Ndlela Yo Tirhisa Xikombiso Xa Swingheniso
1. Xana hi fanele hi xi tirhisa njhani xikombiso xa swingheniso leswi hi nyikiweke swona?
1 Eka Vutirheli Bya Hina Bya Mfumo, ku tshama ku ri ni xikombiso xa swingheniso swo fambisa timagazini ta hina ni tibuku tin’wana. Loko hi ri ensin’wini, a swi bohi leswaku hi swi vula hilaha swi tsarisiweke hakona swingheniso leswi ringanyetiweke. Swi endleriwe ku hi pfula mahlo, leswaku hi ta tiva leswi hi nga swi vulaka. Hi ntolovelo swi ta hi fambela kahle loko hi vula xingheniso hi marito ya hina vini. Loko hi vulavula hi ndlela ya ntumbuluko swi endla leswaku n’wini wa muti a ntshunxeka nakambe swi kombisa leswaku ha tshembeka naswona ha khorwiseka hileswi hi swi vulaka.—2 Kor. 2:17; 1 Tes. 1:5.
2. Ha yini hi fanele hi xiya mindhavuko ya ndhawu loko hi lunghiselela swingheniso swa hina?
2 Endla Xingheniso Xa Wena Xi Pfumelelana Ni Xiyimo: Xingheniso xa hina xa mahungu lamanene xi ya hi ndhavuko wa ndhawu yoleyo. Xana u nga xewetana ni n’wini wa muti ivi u katsa ni xingheniso xa wena eka bulo, kumbe xana vanhu va le nsin’wini ya ka n’wina va langutele leswaku u nghena emhakeni handle ko ba mariri? Sweswo swi ya hi tindhawu ni hi vanhu va kona. Swi tlhela swi lava leswaku hi va ni vuxiyaxiya loko hi vutisa swivutiso. Swivutiso leswi fanelaka etindhawini tin’wana swi nga ha endla vanhu va titwa va nga ntshunxekanga eka tin’wana. Hikwalaho, hi fanele hi va ni langutelo lerinene naswona hi endla leswaku swingheniso swa hina swi pfumelelana ni ndhawu yoleyo.
3. Ha yini hi fanele hi anakanyela ndhavuko ni ndlela leyi vanhu lava hi vulavulaka na vona va anakanyaka ha yona?
3 Ku tlula kwalaho, loko hi lunghiselela ku ya ensin’wini, hi fanele hi tsundzuka ndhavuko ni ndlela leyi vanhu va le nsin’wini ya hina va anakanyaka ha yona. Hi xikombiso, ndlela leyi u nga ta bula hi Matewu 6:10 ni Mukhatoliki la hisekaka a yi nge fani ni loko u bula ni munhu loyi a nga xi tiviki “Xikhongelo xa Hosi.” Loko ho rhanga hi ku anakanyisisa, hakanyingi hi nga endla swingheniso swa hina swi va leswi tsakisaka eka vanhu lava hi hlanganaka na vona ensin’wini.—1 Kor. 9:20-23.
4. Ha yini swi ri swa nkoka ku lunghiselela kahle?
4 Hambiloko hi kunguhate ku tirhisa xikombiso xa swingheniso hilaha xi tsariweke hakona, ka ha ri ni xilaveko xa leswaku hi lunghiselela kahle. Hi fanele hi xi hlaya hi vukheta xihloko kumbe ndzima leyi hi kunguhateke ku yi tirhisa hi tlhela hi languta tinhla leti nga ta endla leswaku vanhu va tsakela. Kutani hi katsa tinhla leti eka xingheniso xa hina. Loko ntsena hi ri tolovele kahle rungula leri lerinene leri nga eminkandziyisweni ya hina, hi ta kota ku yi fambisa hi ku hiseka.
5. Ha yini swi ri swinene ku lunghiselela xingheniso xin’wana, naswona hi nga swi endlisa ku yini?
5 Swingheniso Swin’wana: Xana swa boha leswaku hi tirhisa ntsena swingheniso leswi xaxametiweke eka xikombiso xa swingheniso? Doo! Loko swi ku olovela ku tirhisa xingheniso xin’wana kumbe tsalwa leri hambaneke, endla tano. Ngopfu-ngopfu eka timagazini, languta swihloko leswi nga endzeni leswi vanhu va nga swi tsakelaka swinene ensin’wini ya ka n’wina. Loko ku fanele ku endliwa nkombiso wa swingheniso swa le nsin’wini eka Nhlangano wa Ntirho, ku fanele ku endliwa malunghiselelo yo tirhisa swingheniso swin’wana ni swin’wana leswi tirhaka ensin’wini ya ka n’wina. Hi ndlela yoleyo hinkwerhu hi ta pfuneka leswaku hi chumayela hi ndlela leyi vuyerisaka.