Ku Hlanganyela Hi Laha Ku Humelelaka eVutirhelini Bya Hina Lebyi Ponisaka Vutomi
1 Muapostola Pawulo u hundzule rungula rakwe ra mahungu lamanene leswaku “hi tindlela hinkwato [a] kota ku ponisa van’wana.” (1 Kor. 9:19-23) Hi ku fanana, hi ta humelela swinene evutirhelini bya hina loko hi xalamukela ku vona swilo leswi tsakeriwaka hi n’wini wa muti ivi hi tilulamisela ku hundzula bulo ra hina ri fambisana ni swilaveko swa yena. Leswi a swi nge nonon’hwi loko hi fambisa Xihondzo xo Rindza kumbe Xalamuka! kumbe yin’wana ya tibroxara ta hina.
2 Endzhaku ko titivisa, hi marito ya wena u nga ha rhanga u vula leswi:
◼ “Vanhu vo tala va hela matimba hikwalaho ka leswi tihulumendhe ti vonakaka ti nga swi koti ku endla swiyimo leswinene eka swiphiqo swa nkarhi wa hina. Van’wana va sola ni tihulumendhe hi swiphiqo swa vona. Xana u ehleketa leswaku yi nga va kona hulumendhe leyi kotaka ku khathalela swilaveko swa hina? [Yimela nhlamulo.] Xana wa swi tiva leswaku hi ni xitshembiso lexi tiyeke xa hulumendhe leyi yi nga herisaka swiphiqo leswi hi langutaneke na swona?” Yingiserisisa nhlamulo ya n’wini wa muti. Hi ku ya hi leswi a swi vulaka, lunghekela ku tirhisa rin’wana ra marungula yo hambana-hambana.
3 Loko tinhlamuselo ta n’wini wa muti ti komba leswaku u tivula Mukreste, kutani hi nga vutisa loko a xi endla xikhongelo xa “Tata Wa Hina,” kumbe Xikhongelo Xa Hosi. Loko a pfumela, hi nga vula xikhongelo lexi xa xikombiso ku fikela laha xi nge, “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.” (Mt. 6:9, 10) Leswi swi komba leswaku siku rin’wana ku rhandza ka Yehovha ku ta endliwa la misaveni. Kutani hi nga hlamusela xihloko lexi faneleke eka Xihondzo xo Rindza kumbe Xalamuka! kumbe eka broxara leyi ndlandlamuxaka mhaka leyi, tanihi tluka 3 ra Hulumendhe Leyi Nga Ta Tisa Paradeyisi.
4 Loko n’wini wa muti a vonaka a nga pfumeli eka Xikwembu, u nga hlaya eka Vaheveru 3:4 kutani u pfula eka tluka 4 ra broxara leyi nge Xana Xikwembu Xa Hi Khathalela Hakunene? U hlaya tindzimana 1 na 2 ivi u vutisa xivutiso lexi nga ehansi ka tluka. Kumbe u nga hlanganisa mhaka leyi fanelaka leyi humaka eka magazini wa sweswinyana.
5 Loko n’wini wa muti a vonaka a eneriseka hi vutomi bya yena, u nga vutisa xivutiso lexi:
◼ “Ha yini hi fanele hi kambisisa leswi Bibele yi swi vulaka hi vumundzuku bya hulumendhe?” Kutani hi nga tirhisa rungula leri kumekaka ebukwini leyi nge Reasoning matluka 154 na 155, hi ku komisa boxa xivangelo xin’we kumbe ku tlula, xa swivangelo swa nhungu leswi nyikiweke. Loko n’wini wa muti a komba ku tsakela, tirhisa xiphephana lexi nge Xana Misava Leyi Yi Ta Pona?, ku sukela eka ndzimana leyi nga eka tluka 2, u yisa bulo emahlweni.
6 Riendzo ra wena ro sungula a ri nge humeleli hi ku helela loko u nga endli n’wini wa muti a tsakela riendzo rin’wana. Hikwalaho, tiyiseka leswaku u vutisa xivutiso lexi tsakisaka ivi u tshembisa ku xi hlamula loko u vuya.
7 Emhakeni leyi nga la henhla, hlawula leyi yi ku olovelaka ku yi vula. Lulamisa swiringanyeto leswi leswaku swi fanela nsimu ya ka n’wina. Tolovelana ni tibroxara, swiphephana ni swihloko swa timagazini leswi u nga ta swi tirhisa leswaku u hatlisa u hundzula bulo ra wena ri fanela swilaveko swa n’wini wa muti. Onge hinkwerhu hi nga lunghiselela marungula ya hina hi ku hiseka “hikwalaho ka Mahungu Lamanene” kutani hi hlanganyela hi laha ku humelelaka evutirhelini lebyi byi ponisaka vutomi.—1 Kor. 9:23.