Xiyimiso Xa Ndyangu Xa Ku Ya eMinhlanganweni Ya Vandlha

¹ Loko u ri mutswari la nga Mukreste, u lava leswaku vana va wena va kula va ri karhi va rhandza Yehovha ni ku n’wi tirhela, naswona eku heteleleni va kuma vutomi lebyi nga heriki emisaveni leyintshwa leyi a yi tshembiseke. Xana u nga va pfuna njhani leswaku va rhangisa vugandzeri bya Yehovha evuton’wini bya vona? Ndlela leyinene ngopfu i ku va wena n’wini u va xikombiso lexinene eka vona. (Swiv. 20:7) Makwerhu un’wana wa xisati, loko a tsundzuka xikombiso xa mana wakwe la nga Mbhoni, u ri: “A swi nga kali swi lava hi vutisa leswaku ka yiwa eminhlanganweni ke, a hi swi tiva kahle leswaku swo boha ku yiwa.” Sweswo swi dzikile embilwini yakwe.

² Xana ndyangu wa wena wa xi twisisa xikongomelo xa minhlangano ya vandlha? Ndzetelo lowu hi wu kumaka eminhlanganweni leyi wa hi tiyisa leswaku hi hambeta hi endla ku rhandza ka Xikwembu, naswona vunghana lebyi hi tiphinaka ha byona ni vamakwerhu byi hi khutaza ngopfu. (Esa. 54:13; Rhom. 1:11, 12) Hambiswiritano, xikongomelo-nkulu xa minhlangano yoleyo i ku dzunisa Yehovha “emintshungwini leyi hlengeletaneke.” (Ps. 26:12) Minhlangano ya Vukreste yi hi nyika minkarhi yo kombisa ndlela leyi hi n’wi rhandzaka ha yona Yehovha swin’we ni ku n’wi gandzela.

³ “Tshamani Mi Ri Karhi Mi Languta”: Ku tlangela xikongomelo lexo kwetsima xa minhlangano ya hina swi ta hi susumetela ku ‘tshama hi ri karhi hi languta’ leswaku mukhuva wa ku xwa minhlangano ku nga ri na swivangelo leswi twalaka, wu nga hi ngheni hakatsongo-tsongo. (Efe. 5:15, 16; Hev. 10:24, 25) Loko u endla xiyimiso xa wena xa ndyangu, u nga ha sungula hi ku tsala minkarhi ya minhlangano ya vandlha. Kutani u tiyiseka leswaku nkarhi wolowo a wu kavanyetiwi hi swilo swin’wana, naswona ndyangu hinkwawo wu swi teka swi ri swa nkoka ngopfu ku ya eminhlanganweni.

⁴ Hi khumbeka swinene loko hi hlaya hi ta vamakwerhu lava hluleke swihinga leswaku va kota ku va kona eminhlanganweni ni le mintsombanweni. Hambileswi swihinga swa wena swi nga ha vaka swi nga hlamarisi ngopfu, kambe na wena u langutana ni swiphiqo swo karhi. Sathana u ya a tikisela vanhu va Yehovha leswaku va nga ha n’wi gandzeli Yehovha. Kambe swi tive leswaku vana va wena va ta ma vona matshalatshala ya wena yo tiyimisela ku va kona eminhlanganweni ya vandlha nkarhi hinkwawo. Hakunene, loko u endla tano u ta va u va nyika nyiko ya moya leyi va nga taka va nga yi rivali.