Khathalela Van’wana—Hi Ku Va La Xalamukeke
1 Yehovha Xikwembu na Kreste Yesu va swi kota ngopfu ku vona swilaveko swo karhi swa vanhu kutani va va pfuna. (2 Tikr. 16:9; Mar. 6:34) Loko hi vona leswi vanhu lava hi va kumaka ensin’wini va swi tsakelaka ni leswi swi va karhataka, hi nga kota ku pfumelelanisa xingheniso xa hina xa mahungu lamanene ni swiyimo.
2 Vana Ni Vuxiyaxiya: Yesu a a ri ni vuxiyaxiya. (Mar. 12:41-43; Luka 19:1-6) Hilaha ku fanaka, loko hi nghena emutini wa munhu kutani hi xiya swifaniso swa vukhongeri leswi hayekiweke, marito lama namekiweke emimovheni kumbe swilo swo tlangisa leswi hi swi vonaka erivaleni, hi nga kuma tindlela to va ni bulo lerinene ra mahungu lamanene.
3 Ndlela leyi munhu a langutekaka ha yona yi nga ku byela swo karhi hi ndlela leyi a titwaka ha yona. (Swiv. 15:13) Kumbexana u lava ku chaveleriwa hikwalaho ka leswi a feriweke hi murhandziwa wa yena kumbe hikwalaho ka swiphiqo swin’wana leswi n’wi tshikelelaka. A nga tsaka loko ho n’wi hlayela matsalwa yo karhi lama nga ta n’wi chavelela. (Swiv. 16:24) Xana u fika n’wini wa muti a yime hi milenge kumbe a ri karhi a mbuwetela n’wana la rilaka? Loko swi ri tano, swa antswa ku endla malunghiselelo ya leswaku u ta siku rin’wana. Hi ku anakanyela ni ku “kombisa ntlhaveko wa xinakulobye” hi nga endla leswaku vanhu va hi yingisa loko hi vuyela eka vona.—1 Pet. 3:8.
4 Twananisa Leswi U Swi Vulaka Ni Swiyimo: Muapostola Pawulo u xiye leswaku muti wa Atena a wu ri ni alitari leyi a yi nyiketeriwe “Eka Xikwembu Lexi Nga Tiviwiki.” Leswi swi endle leswaku leswi a nga ta swi vula hi mahungu lamanene swi pfumelelana ni swiyimo, hikuva u te: “Leswi mi nga xi tiviki lexi mi kombisaka ku tinyiketela ka vukwembu eka xona, ndzi xi twarisa eka n’wina.” Ndlela ya Pawulo ya vutlhari yo kota ku veka timhaka yi pfune van’wana lava a va ri kona leswaku va amukela rungula ra Mfumo kutani va va vapfumeri.—Mint. 17:23, 34.
5 Hilaha ku fanaka loko na hina hi ri ni vuxiyaxiya, hi ta kota ku vona leswi munhu a swi tsakelaka kutani hi pfumelelanisa leswi hi nga ta swi vula ni xiyimo. Tirhisa swivutiso leswi nga ta pfuna n’wini wa muti leswaku a tiphofula. Anakanya hi matsalwa lama nga n’wi pfunaka leswaku a tsakela. (Swiv. 20:5) Loko hi ri ni vuxiyaxiya naswona hi khathalela van’wana swi huma embilwini, hi ta kota ku va ni vutshila byo chumayela mahungu lamanene.