Loko Xi Ri Ni Vuyelo, Xi Tirhise!
1 Nkarhi na nkarhi Vutirheli Bya Hina Bya Mfumo byi hi nyika swingheniso swo hambana-hambana leswi ringanyetiwaka leswaku hi swi tirhisa evutirhelini. Leswi swi hi nyika tindlela letintshwa malunghana ni ku pfuxa ku tsakela eka rungula ra Mfumo. Swi nga ha endleka leswaku n’hweti na n’hweti u tikarhatela ku dyondza xingheniso xin’we kumbe swo tala. Hambiswiritano, vahuweleri van’wana va nga ha kuma leswaku loko va tirhise xin’we minkarhi yo hlayanyana, nkandziyiso wun’wana wa Vutirheli Bya Hina Bya Mfumo wu va wu humese swingheniso leswintshwa. Handle ko kanakana swi nga ha endleka swi nga koteki leswaku un’wana ni un’wana a dyondza xingheniso xin’wana lexintshwa a nga si kota ku tirhisa lexa khale.
2 Kavula, ku ni magidi ya maphayona ni vahuweleri van’wana lava hetaka nkarhi wo tala entirhweni wa nsimu. Ku tlula kwalaho, mavandlha yo tala ma tirha nsimu ya wona hinkwayo mavhiki ma nga ri mangani. Eka swiyimo leswi, vahuweleri va tsakela ku va ni swingheniso ni tindlela letintshwa leswaku va twarisa rungula leri. Leswi swi va pfuna ku antswisa vutshila bya vona. Swi tlhela swi endla leswaku vutirheli bya vona byi tsakisa swinene ni ku va ni mihandzu ni ku va pfuna ku langutana ni mintlhontlho leyi va hlangavetanaka na yona.
3 Ku nga khathariseki leswaku swiyimo swa wena hi swihi, loko u lunghiselele xingheniso lexi kotaka ku pfuxa ku tsakela, tikarhatele ku hambeta u xi tirhisa! A swi bohi leswaku u tshika ku tirhisa xingheniso lexi humelelaka lexi ku vuyerisaka. Endla leswaku xi fambisana ni buku leyi fambisiwaka n’hweti yoleyo. Loko u pfuxeta swiringanyeto leswi nyikeriweke eka Vutirheli Bya Hina Bya Mfumo, lava tinhla leti tsakisaka leti u navelaka ku ti tirhisa eka xingheniso xa wena.
4 Hikwalaho loko u kuma nkandziyiso lowuntshwa wa Vutirheli Bya Hina Bya Mfumo, tsundzuka leswaku swingheniso leswi nga eka byona ko va swiringanyeto ntsena. Loko u lava ku swi tirhisa, swi tirhise. Kambe loko ana se u kume xingheniso lexi ku tirhelaka kahle ensin’wini ya ka n’wina, xi tirhise! Nchumu wa nkoka i ku “hetisisa vutirheli bya wena hi xitalo” hi mukhuva lowunene, leswaku u kuma vanhu lava fanelekaka ni ku va pfuna leswaku va va vadyondzisiwa.—2 Tim. 4:5.