Dzunisa Yehovha Siku Ni Siku
1. I yini leswi malandza ya Xikwembu ma tiyimiseleke ku swi endla, naswona ha yini?
1 Hosi Davhida a a tiyimisele ku dzunisa Yehovha “siku hinkwaro,” kumbe hilaha ku nga riki na makumu. (Ps. 145:2, 7, 21) Na hina ku ni swilo swo tala leswi nga hi susumetelaka ku dzunisa Yehovha siku ni siku.—Ps. 37:10; 145:14, 18; 2 Pet. 3:13.
2. I yini leswi mindyangu yo tala yi swi endlaka leswaku yi dzunisa Yehovha siku ni siku?
2 Loko Hi Ri Ekaya: Hi ni minkandziyiso yo tala leyi hi pfunaka leswaku hi va ni mabulo ya le Bibeleni loko hi dyondza ndzimana ya siku, hi endla Dyondzo ya Ndyangu niloko hi ri eku lunghiseleleni ka minhlangano ya vandlha. Mindyangu yo tala yi swi endle mukhuva leswaku siku ri nga heli yi nga hlangananga yi dya swin’we. Leswi swi va pfuna leswaku va va ni mabulo lamanene naswona va kuma nkarhi wa ku dzunisa Yehovha tanihi ndyangu. Timhaka leti ku buriwaka ha tona hi nkarhi wolowo ti nga pfuna vatswari leswaku va kurisa vana va vona “hi ku tshinya ni nkongomiso wa mianakanyo [ya] Yehovha.”—Efe. 6:4; Det. 6:5-7.
3. Loko hi ri ni vamakwerhu, hi pfulekeriwa hi nkarhi wo endla yini?
3 Loko Hi Ri Ni Vamakwerhu: Loko hi ri ensin’wini kumbe hi ri eminhlanganweni ya vandlha hi va ni nkarhi lowunene wo dzunisa Yehovha swin’we ni vagandzeri-kulorhi. (Swiv. 15:30; Filp. 4:8; Hev. 13:15) Leswi hinkwerhu hi n’wi rhandzaka Yehovha, swi ta va swinene leswaku loko hi tidyela mabulo ni vamakwerhu hi kombisa leswaku ha byi tlangela vunene byakwe.—Ps. 106:1.
4. I yini leswi hi nga swi endlaka leswaku hi dzunisa Yehovha hambiloko swi nga hi oloveli ku ya ensin’wini siku ni siku?
4 Loko Hi Vulavula Ni Lava Nga Riki Timbhoni: Vo tala va hina a swi hi oloveli ku ya ensin’wini siku ni siku, kambe loko hi tikarhatela ku byela vanhu lava hi tirhaka na vona, lava hi nghenaka na vona xikolo ni lava hi hlanganaka na vona hi Yehovha ni hi swikongomelo swakwe, hi ta swi kota ku pfuna vanhu va timbilu letinene leswaku va va ni ntshembo. (Ps. 27:14; 1 Pet. 3:15) Loko makwerhu un’wana wa xisati a ri karhi a famba hi xihaha-mpfhuka, u swi kotile ku chumayela munhu loyi a a tshame etlhelo kakwe. Leswi munhu yoloye a nga swi twa, swi n’wi chavelerile ni ku n’wi khutaza lerova a nyika makwerhu loyi wa xisati adirese ni riqingho rakwe leswaku va ta yisa bulo ra vona emahlweni. Leswi swiyimo swa misava leyi swi yaka swi nyanya ku biha, malandza ya Yehovha ma hambeta ma byela vanhu va timbilu letinene hi “mahungu lamanene ya leswo antswa.” Leswi swi nyika van’wana ntshembo naswona swi va pfuna leswaku va dzunisa Yehovha.—Esa. 52:7; Rhom. 15:11.
5. I yini lexi hi susumeteleka ku dzunisa Yehovha naswona ku endla tano swi ta hi vuyerisa hi ndlela yihi?
5 Mawaku ndlela leyi Yehovha a tsakaka ha yona loko a vona malandza yakwe ma n’wi dzunisa siku ni siku! Ku fana ni ntumbuluko wakwe lowu hi rhendzeleke, na hina hi nga swi kota ku dzunisa Yehovha siku ni siku loko hi ri emakaya ya hina, loko hi ri ni vamakwerhu niloko hi ri ni vanhu van’wana lava nga riki Timbhoni.—Ps. 19:1-4.