A Hi “Ngheneni eMhakeni!”
1 Xana n’wini wa muti u tshame a ku nghena enon’wini loko u vula xingheniso xa wena lexinene, a ku: “U lava yini? Nghena emhakeni!” Xana ntokoto wo tano wu hi dyondzisa yini?
2 Namuntlha vanhu vo tala a va swi koti ku lehisa mbilu. Va lava ku tiva leswaku hi vamani naswona hi lava yini. Loko va xiya leswaku hi lava ku burisana na vona hi Bibele, va nga ha ala ku hi yingisela. Ku hlaya Bibele ni ku bula hi swilo swa moya a hi nchumu wa nkoka eka vanhu vo tala. Hi nga va khorwisa njhani vini va miti leswaku va hi nyika xinkarhana hi burisana na vona hi rungula ro karhi leri nga eBibeleni?
3 Ndlela Leyi Tirhaka: Nchumu wa nkoka i ku kombisa n’wini wa muti leswaku Bibele yi ni tindlela letinene to lulamisa swiphiqo leswi n’wi karhataka, naswona u nga endla tano hi ku vula marito ma nga ri mangani. Swingheniso leswi hakanyingi swi tirhaka hi leswi nga ni xivutiso lexi tlhontlhaka mianakanyo ya n’wini wa muti, lexi landzeriwaka hi tsalwa leri hlamulaka xivutiso. Kumbexana u ta swi tsakela ku tirhisa swingheniso leswi landzelaka. Swi endleriwe ku hi pfuna hi hatla hi “nghena emhakeni” hi ndlela leyi nga ta pfuxa ku tsakela ka n’wini wa muti.
4 Ensin’wini leyi hakanyingi vanhu va vulaka leswaku a va tsakeli, vutisa xivutiso lexi khumbaka munhu hi byakwe:
◼ “Leswi hi nga ekusuhi ni ku nghena eka lembe-xidzana leri landzelaka, xana u langutele leswinene kumbe u heleriwe hi ntshembo? [Yimela nhlamulo.] Bibele yi vule ka ha ri emahlweni mayelana ni swiendlakalo leswi dyisaka mbitsi leswi hi swi vonaka namuntlha kun’we ni vuyelo bya swona.” Hlaya 2 Timotiya 3:1, 2, 5 na Swivuriso 2:21, 22.
◼ “Laha tikweni vanhu vo tala va karhateka hikwalaho ka timhaka ta rihanyo. Xana wa swi tiva leswaku Xikwembu xi tshembisa ku herisa mavabyi hinkwawo?” Hlaya Nhlavutelo 21:3, 4.
◼ “Xana u anakanya leswaku vanhu va ndhawu ya ka hina va nga vuyeriwa hi ndlela yihi loko un’wana ni un’wana o tirhisa milawu ya Bibele?” Hlaya Matewu 22:37-39.
5 Leswi ntirho wa hina ku nga ku chumayela mahungu lamanene ya Mfumo, loko swi koteka hi fanele hi yisa nyingiso eka leswi Mfumo wolowo wu nga ta swi endla. U nga ha ku:
◼ “Xana a wu swi tiva leswaku Bibele, buku ya khale swinene emisaveni hinkwayo, yi vule leswaku ku ta va ni hulumendhe yin’we emisaveni hinkwayo?” Hlaya Daniyele 2:44.
◼ “U anakanya leswaku swiyimo a swi ta va swi ri njhani loko Yesu Kreste a a fuma misava?” Hlaya Pisalema 72:7, 8.
6 Ensin’wini leyi ku nga ni vanhu lava rhandzaka vukhongeri, u nga ha ringeta xin’wana xa swingheniso leswi:
◼ “Vanhu vo tala va kombiwa xihlawuhlawu hikwalaho ka rimbewu ra vona, vukhongeri kumbe hikwalaho ka muvala wa nhlonge ya vona. Xana u anakanya leswaku Xikwembu xi titwa njhani hi xihlawuhlawu xo tano?” Hlaya Mintirho 10:34, 35.
◼ “Ha swi tiva leswaku Yesu Kreste u endle masingita yo tala enkarhini wakwe. A hi nge u n’wi kombela ku endla singita rin’wana, a wu ta kombela leswaku a ku endlela singita rihi?” Hlaya Pisalema 72:12-14, 16.
7 Loko n’wini wa muti a nga swi tsakeli kahle ku ku amukela, u nga ha sungula bulo hi ku vula leswi:
◼ “Namuntlha vanhu vo tala swa va nyenyetsa ku tshamela ku byeriwa hi swiphiqo. Va lava ku byeriwa tindlela ta ku swi herisa. A swi kanakanisi leswaku u titwa hi ndlela yoleyo. Kambe, xana hi nga wu kuma kwihi ntlhantlho wa xiviri wa swiphiqo swa hina?” Yimela nhlamulo. Hlaya 2 Timotiya 3:16, 17.
8 Ha Yini U Nga Swi Ringeti? Hakanyingi lexi lavekaka i ku vutisa xivutiso xo olova, xo koma leswaku u pfuxa ku tsakela ka n’wini wa muti. Wansati un’wana loyi eku sunguleni a a nga lavi ku twa nchumu, u rhambe vamakwerhu vambirhi ekaya rakwe endzhaku ka loko un’wana wa vona a vutise xivutiso lexi nge: “Xana wa wu tiva Mfumo lowu u wu khongelelaka loko u endla Xikhongelo xa Hosi?” Xivutiso lexi xi n’wi tlhontlhile wansati loyi, kutani u amukele dyondzo ya Bibele. Sweswi wansati loyi i nandza wa Yehovha la tinyiketeleke!
9 Loko u vulavula ni n’wini wa muti, tiyiseka hi leswi u swi vulaka. Vulavula leswi humaka embilwini. Hakanyingi vanhu va kombisa ku tsakela loko va swi vona hakunene leswaku ha va rhandza.—Mint. 2:46, 47.
10 Namuntlha ntirho wa ku chumayela mahungu lamanene a wu olovi. Van’wana vini va miti a va swi tshembi switaswifamba. Vo tala va tshama va khomekile lerova a va na nkarhi. Hambiswiritano, ha tiyiseka leswaku ka ha ta kumiwa vanhu vo tala lava fanelekaka. (Mat. 10:11) Matshalatshala ya hina eku laveni ka vanhu lava, ma nga ha humelela loko hi hambeta hi komisa swingheniso swa hina ni ku “nghena emhakeni!”