NDZETELO WA NTIRHO WO CHUMAYELA
Ku Antswisa Vutshila Bya Hina eNsin’wini—Tiendlele Xingheniso Xa Wena Xo Fambisa Magazini
LEXI ENDLAKA SWI VA SWA NKOKA: Hambileswi swingheniso leswi humelelaka eka xiyimiso xa minhlangano swi nga ni rungula leri pfunaka, ko va swiringanyeto ntsena. U fanele u tirhisa marito ya wena n’wini. U nga ha tirhisa xingheniso lexi hambaneke kumbe rungula rin’wana leri tirhaka endhawini ya ka n’wina. Loko swi ri tano, endzhaku ka loko u hlaye magazini, u anakanyisise hi swingheniso leswi hi nga swi tirhisaka ni ku hlalela vhidiyo ya swingheniso, u nga ha tirhisa swiringanyeto leswi landzelaka leswaku u tiendlela swingheniso swa wena.
NDLELA LEYI U NGA SWI ENDLAKA HA YONA:
Tivutise, ‘Xana ndzi lava ku tirhisa xin’wana xa swingheniso leswi hi nga swi tirhisaka?’
INA
Lunghiselela marito lawa u nga ta ma vula loko u sungula xingheniso. Endzhaku ko xeweta, boxa xivangelo xo va u endzile. (Hi xikombiso: “Ndzi mi endzele leswaku . . . ”)
Anakanya hi ndlela leyi u nga ta vutisa xivutiso ha yona, u hlaya tsalwa ni ku fambisa nkandziyiso. (Hi xikombiso: Leswaku u hlaya tsalwa, u nga ha ku: “Nhlamulo leyi enerisaka ya xivutiso xexo yi kumeka eka tsalwa leri.”)
E-E
Hlawula nhlokomhaka eka magazini leyi ku tsakisaka ni leyi nga ta tsakisa vanhu va le nsin’wini ya n’wina
Anakanya hi xivutiso lexi lavaka mavonelo ya munhu lexi u nga ta xi vutisa lexi tlhontlhaka mianakanyo ni lexi nga ta endla leswaku mi burisana kambe ku nga vi lexi nga ta endla n’wini wa muti a titwa a nga ntshunxekanga. (Hi xikombiso: Xivutiso lexi kumekaka eka tluka 2 ra timagazini.)
Hlawula tsalwa leri u nga ta ri hlaya. (Loko u fambisa Xalamuka! a swi bohi ku hlaya tsalwa, tanihi leswi yi endleriweke lava nga tiviki swo tala hi Bibele naswona swi nga ha endlekaka va nga byi tshembi vukhongeri.)
Hi ku komisa hlamusela n’wini wa muti ndlela leyi a nga ta vuyeriwa ha yona loko a hlaya xihloko xexo
KU NGA KHATHARISEKI LESWI U NGA TA SWI HLAMULA
Lunghiselela xivutiso lexi u nga ta xi hlamula loko u endla riendzo ro vuyela
Tsala tinhla leti nga ta ku pfuna leswaku u tsundzuka leswi u lavaka ku swi vula enkarhini lowu taka