Xixima Swinene Vito Ra Yehovha Ro Saseka
1 Sathana u onhe vito ra Xikwembu loko a yenge vatswari va hina vo sungula leswaku va dyoha. Diyavulosi u vule leswaku Yehovha u xise Adamu. (Gen. 3:1-5) Tanihi leswi vito ra Xikwembu ri hlanganaka ni vuswikoti bya xona byo hetisisa leswi xi swi vuleke, xihehlo xa Sathana a ku ri mavunwa ya rihlaza. Yehovha u hlantswe ku soriwa ka vito ra yena, kutani a ri endla ri saseka hi ku ya emahlweni a hetisisa xikongomelo xakwe xa vukwembu.—Esa. 63:12-14.
2 Hi hina vanhu lava Yehovha a va vitanaka hi ‘vito ra yena.’ (Mint. 15:14, 17) Leswi swi hi nyika lunghelo ro kombisa ndlela leyi hi titwaka ha yona mayelana ni ku kwetsimisiwa ka rona. Hi teka vito ra Yehovha ri ri leri sasekeke swinene, tanihi leswi ri yimelaka xin’wana ni xin’wana lexinene, xa musa, xa rirhandzu, xa tintswalo ni xo lulama. Hi ni xichavo lexikulu swinene mayelana ni ku vangama lokukulu ka vito ra Xikwembu. (Ps. 8:1; 99:3; 148:13) Xana leswi swi fanele swi hi susumetela ku endla yini?
3 Kwetsimisa Vito Ra Xikwembu: Vito ra Xikwembu a ri nge endliwi ri kwetsima ku tlula leswi ri nga xiswona. Kambe loko hi tikhoma hi ndlela leyinene ni ku tlhela hi chumayela mahungu ya Mfumo, hi kombisa leswaku vito ra Xikwembu ra xiximekaka swinene. A hi vuleni hi ku: “Tlangelani Yehova, khongelani v̌ito ra yena, mi ku: V̌ito ra yena hi le’ri tlakukeke.” (Esa. 12:4) Hi nga swi endlisa ku yini leswi?
4 Hi nga tirhisa nkarhi wun’wana ni wun’wana leswaku hi twarisa vito ra Yehovha ni hinkwaswo leswi fambisanaka na rona. Ku nga khathariseki leswaku hi wu endla hi ndlela leyi hlelekeke kumbe hi xitshuketa, hi yindlu ni yindlu, eswitolo, eswitarateni kumbe hi ku ba riqingho, hi dzunisa Yehovha hi ntirho wa hina wo chumayela. Loko hi kuma vanhu lava tsakelaka, hi fanele hi endla malunghiselelo lama tiyeke ya ku tlhelela eka vona ivi hi va dyondzisa leswi engetelekeke malunghana na Yehovha. Leswi swi vula leswaku hi fanele hi hetisisa switshembiso swa hina naswona hi fanele hi tikarhatela ku sungula tidyondzo ta le kaya ta Bibele. Lexi tsakisaka, lembe ni lembe vanhu va madzana ya magidi va tivisiwa vito ra Yehovha lero saseka, va ri xixima va tlhela va ri kwetsimisa.
5 Ku hlanganyela ka hina hi mbilu hinkwayo entirhweni wo kwetsimisa vito ra Xikwembu, swi kombisa kahle leswaku hi yime kwihi eka ntlhontlho lowu pfuxiweke hi Sathana aEdeni. Lowu i ntirho wo xiximeka swinene lowu hi faneleka hi wu endla. A hi xiximeni swinene vito ra Yehovha ro saseka ni ku ri dzunisa hi ku gingiriteka!—1 Tikr. 29:13.