Ku Tivisa Vito Ra Xikwembu
1. Xana ku tiva vito ra Xikwembu swi nga va khumba njhani vanhu?
1 Xana u titwise ku yini loko u sungula ku tiva vito ra Xikwembu? Vo tala va titwe ku fana ni wansati loyi a nga te: “Loko ndzi vone vito ra Xikwembu ro sungula eBibeleni, mihloti ya mina yi xiririkile. Mhaka ya leswaku se ndza ri tiva vito ra Xikwembu ni leswaku se ndzi nga ri tirhisa, yi ndzi tsakisile swinene.” Eka wansati loyi, ku tiva vito ra Xikwembu a ku ri goza ra nkoka ra leswaku a kota ku tiva Yehovha tanihi munhu wa xiviri ni ku aka vuxaka na yena.
2. Ha yini swi ri swa xihatla leswaku hi dyondzisa van’wana hi Yehovha?
2 Ha Yini U Fanele U Ri Tivisa? Ku tiva vito ra Xikwembu swi katsa ku tiva timfanelo ta xona, swikongomelo ni mintirho ya xona. Naswona ri tlhela ri endla leswaku hi kuma ku pona. Muapostola Pawulo u tsarile: “Un’wana ni un’wana loyi a vitanaka vito ra Yehovha u ta ponisiwa.” Pawulo u tlhele a vutisa a ku, kambe “va ta n’wi vitanisa ku yini” Yehovha, loko va nga sungulanga va dyondza ha yena kutani va kombisa ripfumelo eka yena? Hikwalaho, i swa xihatla leswaku Vakreste va tivisa van’wana vito ra Xikwembu ni hinkwaswo leswi ri swi yimelaka. (Rhom. 10:13, 14) Hambiswiritano, ku ni xivangelo xin’wana lexikulu lexi endlaka leswaku vito ra Xikwembu ri tivisiwa.
3. Hi xihi xivangelo-nkulu lexi endlaka leswaku hi chumayela?
3 Hi va 1920, vanhu va Xikwembu va swi xiyile eMatsalweni leswaku ku ni mphikamakaneta ya vuako hinkwabyo leyi katsaka ku lweriwa ka vuhosi bya Xikwembu ni ku kwetsimisiwa ka vito ra xona. Loko Yehovha a nga si va lovisa lavo homboloka leswaku a susa xisandzu lexi vekiweke ehenhla ka vito ra yena, ntiyiso malunghana na yena wu fanele wu “tivisiwa emisaveni hinkwayo.” (Esa. 12:4, 5; Ezek. 38:23) Hikokwalaho, xivangelo-nkulu xa hina xo chumayela i ku dzunisa Yehovha erivaleni ni ku kwetsimisa vito ra yena evanhwini hinkwavo. (Hev. 13:15) Ku rhandza Xikwembu ni vaakelani va hina swi ta hi endla hi tinyiketela entirhweni lowu, lowu Xikwembu xi lavaka leswaku wu endliwa.
4. Xana swi tise ku yini leswaku Timbhoni ta Yehovha ti vitaniwa hi vito ra Xikwembu?
4 “Vanhu Va Vito Ra Xona”: Hi 1931 hi amukele vito leri nge Timbhoni ta Yehovha. (Esa. 43:10) Ku sukela kwalaho, vanhu va Xikwembu va tivise vito ra xona hi ndlela leyikulu lerova buku leyi nge Vahuweleri, eka tluka 124, yi ri: “Ematikweni hinkwawo, mani na mani la tirhisaka vito ra Yehovha hi ku ntshunxeka u hatla a tekiwa tanihi un’wana wa Timbhoni ta Yehovha.” Xana na wena u tekiwa hi ndlela yoleyo? Ku tlangela vunene bya Yehovha ku fanele ku hi susumetela ku ‘dzunisa vito ra yena,’ hi vulavula ha yena hi nkarhi wun’wana ni wun’wana lowu wu hi pfulekelaka.—Ps. 20:7; 145:1, 2, 7.
5. Xana ndlela leyi hi tikhomaka ha yona yi katseka njhani emhakeni yo byarha vito ra Xikwembu?
5 Tanihi “vanhu va vito ra xona,” hi fanele hi seketela milawu ya xona. (Mint. 15:14; 2 Tim. 2:19) Hakanyingi, lexi vanhu va xi xiyaka ku sungula eka Timbhoni ta Yehovha i mahanyelo ya tona lamanene. (1 Pet. 2:12) A hi swi lavi ku thyakisa vito ra Xikwembu hi ku tlula milawu xa xona kumbe hi ku ka hi nga byi rhangisi vugandzeri bya xona evuton’wini bya hina. (Lev. 22:31, 32; Mal. 1:6-8, 12-14) Ematshan’weni ya sweswo, onge ndlela leyi hi tikhomaka ha yona yi nga kombisa leswaku hi ri teka ri ri ra nkoka lunghelo ro byarha vito ra xona.
6. Hi rihi lunghelo leri hi nga ri tsakelaka sweswi ni laha ku nga heriki?
6 Namuntlha, hi vona ku hetiseka ka marito lawa Yehovha a ma vuleke, lama nge: “Ku sukela eku humeni ka dyambu ku ya eku peleni ka rona, vito ra mina ri ta va rikulu exikarhi ka matiko.” (Mal. 1:11) A hi hambeteni hi tivisa ntiyiso malunghana na Yehovha ni ku “dzunis[a] vito rakwe ro kwetsima hilaha ku nga riki na makumu, hi masiku.”—Ps. 145:21.