Ku Antswisa Vutshila Bya Hina eNsin’wini—Ku Khathala Hi Vanhu Lava Hi Va Chumayelaka

Lexi Endlaka Swi Va Swa Nkoka: Yesu a a khathala hi munhu ha un’we naswona u va kombise rirhandzu vanhu. Hi xikombiso, siku rin’wana swi nga ha endleka Yesu a swi xiyile leswaku wanuna loyi a a fe tindleve a a chava, hikwalaho loko a n’wi tshungula u n’wi tekele etlhelo a n’wi susa entshungwini. (Mar. 7:31-35) U anakanyele vadyondzisiwa vakwe hi ku xiya ku tsana ka vona kutani a nga va byeli rungula ro tala ku tlula mpimo. (Yoh. 16:12) Hambiloko se a ri etilweni, Yesu wa ha khathala hi vanhu. (2 Tim. 4:17) Leswi hi nga valandzeri va Kreste, hi fanele hi n’wi tekelela. (1 Pet. 2:21; 1 Yoh. 3:16, 18) Ku tlula kwalaho, swilo swi ta hi fambela kahle ensin’wini loko hi anakanyela n’wini wa muti naswona hi kombisa leswaku ha khathala hi swiyimo swa yena, swilo leswi a swi tsakelaka ni leswi n’wi karhataka. A swi kanakanisi leswaku u ta hi yingisela loko a swi xiya leswaku a hi le ntirhweni wo twarisa rungula kumbe wo siya minkandziyiso ntsena; kambe ha khathala hi yena.

Ndlela Leyi U Nga Swi Endlaka Ha Yona:

Lunghiselela kahle. Ntshunxeka, u n’wayitela naswona u va ni xinghana.
Vana ni vuxiyaxiya. Xana ku ni leswi kombisaka leswaku munhu yoloye u ni vana? u tsakela ku tirha entangeni kumbe u ni swifuwo? u pfumela eka tidyondzo to karhi? Kumbexana u nga cinca xingheniso xa wena leswaku xi ta fambisana ni swiyimo swa yena.
N’wi vutise vonelo ra yena kutani u yingiserisisa handle ko n’wi nghena enon’wini swi nga bohi. N’wi langute ematihlweni ku kombisa leswaku u n’wi yingiserile. Nkhensa tinhlamulo ta yena naswona u n’wi bumabumela swi huma embilwini loko swi fanerile. Papalata ku phikizana na yena.
Pfumelelana ni swiyimo. Loko swi boha, cinca xingheniso xa wena u bula hi swilo leswi karhataka munhu yoloye. Swi nga ha olova ku endla tano tanihi leswi swiphephana, tibroxara ni timagazini ta hina swi vulavulaka hi timhaka to hambana-hambana. Loko u fike hi nkarhi lowu nga riki wunene, ku fana ni loko a khomekile, vula leswaku wa swi xiya leswaku u khomekile kutani u komisa xingheniso xa wena.

Ringeta Ku Endla Leswi N’hweti Leyi:

Titoloveteni hi nkarhi wa vugandzeri bya n’wina bya ndyangu kumbe loko mi ri ensin’wini, laha muhuweleri a faneleke a cinca xingheniso xakwe leswaku a bula hi leswi n’wini wa muti a swi vulaka.
Eka minhlangano yin’wana ya ntirho wa nsimu, makwerhu loyi a yi fambisaka a nga ha bula kumbe a endla nkombiso wa tindlela leti hi nga kombisaka ha tona leswaku ha khathala hi vanhu lava hi va chumayelaka.