Ndlela Yo Lunghiselela Swingheniso Swo Fambisa Timagazini

1. Ha yini swi ri kahle leswaku u tilunghiselela xingheniso xo fambisa timagazini ematshan’weni yo nhlokohata xingheniso xa xikombiso lexi nga eka Vutirheli Bya Hina Bya Mfumo?

¹ U nga ha tivutisa leswaku ‘Ha yini hi fanele hi lunghiselela swingheniso swo fambisa timagazini, kasi swingheniso swi kona eka nkandziyiso wun’wana ni wun’wana wa Vutirheli Bya Hina Bya Mfumo?’ Hambileswi swingheniso leswi swa xikombiso swi pfunaka vo tala, kambe swa laveka leswaku u tilunghiselela xingheniso xa wena n’wini. Xingheniso lexi tirhaka ensin’wini yin’wana swi nga endleka xi nga tirhi eka yin’wana. Hikwalaho, a hi fanelanga hi titwa hi bohekile ku vulavulela timagazini hi ku tirhisa swingheniso swa xikombiso hi ku kongoma. Hambiloko hi hlawula ku tirhisa xingheniso xo karhi xa xikombiso, i swinene ngopfu ku xi veka hi marito ya hina vini.

2. Xana u fanele u endla yini leswaku u tiva xihloko lexi u nga ta xi vulavulela?

² Hlawula Xihloko: Loko u hete ku hlaya magazini, hlawula xihloko lexi fanelaka nsimu ya n’wina, lexi xi ku tsakisaka ngopfu. Ku khorwiseka ni ku hiseka ka wena loko u ri karhi u vulavulela xihloko xo karhi swi nga ha susumetela n’wini wa muti leswaku a navela ku xi hlaya. Hambileswi u nga ta vulavulela xihloko lexi nga ta tsakisa vanhu vo tala ensin’wini ya n’wina, swi tsundzuke kahle ni swihloko leswin’wana swa magazini wolowo. Sweswo swi ta ku pfuna leswaku u cinca xingheniso xa wena loko wo tshuka u hlangane ni munhu un’wana la tsakelaka ku bula hi mhaka yin’wana.

3. I xingheniso xa njhani lexi u xi tirhisaka leswaku ku va ni vuyelo lebyinene?

³ Vutisa Xivutiso: Xa vumbirhi, lunghiselela marito lawa u nga ta sungula ha wona. Xingheniso xa wena i xa nkoka. Swi nga ha pfuna ku vutisa n’wini wa muti xivutiso lexi nga ta n’wi endla a tsakela xihloko lexi u hlawuleke ku xi tirhisa. Swivutiso leswi lavaka malangutelo ya munhu hakanyingi swa tirha. Papalata ku vutisa xivutiso lexi nga ta endla n’wini muti a nga ntshunxeki kumbe a kanetana na wena.

4. Hi byihi vuyelo bya ku hlayela n’wini wa muti tsalwa loko swiyimo swi pfumela?

⁴ Hlaya Tsalwa: Xo hetelela, hlawula tsalwa leri u nga ta ri hlaya loko swiyimo swa n’wini wa muti swi pfumela, kumbexana tsalwa leri nga exihlokweni lexi u nga ta xi vulavulela. Ku hlaya tsalwa swi ta pfuna n’wini wa muti a swi vona leswaku rungula ra hina ri huma eRitweni ra Xikwembu. (1 Tes. 2:13) Nakambe tsalwa ri ta endla leswaku a sala a anakanya hi rungula ra Mfumo hambiloko o ala ku teka magazini. Van’wana va pfuxe ku tsakela ka n’wini wa muti hi ku n’wi hlayela tsalwa va nga si n’wi vutisa xivutiso xo karhi. U nga ha vula leswi landzelaka, u nga si hlaya tsalwa, “Ndzi ta tsakela ku twa mavonelo ya wena hileswi vuriwaka eka ndzimana leyi ya Bibele.” Endzhaku ka sweswo, komba munhu yoloye yinhla leyi fambisanaka na rona eka magazini kutani u yi hlamuselanyana leswaku a ya a tsakela swinene u nga si n’wi fambisela magazini wa kona.

5. Hi wihi nkongomiso wa xisekelo lowu u faneleke u wu tsundzuka loko u lunghiselela xingheniso xo fambisa magazini?

⁵ A ku na nawu wo karhi wa leswi u faneleke u swi vula loko u fambisa timagazini. Hakanyingi i swinene ku endla xingheniso xo olova naswona xo koma. Sungula bulo hi ndlela leyi ku olovelaka ni leyi tisaka vuyelo lebyinene. Dzika eka yinhla leyi nga ya nkoka eka timagazini u tlhela u hiseka. Loko u lunghiselele kahle, swi ta ku fambela kahle loko u fambisa Xihondzo xo Rindza ni Xalamuka! eka vanhu lava nga ni “mboyamelo lowunene eka vutomi lebyi nga heriki.”—Mint. 13:48.