Bibele—Buku Ya Xikwembu Yo Kongomisa Vanhu Hinkwavo
1 Tibibele leti ringanyeteriwaka kwalomu ka mune wa tibiliyoni ti kandziyisiwile hi tindzimi to tlula 2100 kun’we ni hi tindzimi-mpambukwa, leswi endlaka rito ra xikwembu ri kumeka eka vaaki va misava vo tlula 90 wa tiphesente. kambe, ndlala “ya marito ya [yehovha]” ya ha ri kona emisaveni. (Am. 8:11) Vanhu vo tala lava nga ni Bibele swi nga ha endleka va nga yi hlayi kumbe va nga yi twisisi. Xana hi nga va khutaza hi ndlela yihi leswaku va tirhisa Bibele tanihi nkongomiso lowu pfunaka evuton’wini bya vona?
2 Hi December hi ta fambisa buku leyi nge Bibele—I Rito Ra Xikwembu Kumbe I Ra Munhu? hi munyikelo wa R4,00. Hi nyikiwe mpfumelelo wa ku fambisa New World Translation Of The Christian Greek Scriptures hi tindzimi ta ntlhanu ta laha tikweni hi munyikelo lowu hungutiweke wa R4,00. Hinkwerhu hi khutaziwa ku yi fambisa laha swi faneleke. Leswi swi nga endliwa hi ku kombisa ririmi ra yona ra manguva lawa leri twisisekaka. (Vona buku leyi nge “Matsalwa,” tluka 328, ndzimana 6.) Hi ta kombisa ku tlangela ka hina lokukulu ka nyiko leyi humaka eka Yehovha hi ku hisekela ku pfuna van’wana leswaku va amukela Bibele tanihi buku ya Xikwembu leyi kongomisaka vanhu hinkwavo.
3 U nga ha sungula xingheniso hi ku tirhisa xiphephana lexi nge “Mhaka Leyi U Nga Tshembaka Bibele Ha Yona.” U nga ha ku:
◼ “Hambileswi Bibele yi kumekaka eka vaaki va misava hinkwayo lava tlulaka 90 wa tiphesente, i vanhu va nga ri vangani lava yi hlayaka nkarhi na nkarhi. Xana u ehleketa leswaku hi xihi xivangelo xa kona?” Hlaya tindzimana timbirhi to sungula ta xiphephana lexi, kun’we na 2 Timotiya 3:16. Fambisa buku leyi nge Rito Ra Xikwembu hi munyikelo wa R4,00. Loko yi ariwa, kombela n’wini wa muti leswaku a sala a hlaya xiphephana hinkwaxo. Kandziyisa xihlokwana xa xona xo hetelela lexi nge, “Ku Vhumba Vumundzuku.”
4 Loko u tlhelela eka vanhu lava u va siyeleke xiphephana lexi nge “Mhaka Leyi U Nga Tshembaka Bibele Ha Yona,” u nga ha ringeta leswi:
◼ Endzhaku ka loko u tlhele u titivisa, hlaya tindzimana timbirhi to hetelela ta xiphephana. Vutisa n’wini wa muti loko a tshame a anakanya hi ntshembo wa ku hanya hilaha ku nga heriki emisaveni. Loko a hlamurile, u nge: “Timbhoni ta Yehovha ta tiyiseka leswaku vuprofeta hinkwabyo lebyi kumekaka eBibeleni byi ta hetiseka, ku katsa ni lebyi hlamuselaka vumundzuku lebyi hlamarisaka bya vanhu hinkwavo lava endlaka ku rhandza ka Xikwembu.” N’wi kombe xifaniso lexi nga eka tluka 13 ra broxara leyi nge Leswi Xi Swi Languteleke, tlhelela eka dyondzo 5, ivi u hlamusela tinhlamulo ta swivutiso leswi xaxametiweke, xisweswo u sungula dyondzo.
5 Etindhawini leti nga ni vanhu lava rhandzaka vukhongeri, u nga ha ringeta xingheniso lexi xo sungula:
◼ “Hi khutaza vanhu leswaku va xixima Bibele swinene. Mindyangu yo tala yi na yona Bibele, kambe a hi kanyingi yi yi kambisisa loko yi ri ni swiphiqo leswikulu. Xana u tshama u swi xiya leswi? [Yimela nhlamulo.] Kumbexana va anakanya leswaku Bibele yi hundzeriwe hi nkarhi. Buku leyi, leyi nge Bibele—I Rito Ra Xikwembu Kumbe I Ra Munhu?, yi humesa vumbhoni lebyi khorwisaka bya leswaku Bibele ya pakanisa hi tlhelo ra sayense ni leswaku yi nyikela mintlhantlho leyi pfunaka ya swiphiqo swa namuntlha leswi tshikilelaka.” Kandziyisa tinhla ti nga ri tingani leti nga eka ndzima 8 kumbe ndzima 12 ya buku leyi, ivi u yi fambisa hi munyikelo wa R4,00.
6 Loko u tlhelela laha u fambiseke kona Bibele ni buku leyi nge “Rito Ra Xikwembu,” u nga ha vula leswi:
◼ “Loko ndzi ku endzerile nkarhi lowu nga hundza, hi burisane hi ndlela leyi Bibele yi hi pfunaka ha yona ku ololoxa swiphiqo swa namuntlha leswi rharhanganeke. Lava yi amukeleke tanihi Rito ra Xikwembu va tlhele va pfuniwa leswaku va va ni vutomi bya ntsako, lebyi enerisaka swinene. Ndzi tsakela ku ku kombisa misinya ya milawu ya Bibele leyi pfunaka leyi hlamuseriweke ebukwini leyi ndzi ku siyeleke yona.” Hlamusela wun’wana wa misinya ya milawu ya Matsalwa leyi kumekaka eka ndzima 12, tindzimana 3-6, ivi u gimeta hi ku hlaya ndzimana 7. Loko ku kombisiwa ku tsakela, fambisa dyondzo hi buku leyi nge Vutivi kumbe hi broxara leyi nge Leswi Xi Swi Languteleke.
7 Xingheniso lexi landzelaka xi nga tsakisa vanhu lavakulu:
◼ “Ku tshame ku va na nkarhi lowu Bibele a yi hlayiwa emakaya naswona mindyangu yo tala yi hanyeke hi ku landza misinya ya yona ya milawu. Xana a swi ri tano endyangwini wa ka n’wina? [Yimela nhlamulo.] Namuntlha, swi languteka onge vanhu vo tala a va na wona nkarhi wa ku hlaya Bibele kumbe va vona onge misinya ya yona ya milawu ya mahanyelo yi hundzeriwe hi nkarhi. Ndzima 13 ya buku leyi, leyi nge Bibele—I Rito Ra Xikwembu Kumbe I Ra Munhu?, yi hlamusela mintokoto leyi nga ntiyiso ya vutomi bya vanhu vanharhu lava hanyeke vutomi byo antswa endzhaku ka loko va dyondze Bibele ivi va hundzuka. Loko u tsakela ku hlaya malunghana ni ndlela leyi matimba ya Rito ra Xikwembu ma va pfuneke ha yona, ndzi ta ku siyela buku leyi.”
8 Eriendzweni ro vuyela, u nga ha vula leswi:
◼ “Loko hi vulavula enkarhini lowu nga hundza, hi pfumelelanile leswaku misinya ya milawu ya Bibele ya mahanyelo ya honisiwa hi vanhu va manguva lawa. Xana ku honisiwa loko tano ku fanele ku hi karhata? [Yimela nhlamulo.] Yesu Kreste u kandziyise ngopfu nkoka wa ku amukela vutivi bya Bibele.” Hlaya Yohane 17:3. Kutani hlamusela ndzimana 5 ya ndzima 1 ebukwini leyi nge Vutivi. Hlamusela nongonoko wa hina wa dyondzo ya mahala ya Bibele, ivi u n’wi kombisa ndlela leyi hi dyondzaka ha yona.
9 Kombela Yehovha leswaku a katekisa matshalatshala hinkwawo ya wena ya ku yisa nyingiso eBibeleni—ku nga buku ya Xikwembu yo kongomisa vanhu hinkwavo.