Fambisa Timagazini Leti Sekelaka Ntiyiso
1. Xana Xihondzo xo Rindza na Xalamuka! swi pfuna ha yini?
1 Xihondzo xo Rindza [Lexi Huwelelaka Mfumo Wa Yehovha] ni munghana wa xona Xalamuka! swa ha ri switirho swa nkoka eka ntirho wo chumayela hi Mfumo ni ku endla vadyondzisiwa. (Mat. 24:14; 28:19, 20) Ha tsaka loko nkarhi na nkarhi hi fambisa timagazini leti nga ni rungula leri pfunaka loko hi ri karhi hi hlanganyela eka swiyenge swo hambana-hambana swa ntirho wa hina wo chumayela hi Mfumo.
2. Hi kwihi ku cinca loku veke kona eka Xihondzo xo Rindza ni Xalamuka! naswona ha yini?
2 Eka malembe lama hundzeke hi vone ku cinca eka timagazini leti ni le ka rungula leri ti ri tameleke, swin’we ni ndlela leyi hi tifambisaka ha yona. Xikongomelo xa ku cinca loku i ku endla leswaku ti tsakeriwa leswaku rungula ra Mfumo ri ta fikelela timbilu ta ‘vanhu va mixaka hinkwayo leswaku va ponisiwa naswona va fikelela vutivi lebyi kongomeke bya ntiyiso.’—1 Tim. 2:4.
3. Xana hi ta ti fambisa njhani timagazini ensin’wini?
3 Ku sukela hi January 2006, hi tirhise tindlela to hambana-hambana loko hi fambisa Xalamuka! leyi se yi humaka kan’we hi n’hweti. Xihondzo xo Rindza [Lexi Huwelelaka Mfumo Wa Yehovha] xi ta hambeta xi huma kambirhi hi n’hweti kambe hi ta fambisa xin’we eka swona hi ndlela leyi fanaka ni ya Xalamuka! Swingheniso swo fambisa Xihondzo xo Rindza ni Xalamuka! swi kumeka eka tluka ro hetelela ra Vutirheli Bya Hina Bya Mfumo. Hi ntolovelo swingheniso leswi swi vulavula hi swihloko swo sungula swa magazini, kambe minkarhi yin’wana swi vulavula ni hi swihloko swin’wana leswi vanhu va swi tsakelaka. Swingheniso leswi swi nga hi pfuna loko hi ri tiva kahle rungula ra swihloko leswi ku vulavuriwaka hi swona naswona hi endla leswaku swi pfumelelana ni swiyimo swa nsimu ya hina, hi ku vula swingheniso hi marito ya hina.
4. Ha yini swi ri swinene ku tirhisa swingheniso swin’wana handle ka leswi kumekaka eka Vutirheli Bya Hina Bya Mfumo?
4 Hambileswi Vutirheli Bya Hina Bya Mfumo byi tameleke swingheniso swimbirhi leswi vulavulelaka magazini wun’we, u nga tirhisa xin’wana lexi nga faniki na swona. Xivangelo xin’wana xa sweswo ku nga ha va leswaku xin’wana xa swihloko eka magazini wolowo xi ni rungula leri tsakeriwaka hi vanhu vo tala ensin’wini ya n’wina. Kumbexana u vona leswaku u nga kota ku fikelela timbilu ta vanhu loko u tirhisa xihloko lexi u kotaka ku xi vulavulela.
5. Loko u nga si lunghiselela xingheniso lexi u nga ta xi tirhisa loko u fambisa magazini, u fanele u rhanga u endla yini?
5 Ndlela Yo Lunghiselela Xingheniso Xa Wena: Xo sungula, rhanga u hlaya xihloko lexi u lavaka ku xi vulavulela. Swi nga endleka u nga ha swi tsundzuki kahle swihloko swin’wana leswi nga eka magazini loko se u wu fambisa ensin’wini. Kambe, hiseka naswona u tiyiseka loko u ri karhi u vulavulela xihloko lexi u nga ta xi tirhisa loko u fambisa magazini wolowo. Sweswo u ta swi kota ntsena loko u ri tiva kahle rungula ra xihloko lexi u xi vulavulelaka.
6. Hi nga swi lunghiselela njhani swingheniso swa hina?
6 Xa vumbirhi, endla leswaku xingheniso xa wena xi pfumelelana ni swiyimo. U nga ha sungula bulo hi ku vutisa xivutiso lexi endlaka leswaku munhu a lava ku tiva, lexi fambisanaka ni xihloko lexi u xi vulavulelaka. Minkarhi hinkwayo tirhisa Rito ra Xikwembu leswaku u fikelela timbilu ta vanhu. (Hev. 4:12) Hlawula tsalwa leri fambisanaka ni mhaka leyi u vulavulaka hi yona, loko swi koteka ku va tsalwa leri tshahiweke kumbe leri kombisiweke eka xihloko lexi u xi vulavulelaka. Kuma ndlela yo endla leswaku tsalwa rero ri fambisana ni xihloko xexo.
7. Xana hi nga swi antswisa njhani swingheniso swa hina?
7 Xi Tirhise Nkarhi Wun’wana Ni Wun’wana: Leswaku xingheniso xa wena xi tirha, u fanele u xi tirhisa. Hlanganyela ni vandlha loko ri fambisa timagazini hi Mugqivela. Fambisa timagazini eka vanhu lava nga tshama va amukela minkandziyiso yin’wana. Minkarhi hinkwayo fambisa timagazini eka swichudeni swa wena swa Bibele ni le ka vanhu lava u nga ha va kumaka loko u endla maendzo yo vuyela. U nga ha fambisa timagazini eka vanhu lava u hlanganaka na vona eswitolo, loko u teka riendzo kumbe loko u ye eka dokodela. Antswisa swingheniso swa wena loko u ri karhi u swi tirhisa exikarhi ka n’hweti.
8. Xana timagazini ta Xihondzo xo Rindza ni ta Xalamuka! ti hlawuleke hi ndlela yihi?
8 Timagazini ta Xihondzo xo Rindza ni ta Xalamuka! ti hlawulekile. Ti tlakusa Yehovha tanihi Hosi ya vuako hinkwabyo. (Mint. 4:24) Ti chavelela vanhu hi mahungu lamanene ya Mfumo wa Xikwembu naswona ti va khutaza leswaku va va ni ripfumelo eka Yesu Kreste. (Mat. 24:14; Mint. 10:43) Ku tlula kwalaho, ti hlamusela swiendlakalo swa misava loko swi ri karhi swi hetisisa vuprofeta bya Bibele. (Mat. 25:13) Pfuna vanhu va le nsin’wini ya ka n’wina leswaku va pfuneka eka timagazini leti, hi ku lunghiselela ku ti fambisa nkarhi wun’wana ni wun’wana!
9. Xana hi nga yi pfula njhani ndlela ya leswaku hi vuyela eka loyi hi sunguleke bulo na yena?
9 Loko wo kota ku fambisa magazini kumbe u vulavula ni munhu wo karhi hi mhaka leyi khumbaka vukhongeri, n’wi siye ni xivutiso lexi tlhontlhaka mianakanyo leswaku u ta kota ku vuya mi ta ya emahlweni ni bulo rero. Loko hi hisekela ku byala mbewu ya ntiyiso, hi nga tiyiseka leswaku Yehovha u ta pfula timbilu ta lava va lavaka ku n’wi tiva ni ku n’wi tirhela hi mbilu hinkwayo.—1 Kor. 3:6.