Dzunisa Yehovha Nkarhi Hinkwawo
1 Ku ni mintirho yi nga ri yingani leyi nga ya nkoka leyi nkarhi hinkwawo yi lavaka nyingiso wa hina. Eka yona hi katsa ku dya, ku hefemula ni ku lata rimbambu. Leswi i swa nkoka leswaku hi tihlayisa emirini. Muapostola Pawulo u veke ku chumayela mahungu lamanene exiphen’wini lexi fanaka loko a tsundzuxa: “A hi humeseni magandzelo masiku hinkwawo ha yena Yesu, hi dzunisa Xikwembu ha wona.” (Hev. 13:15, xiitaliki i xerhu.) Kutani ke, ku dzunisa Yehovha swi lava nyingiso wa nkarhi na nkarhi. I nchumu lowu hi faneleke ku ringeta ku wu endla siku na siku, hi dzunisa Tata wa hina wa le matilweni nkarhi hinkwawo.
2 Loko van’wana va ringete ku n’wi hambukisela eka swin’wana, Yesu u angule a ku: “Ndzi ya twarisa Evhangeli ya Mfumo wa Xikwembu.” (Lk. 4:43) Enkarhini wa vutirheli byakwe bya malembe manharhu na hafu, hinkwaswo leswi a swi endleke siku rin’wana ni rin’wana a swi fambisana ni ku dzunisa Xikwembu. Ha swi tiva leswaku Pawulo u titwe hi ndlela leyi, mayelana ni mianakanyo leyi a yi phofuleke eka 1 Vakorinto 9:16: “Ndzi ta va ni khombo loko ndzi nga twarisi Mahungu Lamanene!” Vakreste van’wana vo tshembeka va khutaziwe leswaku nkarhi hinkwawo va lunghekela ku lwela ntshembo wa vona eka van’wana. (1 Pet. 3:15) Namuntlha madzana ya magidi ya maphayona lama hisekaka ni timiliyoni ta vahuweleri va vandlha va tiyimisela ku tekelela swikombiso swo tano leswinene.
3 Loko hi xiya ku hiseka hi mbilu hinkwayo loku kombisiweke hi Yesu Kreste, Xikombiso xerhu, hi susumeteleka ku landzela minkondzo ya yena swinene. (1 Pet. 2:21) Minkarhi yin’wana hi nga ha hela matimba loko hi fanele ku langutana ni vutomi bya siku na siku. Xana hi nga wu tirhisa njhani nkarhi hi ndlela leyi humelelaka siku na siku leswaku hi dzunisa Yehovha loko hi ri ni ntirho wo tihanyisa wa nkarhi hinkwawo? Kumbe hi nga tshika mindzhwalo ya ndyangu leyi tekaka nkarhi wa hina wo tala. Vantshwa vo tala va khomekile hi ku ya exikolweni siku na siku. Van’wana va nga ha vona onge a swi koteki ku dzunisa Yehovha erivaleni siku rin’wana ni rin’wana. Minkarhi yin’wana, van’wana va nga ha tshika n’hweti hinkwayo yi hela va nga si vulavula hi mahungu lamanene hi ndlela yo karhi.
4 Yeremiya a a nga ta tlhelela endzhaku. Loko a tsandzekile swa xinkarhana ku vulavula hi vito ra Yehovha, u twe ndzilo lowu nga tiyiselekiki wu pfurha endzeni ka yena. (Yer. 20:9) Loko a langutane ni leswi vonakeke swi ri swihinga leswi n’wi hlulaka, nkarhi hinkwawo Yeremiya a kuma ndlela yo byela van’wana rungula ra Yehovha. Xana hi nga tekelela xikombiso xa yena xa xivindzi kutani hi phikelela ku lavisisa minkarhi yo dzunisa Muvumbi wa hina siku na siku?
5 Ku vulavula ka hina hi Yehovha a ku fanelanga ku hikeriwa eka minkarhi leyi hleriweke ka ha ri na nkarhi wo vula vumbhoni ni vahuweleri van’wana ensin’wini ya vandlha. Lexi hi xi lavaka ko va munhu la nga ta yingisela ntsena. Hi tshama hi ri karhi hi vonana na vanhu siku na siku—va ta emakaya ya hina, hi tirha na vona, hi yima na vona eminxaxamelweni ya le mavhengeleni, kumbe hi khandziya na vona bazi. Lexi lavekaka ko va ku xeweta ka xinghana ni xivutiso lexi tlhontlhaka mianakanyo kumbe ku vula leswi nga ta sungula bulo. Vo tala va kume leswi swi ri endlelo leri humelelaka ro veka vumbhoni. Loko hi ri na nkarhi wo tala wo vulavula ni van’wana hi mahungu lamanene, swi ta va swi nga twali ku tshika n’hweti yi hela hi nga kalanga hi vula vumbhoni bya Mfumo. Nakambe i swa nkoka ku vika ntirho wa hina hi ku hatlisa endzhaku ka n’hweti yin’wana ni yin’wana.
6 Lunghelo ra ku dzunisa Yehovha a ri nge heli. Hi laha mupisalema a kombiseke ha kona, xivumbiwa xin’wana ni xin’wana xi fanele xi dzunisa Yehovha, hakunene hi lava ku n’wi dzunisa. (Ps. 150:6) Loko timbilu ta hina ti hi susumetela ku endla tano nkarhi hinkwawo, masiku hinkwawo hi ta tirhisa malunghelo yo vulavula hi Yehovha ni hi Rito rakwe hi ndlela leyi humelelaka.