Ha Ku Hulukela!
1 Hi nga ha tshamela ku xwa enhlanganweni wun’we kumbe mimbirhi ya vandlha, hi ehleketa leswaku ‘a ku na munhu la nga ta ndzi hulukela; hambi ku ri ku vona leswaku a ndzi kona.’ Lowu a hi ntiyiso! Ku fana ni xirho xihi na xihi xa miri wa hina wa nyama, un’wana ni un’wana wa hina u ni xiphemu xa nkoka eka matirhelo ya vandlha. (1 Kor. 12:12) Ku xwa ka hina enhlanganweni wa vhiki na vhiki ku nga khumba vuhlayiseki bya van’wana hi tlhelo ra moya. Loko u nga ri kona, swi tive—ha ku hulukela!
2 Xiphemu Xa Nkoka Lexi U Nga Na Xona: Pawulo a a navela ku hlangana ni vamakwavo. Varhoma 1:11, 12 yi hlamusela xivangelo xa kona: “Leswaku ndzi mi avela nyiko yin’wana ya Moya, . . . leswaku hi tiyisana swin’we loko ndzi ri kwaleyo ka n’wina, hi ku pfumela loku mina na n’wina hi nga na kona.” Hilaha ku fanaka, hi tinhlamulo ta hina, hi tinkulumo ta hina enhlanganweni ni hi vukona bya hina, hi endla swo tala leswi akaka van’wana leswaku va hambeta va famba endleleni ya vutshembeki.—1 Tes. 5:11.
3 Xana a wu naveli ku ya vona van’wana eminhlanganweni ya vandlha? Yingisela tinhlamulo ta vona hi vukheta ni ku tlangela marito ya vona lama kombisaka ripfumelo. Tinyiko ta vona ta moya ta ku aka. Loko va nga ri kona enhlanganweni, u ta swi vona leswaku a ku ri ni nchumu wa nkoka lowu a wu kayivela. Vamakwenu va xinuna ni va xisati va titwa hi ndlela leyi fanaka loko na wena u nga ri kona.
4 Xiphemu Xa Nkoka Lexi Minhlangano Yi Xi Hetisisaka: Xihondzo xo Rindza xi tshame xi hlamusela ndlela leyi minhlangano yi nga ya nkoka ha yona ku hi hlayisa hi tlhelo ra moya: “Emisaveni leyi yi hlaseriweke hi madzolonga, leyi nga tikhomangiki kahle, vandlha ra Vukreste i khokholo ra moya hakunene . . . i xichavelo xa ku rhula ni rirhandzu. Xisweswo, vana kona minkarhi hinkwayo eminhlanganweni hinkwayo.” (w93-TS 8/15 11) Siku na siku, hi langutane ni swiyimo leswi hungutaka vumoya bya hina. Loko hi nga tivoneli, hi nga sungula ku hetiwa matimba hi swivilelo swa hina lerova hi nga ha wu voni nkoka wa swilo swa moya. Hinkwerhu ka hina hi titshege hi van’wana leswaku hi kuma xikhutazo lexi hi xi lavaka leswaku hi tshama hi ri ni vun’we ni ku hiseka entirhweni wa Xikwembu.—Hev. 10:24, 25.
5 Vukona bya hina eminhlanganweni i bya nkoka. Minkarhi yin’wana hi nga ha xwa hikwalaho ka vuvabyi kumbe hikwalaho ka swiyimo leswi nga rindzeriwangiki. Handle ka swona, a hi tiyimiseleni ku tshama hi ri kona laha ku nga ni mintshungu leyi hlengeletaneleke ku dzunisa Yehovha!—Ps. 26:12.