Ku Sungula Tidyondzo Ta Bibele Hi December
1 Yesu u byele vadyondzisiwa vakwe leswaku va va vadyondzisi va mahungu lamanene. (Mt. 28:19, 20) Ndlela ya hina leyikulu ya ku dyondzisa van’wana i ku fambisa tidyondzo ta Bibele. Xana wa hlanganyela eka ntirho lowu? Loko swi nga ri tano, xana u nga yi sungurisa ku yini dyondzo leswaku u hlanganyela hi xitalo u dyondzisa van’wana?
2 Kumbexana hi nyike n’wini wa muti xiphephana ivi hi tshembisa ku tlhela hi vuya hi ta bula hi leswi nga endzeni ka xona.
Loko hi tlhelela eka n’wini wa muti loyi hi n’wi siyeleke xiphephana lexi nge “Xana Misava Leyi Yi Ta Pona?,” hi nga ha ku:
◼ “Loko ndzi ri laha eka masiku ma nga ri mangani lama hundzeke, hi bule hi nkoka wa minkarhi ya hina ni leswaku Yesu u swi hlamusele hi ku kongoma swiyimo leswi nga kona namuntlha. Ndzi tsakela ku teka timinete ti nga ri tingani ivi hi ku komisa hi languta rungula leri nga exiphephanini lexi ndzi ku siyeleke xona. Xiya leswi tsariweke ehansi ka xihlokwana lexi nge ‘Xikombiso.’” Pfula eka tluka 3 ra xiphephana, ivi u bula hi tindzimana timbirhi kumbe tinharhu to sungula ehansi ka xihlokwana xexo, u hlaya matsalwa lama kombisiweke loko nkarhi wu pfumela. Kandziyisa ndlela leyi vuprofeta bya Yesu byi hetisekaka ha yona namuntlha. Hlela ku vuya mi ta bula hi tindzimana tin’wana ehansi ka xihlokwana lexi. Khutaza n’wini wa muti ku hlaya mhaka leyi u nga si tlhela u vuya.
3 Kumbexana u nga ha vula swo fana ni leswi:
◼ “Enkarhini lowu hundzeke loko hi bula, ndzi ku siyele xiphephana lexi nge Xana Misava Leyi Yi Ta Pona? Enkarhini wolowo hi vulavule hi xiphemu xa Yesu Kreste etimhakeni ta misava. Hi hlaya marito yakwe lama tsariweke eBibeleni eka Yohane 17:3. [Hlaya.] Tanihi leswi swi nga swa nkoka leswaku hi dyondza hi Xikwembu na Yesu loko hi lava vutomi lebyi nga heriki, swi fanerile leswaku hi tikarhatela ku kuma vutivi byebyo. Loko Yesu a ri emisaveni, u kombise timfanelo to hlamarisa ta Xikwembu. Xana a swi twali ku vula leswaku loko hi ya hi tiva Yesu ni vutirheli byakwe, hi ya emahlweni hi tiva Tata wakwe? [Yimela nhlamulo.] Xiya leswi vuriwaka hi buku leyi, Nghwazi Leyi Tshameke Yi Hanya.” Hlaya ndzimana yo sungula ni ya vumbirhi eka tluka ra vukhume eka ndzima 116. Kandziyisa leswaku buku leyi yi tamele rungula hinkwaro leri nga eka timhaka hinkwato ta Tievhangeli ta mune malunghana na Yesu naswona yi veka mhaka leyi hi ku landzelelana ka swiendlakalo. Kombisa swihloko swa tindzima to karhi, swifaniso ni mepe lowu nga eku sunguleni ka buku. Byela munhu yoloye leswaku u nga tsakela ku n’wi siyela buku leyi yo saseka hi munyikelo wa R9,00.
4 Endzhaku ko pfuxelana ni n’wini wa muti loyi a amukeleke buku leyi nge “Nghwazi,” hi nga ha ku:
◼ “Hi laha ndzi vuleke ha kona eka riendzo ra mina leri hundzeke, buku leyi nge Nghwazi yi hleleriwe dyondzo ya Bibele. Ndzi tsakela ku ku kombisanyana ndlela leyi yi nga tirhisiwaka ha yona hi laha ku humelelaka.” Pfula buku eka ndzima 1, “Marungula Yo Huma eTilweni.” Komba n’wini wa muti swivutiso leswi tsariweke. Hlaya xivutiso xo sungula, ivi mi hlaya tindzimana to rhanga. Hlanganisa xifaniso lexi nga eka tluka ra vumbirhi. Bula hi swivutiso leswi saleke, kutani u kandziyisa tinhlamulo loko nkarhi wu pfumela. U nga si gimeta bulo, hlela ku vuya mi ta yisa bulo emahlweni.
5 Loko hi tshama hi ri ni langutelo lerinene, ni ku lunghiselela kahle ni ku tirhisa nkarhi wun’wana ni wun’wana, hi ta hloma kahle leswaku hi sungula dyondzo ya Bibele hi December.