Xana U Hetisisa Vutirheli Bya Wena Hi Xitalo?
1 Ebukwini ya Mintirho, hi byeriwa leswaku vadyondzisiwa va Yesu va hetisise vutirheli bya vona hi ku “nyikela vumbhoni bya rixaladza” eka vanhu. (Mint. 2:40; 8:25; 28:23) Kunene xolexo a ku ri xikongomelo xa muapostola Pawulo. (Mint. 20:24) Xana yoleyo a hi yona pakani ya wena tanihi muchumayeri wa mahungu lamanene? Xana u nga yi fikelela hi ndlela yini?
2 Lunghiselela Xingheniso Xa Wena: Loko u lava ku tiyiseka leswaku u chumayela hi ndlela leyi humelelaka evutirhelini bya wena, i swa nkoka leswaku u lunghiselela. Sweswo swi tano ngopfu-ngopfu loko u fambisa timagazini, hikuva mhaka leyi u bulaka hi yona yi tshama yi ri karhi yi cinca-cinca. Leswaku hi hlomiseriwa ku antswa, nkandziyiso lowu wa Vutirheli Bya Hina Bya Mfumo wu ta sungula lunghiselelo lerintshwa—ku nga kholomu leyi nga etlhelweni ra ximatsi, leyi xaxametaka swingheniso swa ku fambisa timagazini ta sweswinyana ta Xihondzo xo Rindza na Xalamuka! Ku ta kandziyisiwa nhloko-mhaka ya nkandziyiso ha wun’we, leyi nga enkarhini ni leyi nga ta tsakisa vanhu vo tala. Xana u nga swi tirhisa njhani swingheniso leswi swo koma?
3 Hlawula xingheniso lexi u vonaka leswaku xi ta tirha hi ndlela leyi humelelaka ensin’wini ya ka n’wina. Hlaya xihloko lexi ku buriwaka hi xona hi vukheta u tlhela u xiya tinhla leti kongomeke leti u vonaka leswaku ti nga pfuxa ku tsakela. Kuma tsalwa leri tshahiweke eka magazini wolowo, leri hlanganaka kahle ni leswi ku buriwaka ha swona ni leri u nga ri hlayelaka n’wini wa muti. Katsa ni xigimeto xo koma lexi khutazaka muyingiseri wa wena leswaku a hlaya magazini, naswona loko swi fanerile vula hi ku komisa leswaku a nga humesa munyikelo entirhweni wa misava hinkwayo wa Timbhoni ta Yehovha. Kutani, pfuxeta xingheniso xa wena.
4 Kunguhata Ku Tirhisa Bibele: Loko u kunguhate kahle, u nga hambeta u katsa tsalwa ro karhi exinghenisweni xa wena. Hi xikombiso, etindhawini to tala, vahuweleri lava nga ni ntokoto va kota ku humelela hi ku gongondza enyangweni va khome Bibele hi voko, va pfuxela n’wini wa muti ivi va ku:
◼ “Hi vutisa vanhu loko va ma pfumela marito lawa . . . ” Hlaya Genesa 1:1, kutani u tlakusa xivutiso lexi nge: “Xana wa pfumela leswi marito lawa ma swi vulaka?” Loko munhu a ma pfumela, vula u ku: “Na mina ndza ma pfumela. Kambe, xana u ehleketa leswaku loko Xikwembu xi vumbe swilo hinkwaswo, xana xi nga tlhela xi va ni vutihlamuleri hi vuhomboloki?” Endzhaku ko nkhensa nhlamulo ya n’wini wa muti, hlaya Eklesiasta 7:29. Pfula buku leyi nge Vutivi eka tluka 71 kutani u hlaya ndzimana 2. Khutaza n’wini wa muti leswaku a hlaya buku yoleyo.
5 Tlhela U Endzela Hinkwavo Lava Kombiseke Ku Tsakela: U nge byi hetisisi hi xitalo vutirheli bya wena loko u nga tlheleli eka vanhu lava kombiseke ku tsakela. Loko mi ve ni bulo lerinene, ku nga khathariseki leswaku u fambise magazini kumbe nkandziyiso wun’wana, tiyiseka leswaku u tsala vito ni adirese ya munhu yoloye. Hisekela ku hlakulela ku tsakela ka munhu yoleyo hi ku hatla u tlhelela eka yena. Lwela ku dyondza Bibele na yena.
6 Vadyondzisiwa va lembe-xidzana ro sungula a va swi tiva leswaku Yesu u va lerise ku “nyikela vumbhoni bya rixaladza.” (Mint. 10:42) Na hina hi lerisiwe ku endla tano, hikuva hi yona ndlela leyi hi nga kotaka ku endla vadyondzisiwa ha yona. (Mat. 28:19, 20) A hi endleni hinkwaswo leswi hi nga swi kotaka leswaku hi hetisisa vutirheli bya hina hi xitalo.—2 Tim. 4:5.