Timbhoni Ta Yehovha—Vavuri Va Evhangeli Va Ntiyiso

¹ Yesu Kreste u byarhise vadyondzisiwa vakwe hinkwavo vutihlamuleri byo vula evhangeli, hi ku kongoma a va lerisa ku chumayela mahungu lamanene ya Mfumo. (Mt. 24:14; Mint. 10:42) Vadyondzisiwa vakwe vo sungula va siye xikombiso lexinene entirhweni lowu loko va ri karhi va vulavula hi Mfumo handle ko karhala—ku nga ri etindhawini ta vugandzeri ntsena kambe ni loko va hlangana ni vanhu erivaleni ni hi yindlu ni yindlu. (Mint. 5:42; 20:20) Tanihi Timbhoni ta Yehovha namuntlha, hi tikombise hi ri Vakreste va ntiyiso lava vulaka evhangeli, hi ku chumayela rungula ra Mfumo ematikweni yo ringana 232 ni ku khuvula vadyondzisiwa lavantshwa vo ringana miliyoni emalembeni manharhu ntsena! Ha yini ntirho wa hina wo vula evhangeli wu humelerile swonghasi?

² Mahungu Lamanene Ma Hi Tsakisa: Vaevhangeli i vachumayeri, kumbe varhumiwa va mahungu lamanene. Hikwalaho ka sweswo, hi ni lunghelo leri tsakisaka ra ku huwelela Mfumo wa Yehovha—ku nga mahungu lamanene ya xiviri lama nga nyikiwaka vanhu lava kayakayaka. Hi nyanyuriwa hi vutivi lebyi ana se hi nga na byona bya matilo lamantshwa lama hi ku lulama ma nga ta fuma misava leyintshwa leyi nga ta va ni vanhu vo tshembeka eParadeyisini leyi taka. (2 Pet. 3:13, 17) Hi hina ntsena lava nga ni ntshembo lowu, naswona hi hisekela ku wu byela van’wana.

³ Rirhandzu Ra Ntiyiso Ra Hi Susumeta: Ku vula evhangeli i ntirho lowu ponisaka vutomi. (Rhom. 1:16) Hi yona mhaka leyi hi kumaka ntsako lowukulu loko hi hangalasa rungula ra Mfumo. Tanihi vaevhangeli va ntiyiso, hi rhandza vanhu, naswona sweswo swi hi susumetela ku va byela mahungu lamanene—mindyangu ya hina, vaakelani, lava hi tolovelaneke na vona ni van’wana vo tala hilaha swi nga kotekaka hakona. Loko hi endla ntirho lowu hi moya-xiviri hinkwawo hi swin’wana swa swikombiso leswinene ngopfu leswi hi nga kombisaka rirhandzu ra hina eka van’wana ha swona.—1 Tes. 2:8.

⁴ Moya Wa Xikwembu Wa Hi Seketela: Rito ra Xikwembu ra hi tiyisekisa leswaku loko hi endla ntirho wa hina wa ku byala ni ku cheleta mbewu ya Mfumo, i Yehovha la “swi kurisaka.” Leswi hi swona leswi hi swi vonaka swi endleka enhlengeletanweni ya hina namuntlha. (1 Kor. 3:5-7) I moya wa Xikwembu lowu hi seketelaka entirhweni wa hina wa vuevhangeli ni ku endla leswaku hi humelela.—Yuw. 2:28, 29.

⁵ Hikwalaho ka xikhutazo lexi nga eka 2 Timotiya 4:5 xa leswaku hi “endla ntirho wa muevhangeli,” hikwalaho ka ku rhandza ka hina vanhu hinkwavo, onge hi nga susumeteleka ku hlanganyela eku twariseni ka mahungu lamanene lama tsakisaka ya Mfumo nkarhi wun’wana ni wun’wana, hi ri ni ntshembo wa leswaku Yehovha u ta hambeta a katekisa ntirho wa hina.