Vulavula Hi Yehovha Masiku Hinkwawo
1 Vanhu va tsakela ku vulavula hi swilo hinkwaswo leswi tsakisaka timbilu ta vona, hikuva nomu wu vula leswi mbilu yi teleke swona. (Lk. 6:45b) I yini leswi tsakisaka timbilu ta hina swinene? Mupisalema u tsarile: “Ririmi ra mina ri ta v̌ula ku lulama ka wena, ri ta v̌ula ku ḍuna ka wena hi masiku.” (Ps. 35:28) A a rhandza Yehovha ngopfu naswona ku vulavula hi Xikwembu ni ku xi dzunisa minkarhi hinkwayo a swi teka tanihi lunghelo ra risima. Hikwalaho ka leswi a ri ni vuxaka lebyikulu na Yehovha, mupisalema a ri ni swilo swo tala leswi a swi n’wi tsakisa. (Ps. 35:9) Xana hi nga xi tekelela njhani xikombiso xa yena lexinene?
2 Vulavula Hi Yehovha Ekaya Ra Wena: Yehovha u fanele a va munhu loyi ku vulavuriwaka ha yena ekaya. Vatswari lava rirhandzu ra vona ri enteke ha Yehovha va tikuma va vulavula hi yena emintirhweni ya vona hinkwayo. (Det. 6:5-7) Loko va endla tano, vana va ta swi vona leswaku tata wa vona ni mana wa vona va hanya hi ripfumelo ra vona ni ku tlangela nawu wa Xikwembu. Kutani vana va ta languta dyondzo ya ndyangu ya Bibele yi ri ndlela leyi vatswari va vona va kombisaka ku tinyiketela ka vona ka xiviri eka Xikwembu.—2 Pet. 3:11.
3 Vulavula Hi Yehovha Ni Vamakwenu: Hi nkarhi wa tidyondzo ta hina ta swa le tilweni ta vhiki na vhiki, hi ni malunghelo yo tala yo phamela mianakanyo ni timbilu ta hina hi swakudya swa moya. A hi swi pfumali swilo leswinene swo vulavula ha swona. (Lk. 6:45a) Xana ku ni yinhla leyi u yi kumeke eka dyondzo ya wena ya munhu hi xiyexe kumbe eka ku hlaya ka Bibele ka vhiki na vhiki leyi ku tsakiseke ngopfu? Yi byele vamakwenu, hi ndlela yoleyo u va pfuna ku kurisa rirhandzu ra vona hi Yehovha.—Ps. 35:18; Hev. 10:24.
4 Vulavula Ni Van’wana Hi Yehovha: Nkarhi wihi na wihi lowu hi hlanganaka ni vanhu ha wona—entirhweni, exikolweni ni loko hi ri ni swirho swa ndyangu leswi nga riki vapfumeri—swi fanele swi tikomba leswaku xikongomelo xa hina evuton’wini i ku veka vumbhoni malunghana na Yehovha. Ematshan’wini yo thyakisiwa hi mavulavulelo ni mahanyelo ya misava leyi, ku vulavula ka hina ku fanele ku dzunisa Xikwembu. Masiku hinkwawo, nkarhi wihi na wihi, byela van’wana hi ta mahungu lamanene lawa a hi leriseke ku ma chumayela.—Mint. 5:42; Kol. 4:6.
5 Tanihi vagandzeri va Yehovha va ntiyiso, onge hi nga xalamukela ku vulavula masiku hinkwawo hi Yehovha Xikwembu xa hina lexi nga ringanisiwiki na nchumu.—Ps. 106:47.