Khathalela Van’wana—Hi Ku Pfumelelana Ni Swiyimo
1 Muapostola Pawulo u hi vekele xikombiso lexinene hi ku endla leswaku minkarhi hinkwayo loko a chumayela mahungu lamanene, leswi a swi vulaka swi pfumelelana ni ndhavuko ni ndlela leyi vayingiseri va yena va ehleketaka ha yona. (1 Kor. 9:19-23) Na hina hi fanele ku lwela ku endla hilaha a endleke hakona. Loko ho rhanga hi ku ehleketa leswi hi nga ta swi vula, hakanyingi hi nga swi kota ku pfumelelanisa swingheniso swa hina leswi nga eka Vutirheli Bya Hina Bya Mfumo ni swiyimo swa vanhu va nsimu leyi hi yi tirhaka. Loko hi ri karhi hi nghena ekaya ra munhu hi nga ha vona swilo leswi n’wini wa muti a swi tsakelaka kutani hi swi katsa ebulwini ra hina. Hambiswiritano, ku ni ndlela yin’wana leyi hi nga pfumelelanaka ni swiyimo ha yona loko hi ri ensin’wini.
2 Pfumelelanisa Xingheniso Xa Wena Ni Leswi Vuriwaka Hi N’wini Wa Muti: Hakanyingi loko hi chumayela mahungu lamanene, hi vutisa n’wini wa muti xivutiso ivi hi yimela nhlamulo. Xana u yi teka njhani nhlamulo ya yena? Xana wa n’wi nkhensa kutani u ya emahlweni ni xingheniso lexi u xi lunghiseleleke? Kumbe leswi u swi vulaka swi kombisa leswaku u swi twile leswi n’wini wa muti a swi vuleke? Loko hakunene u ri ni mhaka ni leswi van’wana va swi vulaka, u nga kota ku tlakusa swivutiso swin’wana hi vutlhari, leswi nga ta ku pfuna ku twa leswi hakunene va swi ehleketaka. (Swiv. 20:5) Hi ndlela yoleyo, u ta kota ku vulavula hi rungula ra Mfumo leri khumbaka leswi karhataka vayingiseri va wena.
3 Leswi swi lava leswaku hi tiyimisela ku vulavula hi timhaka tin’wana handle ka leti a hi kunguhate ku bula ha tona. Loko hi sungula bulo ra hina hi mhaka yo karhi leyi boxiweke eka mahungu ivi n’wini wa muti a vula swin’wana leswi endlekeke emugangeni wolowo kumbe mhaka yin’wana leyi n’wi karhataka, hi ta tirhisa Bibele ku bula hi mhaka leyi n’wi karhataka hikuva hi lava leswaku a enerisaka.—Filp. 2:4.
4 Ku Pfumelelanisa Xingheniso Xa Hina Ni Swiyimo: Loko n’wini wa muti a tlakusa xivutiso, swi nga va swinene leswaku hi xi hlamula enkarhini lowu taka loko hi ta va hi endle ndzavisiso hi mhaka yoleyo. Nakambe hi nga ha n’wi nyika nkandziyiso wo karhi lowu vekaka mhaka yoleyo erivaleni. Leswi hinkwaswo swi kombisa leswaku hi swi navela hi mbilu hinkwayo ku pfuna van’wana leswaku va tiva Yehovha.—2 Kor. 2:17.