Pfuna Van’wana Va Dyondza Hi N’wana Wa Xikwembu, Yesu Kreste
1 December i n’hweti leyi vunyingi bya lava tivulaka Vakreste va ehleketaka ngopfu hi Yesu ku tlula nkarhi lowun’wana wa lembe. Xisweswo, i n’hweti leyinene ya ku fambisa buku leyi nge Nghwazi Leyi Tshameke Yi Hanya. Handle ko kanakana hi ta kuma vini va miti yo tala lava nga ta tsakela ku dyondza swo tala hi N’wana wa Xikwembu. Xana hi nga yi fambisisa ku yini buku leyi ya nkoka?
2 Ringeta ku nghena hi ku kongoma eka bulo leri sekeriweke eBibeleni leri khumbaka Yesu.
Endzhaku ko pfuxela n’wini wa muti, u nga ha vula swo fana ni leswi:
◼ “Namuntlha hi vutisa vaakelani va hina leswaku i yini lexi va xi ehleketaka loko va hlaya eBibeleni ya vona malunghana ni ku hanya hi laha ku nga heriki. [Yimela nhlamulo.] I mhaka leyi tsakisaka hikuva hi minkarhi ya kwalomu ka 40, Bibele yi vula leswaku leswi swi nga koteka. Xana vutomi byo tano byi nga ha vula yini eka hina? Xiya leswi Nhlavutelo 21:4 yi swi vulaka. [Hlaya.] Xana u swi twile leswi tshembisiwaka? [Yimela nhlamulo.] Xana hi nga byi kumisa ku yini vutomi lebyi nga heriki?” Hlaya Yohane 17:3, ivi u kandziyisa xilaveko xa ku va ni vutivi lebyi kongomeke hi Xikwembu ni N’wana wa xona, Yesu Kreste. Komba n’wini wa muti buku leyi nge Nghwazi, u tirhisa swihlokwana swa xingheniso leswaku u pfurhetela ku tsakela kakwe.
3 Loko n’wini wa muti a nga swi tsakeli ku teka buku leyi yo saseka, fambisa minkandziyiso ya sweswinyana ya Xihondzo xo Rindza ni Xalamuka! kumbe xiphephana lexi nge Xana Misava Leyi Yi Ta Pona? Yisa nyingiso eka yinhla yin’we kumbe timbirhi leti hlamuseriwaka enkandziyisweni. Hlela ku tlhela u vuya hi nkarhi lowunene leswaku mi ta ya emahlweni mi bula hi mhaka yoleyo na yena.
4 Loko n’wini wa muti a tikomba a khomekile, swi nga ha va swinene ku kombisa rungula leri nga laha henhla. Vahuweleri lavantshwa swi nga ha va olovela ku tirhisa rungula leri landzelaka.
Endzhaku ka ku titivisa, hi nga ha ku:
◼ “Namuntlha hi vutisa vaakelani va hina leswaku va ehleketa yini loko va hlaya eBibeleni ya vona malunghana ni ku kuma vutomi lebyi nga heriki. Hi xikombiso, xiya leswi Yesu a swi vuleke eka Yohane 17:3. [Hlaya.] Leswaku ku pfuniwa vanhu va dyondza leswi engetelekeke hi Yesu Kreste ni leswi a swi dyondziseke, ku humesiwe buku leyi.” Pfula buku leyi nge Nghwazi eka swifaniso swin’wana swo saseka. Pfula eka xingheniso, ivi u hlaya ndzimana ya vumbirhi ehansi ka xihlokwana lexi nge “Pfuneka Hi Ku Dyondza Hi Ta Yena.” Byela n’wini wa muti leswaku a nga kuma buku leyi hi munyikelo wa R9,00.
5 Loko u fambisa buku, veka masungulo ya dyondzo ya Bibele hi ku bula hi ndzima yo sungula, “Marungula Yo Huma eTilweni,” hi nkarhi wolowo kumbe eka riendzo ro vuyela endzhaku ka masiku ma nga ri mangani. Ematshan’wini yo byela n’wini wa muti nkarhi wo karhi lowu faneleke ku hetiwa eka riendzo leri landzelaka, u ngo vula ntsena leswaku hi timinete ti nga ri tingani ntsena, a nga dyondza rungula ro tala leri tsakisaka hi Yesu Kreste eRitweni ra Xikwembu, Bibele.
6 Onge hinkwerhu ka hina hi nga tirhisa nguva leyi ya tiholideyi ta misava leswaku hi yisa nyingiso eka ntiyiso wa N’wana wa Xikwembu, Yesu Kreste, leswaku hi pfuna van’wana va nghena endleleni leyi yisaka evuton’wini lebyi nga heriki.—Mt. 7:14.