Khathalela Van’wana—Hi Ku Va La Lunghiseleleke
1 Ku wu lunghiselela kahle ntirho wo chumayela swi hi pfuna ku khathalela vanhu lava hi hlanganaka na vona ensin’wini. Njhani? Loko hi lunghiselele kahle, a hi karhateki ngopfu hi leswi hi nga ta swi vula kutani hi kota ku swi twa kahle leswi n’wini wa muti a swi vulaka. Ku tlula kwalaho, swi hi pfuna leswaku hi nga biwi hi ripfalo naswona hi vulavula swi huma embilwini. Kutani, hi nga xi lunghiselela njhani xingheniso lexi fikelelaka mbilu?
2 Tirhisa Xingheniso Lexi Fanelekaka: Hlawula xingheniso xin’we eka leswi ringanyetiweke eka Vutirheli Bya Hina Bya Mfumo bya January 2005, lexi fanelaka nsimu ya ka n’wina, ivi u vona leswaku u nga xi veka njhani hi marito ya wena. Endla leswaku xi fanela nsimu ya n’wina. Hi xikombiso, loko swo endleka leswaku u hlangana ni vanhu va vukhongeri kumbe ndhavuko wo karhi, anakanya leswaku u nga endla njhani leswaku xingheniso xa wena xi va koka va lava ku twa leswi u va byelaka swona. Ku endla leswaku xingheniso xa wena xi pfumelelana ni vanhu lava u vulavulaka na vona swi kombisa leswaku wa va tsakela hi xiviri.—1 Kor. 9:22.
3 Loko se u sungule ku tirhisa xingheniso xexo, hambeta u xi antswisa. Xiya ndlela leyi vanhu va angulaka ha yona hikuva marito yo sungula i ya nkoka. Xana va yi tsakela mhaka leyi u va byelaka yona? Xana va swi hlamula swivutiso leswi u va vutisaka swona? Loko va nga hlamuli, lulamisa xingheniso xa wena kukondza va xi tsakela.
4 Swilo Swo Ku Tsundzuxa: Vahuweleri vo tala swa va tikela ku tsundzuka leswi va faneleke va swi vula loko se va fanele va vulavula ni n’wini wa muti. Loko swi ri tano ni le ka wena, kombela muhuweleri un’wana leswaku mi praktisa xingheniso xo karhi swin’we. Sweswo swi ta ku pfuna leswaku u tsundzuka tinhla-nkulu ta leswi u nga ta swi vula kutani u swi vula hi ndlela yo olova leyi twisisekaka. Nakambe u ta kota ku lunghekela ku angula vanhu vo hambana-hambana lava u nga ta hlangana na vona.
5 Nchumu wun’wana lowu nga ku tsundzuxaka i ku tsala tinhla to koma exiphephanini kutani u titsundzuxa leswi u nga ta swi vula u nga si gongondza. Van’wana va kume leswaku tinhla leti ti va pfuna leswaku va nga biwi hi ripfalo kutani va kota ku bula ni vanhu va ntshunxekile. Loko hi lunghiselele kahle, tindlela leti boxiweke laha henhla ti ta hi pfuna leswaku hi khathalela vanhu ni ku antswisa ndlela leyi hi ma chumayelaka ha yona mahungu lamanene.