Vuyela U Ya Pfuna Vanhu Va Dyondza Ndlela Yo Hanya Hi Laha Ku Nga Heriki
1 Ku sukela loko ku humesiwe buku leyi nge Hanya Hi Masiku, ku endliwe tikopi leti tlulaka 65 wa timiliyoni hi tindzimi ta 115. Vunyingi bya lava sweswi va nga malandza ya Yehovha va dyondze ntiyiso wa xisekelo wa Bibele hi buku leyi yo saseka. N’hweti leyi ni leyi landzelaka, hi nga ha va ni nkarhi wa ku fambisa xipfuneto lexi xa dyondzo ya Bibele, kumbexana hi nga ha hlangana ni vanhu lava se va nga na yona ensin’wini.
2 Ku Vuyela Eka Lava Nga Na Yona Buku: Vahuweleri van’wana va ve ni vuyelo lebyinene hi ku hlamusela leswi nga endzeni ka buku kutani va vutisa munhu la tsakelaka leswaku hi xihi xihloko lexi a xi tsakelaka ngopfu. Loko n’wini wa muti a hlawule xihloko, ringanyeta leswaku a hlaya ndzima yoleyo ebukwini u nga si endla riendzo leri landzelaka.
3 Loko swi koteka, hi fanele hi tiyisekisa leswaku ha vuyela. Hi nga si tlhelela hi fanele hi lunghiselela ku bula hi tindzimana ti nga ri tingani ta ndzima leyi n’wini wa muti a yi hlawuleke. Loko a nga hlawulanga nchumu, hi nga sungula eka ndzima 1. Endzhaku ko hlaya tindzimana ti nga ri tingani, hi fanele hi tlakusa xivutiso lexi nga ta hlanganisiwa eka tindzimana leti landzelaka. Sweswo swi ta pfula ndlela ya riendzo rin’wana ro vuyela laha hi nga yisaka dyondzo emahlweni hi buku leyi nge Hanya Hi Masiku.
4 Ina, loko n’wini wa muti a ri ni swivutiso, i swinene ku rhanga hi ku hlamula swona. Hakanyingi tinhlamulo ta swivutiso swakwe ti kona ebukwini. Loko hi tolovelane kahle ni leswi tameriweke hi buku, hi nga ha kota ku pfula tindzimana leti faneleke ivi hi tirhisa mhaka ya kona ku hlamula swivutiso leswi vutisiweke.
5 Ku Vuyela Eka Lava Hi Va Siyeleke Xiphephana: Kumbexana hi siyele n’wini wa muti xiphephana lexi nge Misava Leyintshwa Ya Ku Rhula. Loko hi vuyela, hi nga ha bula hi tindzimana to sungula ta xiphephana.
Loko n’wini wa muti a komba ku tsakela ka ntiyiso, loko hi fika emakun’wini ya ndzimana yo sungula eka tluka 3, laha ku tshahiwaka kona Pisalema 37:29, hi nga ha ku:
◼ “Marito wolawo ma kandziyisa leswi swi hlamuseriwaka eka buku leyi, U Nga Hanya Hi Masiku aParadeyisini eMisaveni. Xiya yinhla leyi nga eka ndzimana 3 ya ndzima 1 ehansi ka xihloko lexi nge ‘Leswi Hi Tshembisaka.’” Kutani hi nga hlaya ndzimana 3, hi vutisa xivutiso lexi nga eka yona, ivi hi ya emahlweni ni tindzimana 4 na 5 hi ndlela leyi fanaka. Kutani hi nga ha vutisa: “Hikwalaho ka yini swiyimo swi nga fambisani ni xikongomelo xa Xikwembu sweswi? Tindzimana leti landzelaka ti hlamusela mhaka yoleyo, naswona ndzi nga tsakela ku vuya vhiki leri taka hi nkarhi lowu fanaka ndzi ta hlamula xivutiso xexo.”
6 Loko hi fambisa buku leyi nge “Hanya Hi Masiku” hi nga ha ku:
◼ “Ndza tshemba leswaku u nga swi tsakela ku va ni buku ya wena yo fana ni leyi. Kutani u nga swi kota ku hlaya ka ha ri emahlweni ivi u kuma swo tala eka bulo ra hina leri landzelaka.” Byela n’wini wa muti leswaku u nga tsakela ku n’wi siyela buku leyi hi munyikelo wa R9,00 (ya mpimo lowutsongo i R4,50).
7 Ku vuyela hi ya pfuna vanhu va dyondza ndlela yo hanya hi laha ku nga heriki i ntirho wa nkoka swinene. Yesu u lerise valandzeri vakwe leswaku va dyondzisa van’wana leswi vona va dyondzisiweke swona. Hi khongela Yehovha leswaku a humesa vatirhi vo tala. Hikwalaho, a hi endleni ntirho wa hina hi ku kuma lava tsakelaka, hi va dyondzisa ku va vatirhi-kulorhi entshovelweni.—Mt. 9:37; 28:19, 20.