparadeyisini yo saseka la misaveni. Leswaku u kota ku vona ku tsakela ka yena hi laha ku engetelekeke, u nga ha n’wi kombela leswaku a hlamusela xifaniso kumbe marito lama khutazaka eka magazini leyi mi yi tirhisaka.
6 Ku tshinelela loku fanaka ka xisekelo ku nga tirhisiwa swin’we ni xihloko lexi kumbexana ma ha ku bulaka ha xona eka Xihondzo xo Rindza kumbe Xalamuka! Kombetela eka xihloko lexi u vulavuleke ha xona eka riendzo ra wena ro sungula kutani u boxa yinhla yin’wana leyi tsakisaka eka xihloko lexi fanaka kumbe eka nkandziyiso wun’wana lowu u nga na wona. Loko swi koteka, hlayani tsalwa swin’we ivi u kombela tinhlamuselo ta n’wini wa muti.
7 Hi fanele hi nga kanakani hi nyiko ya xikhokhelo hi May. Ha yini hi nga khutazi vanhu eka mitila ya hina ya timagazini leswaku va endla xikhokhelo xa timagazini? Lomu vanhu va kombeke ku tsakela ntiyiso kumbe va tekeke buku enkarhini lowu hundzeke, na vona va khutaze leswaku va endla xikhokhelo.
8 Tsundzuka pakani ya wena ya ku sungula dyondzo ya Bibele. Nkarhi wun’wana swi lava maendzo yo talanyana leswaku u pfuxa ku tsakela ku ya fika eka dyondzo. Komba ku khathalela ka wena n’wini wa muti hi ku tlhelela hi ku hatlisa hi laha swi kotekaka ha kona.
9 Mahungu lamanene lawa hi ma twarisaka ma tisa ntsako lowukulu. (Lk. 2:10) Loko vanhu lava tsakelaka va amukela matshalatshala ya hina, swi hi nyika ntsako hakunene. (Flp. 4:1) A hi kumeni ntsako wolowo hi ku tlhelela hi ya pfuna lava tsakelaka lava hi va kumaka ensin’wini.