Ku Hlawuleriwa Ku Va Vadzunisi Lava Tsakeke Emisaveni Hinkwayo
“Ḍunisani Yehova! Ṅwina malanḍa ya Yehova, ḍunisani! Ḍunisani v̌ito ra Yehova!”—PISALEMA 113:1.
1, 2. (a) Hi ku pfumelelana na Pisalema 113:1-3, i mani loyi a faneriwaka hi ku dzunisiwa hi hina hi ku hiseka? (b) I xivutiso xihi lexi faneleke ku vutisiwa?
YEHOVHA XIKWEMBU i Mutumbuluxi Lonkulu wa tilo ni misava, Hosi ya hina Leyikulu ya Vuako Hinkwabyo ni ya minkarhi ni minkarhi. U faneriwa swinene hi ku dzunisiwa hi hina hi ku hiseka. Hi yona mhaka leyi Pisalema 113:1-3 yi hi lerisaka yi ku: “Ḍunisani Yehova! Ṅwina malanḍa ya Yehova, ḍunisani! Ḍunisani v̌ito ra Yehova! A ku nkhensiwe v̌ito ra Yehova, ŝeŝi ni masiku! E ku sukela v̌ušeni e ku fika v̌upeladyambu, a ku v̌ongiwe v̌ito ra Yehova!”
2 Tanihi Timbhoni ta Xikwembu, leswi swa hi tsakisa loko hi swi endla. Vona ndlela leyi swi nyanyulaka ha yona leswi ku nga ri khale Yehovha Xikwembu a nga ta endla leswaku risimu leri ra ntsako ni ro dzunisa leri hi ri yimbelelaka namuntlha, ri tata misava hinkwayo! (Pisalema 22:27) Xana rito ra wena ra karhi ra twiwa eka khwayere leyi leyikulu ya misava hinkwayo? Lokoswiritano, mayana ndlela leyi swi faneleke swi ku tsakisa ha yona ku va u hambanisiwe ni misava leyi leyi nga hava vun’we, yo pfumala ntsako!
3. (a) I yini lexi endlaka vanhu va Yehovha va va vo hlawuleka? (b) Xana hi hlawuriwe hi tindlela tihi?
3 Kunene, ku dzunisa ka hina Yehovha hi vun’we swi hi endla hi va vo hlawuleka. Ndlela leyi hi vulavulaka ni ku dyondzisa ha yona ya pfumelelana, naswona hi tirhisa ndlela leyi fanaka leswaku hi twarisa ‘ku tala ka vunene bya Yehovha.’ (Pisalema 145:7, ringanisa NW.) Ina, tanihi vanhu va Yehovha lava tinyiketeleke, hi hlawuleriwe ku endla ntirho wa Yehovha, Xikwembu xa hina. Xikwembu xi byele vanhu va xona lava tinyiketeleke va le minkarhini ya khale, ku nga Israyele leswaku va ti hlawula eka matiko lama va rhendzeleke ni ku ka va nga thyakisiwi hi mikhuva ya matiko wolawa. (Eksoda 34:12-16) Xi nyike vanhu va xona milawu leyi nga ta va pfuna ku endla leswi. Hilaha ku fanaka, namuntlha Yehovha u hi nyike Rito ra yena lero Kwetsima, ku nga Bibele. Swiletelo swa yona swi hi komba ndlela leyi hi nga tshamaka hi hambanile ni misava leyi ha yona. (2 Vakorinto 6:17; 2 Timotiya 3:16, 17) A hi hambanisiwanga hi ku tshama hi ri hexe etindlwini ta tinghwendza ta vukhongeri ni le tindlwini ta tinghwendza-kati ta vukhongeri, hilaha tinghwendza ni tinghwendza-kati ta Babilona Lonkulu ti nga hakona. Hi ku landzela xikombiso xa Yesu Kreste, hi vadzunisi va Yehovha va le rivaleni.
Tekelela Mudzunisi Wa Yehovha Lonkulu
4. Xana Yesu u xi veke njhani xikombiso eku dzuniseni ka Yehovha?
4 Yesu a nga hundzukanga exikongomelweni xa yena xa ku dzunisa Yehovha. Naswona leswi swi n’wi hambanise ni misava. U dzunise vito ra Xikwembu lero kwetsima emasinagogeni ni le tempeleni ya le Yerusalema. Hambi hi le nhlohlorhini ya tintshava kumbe eribuweni ra lwandle, kun’wana ni kun’wana lomu mintshungu a yi hlengeletana kona, Yesu a a chumayela mintiyiso ya Yehovha erivaleni. U twarisile a ku: “Ndza ku nkhensa Tatana, Hosi ya tilo ni misava.” (Matewu 11:25) Hambiloko a ri eku tengisiweni emahlweni ka Pontiyo Pilato, Yesu u nyikele vumbhoni a ku: “Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso.” (Yohane 18:37) Yesu a a wu tlangela nkoka wa ntirho wa yena. Kun’wana ni kun’wana lomu a kumeka a ri kona, Yesu u veke vumbhoni ha Yehovha ni ku n’wi dzunisa erivaleni.
5. Xana Pisalema 22:22, yi tirha eka vamani, naswona hi fanele hi va ni langutelo rihi?
5 Eka Pisalema 22:22, hi kuma marito lawa ya vuprofeta malunghana ni Mudzunisi wa Yehovha Lonkulu: “Nḍi ta v̌ula v̌ito ra wena eka v̌amakweru; nḍi ta ku twarisa e šikari ka nhlengeletano.” Naswona eka Vaheveru 2:11, 12, muapostola Pawulo u tirhisa tindzimana leti eka Hosi Yesu, ni le ka lava Yehovha Xikwembu a va kwetsimiseleke ku dzuneka ka le tilweni. Kukotisa yena, a va khomiwi hi tingana ku dzunisa vito ra Yehovha exikarhi ka vanhu lava hlengeletaneke. Xana hi ni langutelo leri fanaka loko hi ya eminhlanganweni ya hina ya vandlha? Ku hlanganyela ka hina minhlangano hi ku hiseka, hi mianakanyo ni hi marito ya hina, hi dzunisa Yehovha. Kambe, xana ku dzunisa ka hina loku tsakisaka ku helela kwalaho?
6. I xileriso xihi lexi Yesu a xi nyikeke vadyondzisiwa va yena, naswona varhandzi va ku vonakala va xi dzunisa njhani Xikwembu?
6 Hi ku ya hi Matewu 5:14-16, Hosi Yesu u tlhele a lerisa valandzeri va yena leswaku va endla ku vonakala ka vona ku voninga leswaku van’wana va ta dzunisa Yehovha. U te: “N’wina mi ku vonakala ka misava; . . . Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.” Varhandzi va ku vonakala va dzunisa Xikwembu. Xana va endla leswi hi ku vula ni ku endla swilo leswinene, hi ku endla mintirho leyinene ya vumunhu ntsena? E-e, ku ri ni sweswo, va swi endla hi ku dzunisa Yehovha hi vun’we. Ina, varhandzi va ku vonakala va nyiketela vutomi bya vona eka Xikwembu kutani va va vadzunisi va xona lava tsakeke. Xana se u ri tekile goza leri leri tsakisaka?
Ku Kuma Ntsako Hi Ku Dzunisa Yehovha
7. Hikwalaho ka yini vadzunisi va Yehovha va tsaka swonghasi, naswona i ntsako wihi lowu a va ri na wona hi siku ra Pentekosta ya 33 C.E.?
7 Hikwalaho ka yini vadzunisi va Yehovha va tsaka swonghasi? Hikuva ntsako i muhandzu wa moya wa Xikwembu lowo kwetsima. Eka Vagalatiya 5:22, wu boxiwa endzhaku ka rirhandzu. Vadyondzisiwa va Yesu eka lembe-xidzana ro sungula va kombise muhandzu lowu wa moya wa Yehovha lowo kwetsima. Phela, hi siku ra Pentekosta ya 33 C.E., loko Xikwembu xi chululele moya wa xona eka vadyondzisiwa va Yesu va kwalomu ka 120, hinkwavo ka vona va sungule ku dzunisa Yehovha hi tindzimi to hambana-hambana. Vayuda lava xiximekaka lava teke eYerusalema va huma ematikweni yo tala ‘a va tshukile ni ku hlamala swinene.’ Va huwelerile va ku: “Hi va twa va vula mintirho leyikulu ya Xikwembu hi tindzimi ta ka hina!” (Mintirho 2:1-11) Xana ku dzunisa loku lokukulu ka Yehovha hi tindzimi to tala ku ve ni vuyelo byihi? Kwalomu ka 3000 wa Vayuda ni Vayuda lava ha ku hundzukaka va amukele mahungu lamanene ya Mfumo malunghana na Mesiya. Va khuvuriwile, va amukela moya lowo kwetsima, naswona va engetele marito ya vona hi ku hiseka tanihi vadzunisi va Yehovha lava tsakeke. (Mintirho 2:37-42) Mayana nkateko wo tano!
8. Endzhaku ka Pentekosta, xana Vakreste va endle yini leswaku va engetela ntsako wa vona?
8 Xiviko xi ya emahlweni xi ku: “Masiku hinkwawo a va chivirika ku hlangana eTempeleni, va ri mbilu yin’we, naswona a va hlangana va phema xinkwa emindyangwini ya vona, va dya swakudya swa vona hi ku tsaka lokukulu [h]i timbilu to basa, va ri karhi va dzunisa Xikwembu, va tsakeriwa hi tiko hinkwaro. Kutani siku rin’wana ni rin’wana Hosi a yi engetela nhlengeletano ya vona hi lava a va ri karhi va ponisiwa.” (Mintirho 2:46, 47) Xana lexi a xi va tsakisa swinene a ku ri ku hlengeletana ka vona endhawini yin’we ni ku dya swakudya ntsena? E-e, ntsako wa vona lowukulu a wu tisiwa hi ku dzunisa Yehovha Xikwembu siku ni siku. Naswona ntsako wa vona wu ye wu engeteleka loko va vona vanhu va magidi va angula eka rungula ra vona ra ku ponisiwa. Swi tano na hi hina namuntlha.
Vadzunisi Lava Tsakeke eMatikweni Hinkwawo
9. (a) Xana Xikwembu xi va nyike rini vanhu vamatiko hinkwawo nkarhi wo twa mahungu lamanene, naswona hi ndlela yihi? (b) Hikwalaho ka yini moya lowo kwetsima wu chululeriwe eka Korneliyo ni vanghana va yena lavakulu emahlweni ka nkhuvulo wa vona?
9 Yehovha a a nga lavi swona leswaku ntirho wa malandza ya yena wa ku va vabyarhi va ku vonakala wu helela etikweni rin’we ntsena. Hikokwalaho, ku sukela hi 36 C.E., u nyike vanhu va matiko hinkwawo nkarhi wo twa mahungu yakwe lamanene. Hi ku kongomisiwa hi Xikwembu, Petro u ye ekaya ka ndhuna ya mavuthu ya nyimpi leyi nga munhu Wamatiko le Khezariya. Kwalaho u kume Korneliyo a hlengeletane ni vanghana va yena lavakulu swin’we ni ndyangu wa yena. Loko va ri karhi va yingisela swinene marito ya Petro, va kombisa ripfumelo eka Yesu etimbilwini ta vona. Xana hi swi tivisa ku yini? Hikuva moya wa Xikwembu lowo kwetsima wu xikele ehenhla ka vapfumeri lava nga vanhu va Matiko. Hi ntolovelo nyiko ya Xikwembu ya moya lowo kwetsima a yi nyikiwa ntsena endzhaku ka nkhuvulo, kambe eka xiendlakalo xexo Yehovha u kombise ku amukela ka yena lava nga riki Vayuda emahlweni ka ku nyuperisiwa ka vona ematini. Loko Yehovha a lo ka a nga endlanga sweswo, Petro a a nga ta tiyiseka leswaku Xikwembu sweswi se a xi amukela Vamatiko tanihi malandza ya xona ni leswaku va fanelekela nkhuvulo wa mati.—Mintirho 10:34, 35, 47, 48.
10. Xana a swi vhumbhiwe hi ndlela yihi ku sukela eminkarhini ya khale leswaku vanhu vamatiko hinkwawo a va ta dzunisa Yehovha?
10 Ku sukela eminkarhini ya khale, Yehovha u vhumbhe leswaku vanhu vamatiko hinkwawo a va ta n’wi dzunisa. A a ta va ni vadzunisi lava tsakeke ematikweni hinkwawo. Leswaku a kombisa leswi, muapostola Pawulo u tshahe vuprofeta bya Matsalwa ya Xiheveru. U byele nhlengeletano ya misava hinkwayo ya Vukreste eRhoma a ku: “Amukelanani, kukotisa leswi Kriste na yena a mi amukeleke, eku dzuniseni ka Xikwembu. Hikuva ndza mi byela leswaku Kriste ú ve nandza eka Vayuda, ku kombisa ku tshembeka ka Xikwembu, ni ku endla leswaku switshembiso leswi nga nyikiwa vakokwana swi hetiseka, ni leswaku vamatiko va ta kota ku dzunisa Xikwembu hikwalaho ka tintswalo ta xona, hilaha swi tsariweke hakona [eka Pisalema 18:49] va ku: ‘Hikokwalaho, ndzi ta ku dzunisa exikarhi ka vamatiko, ndzi ta yimbelela ndzi twarisa vito ra wena.’ Nakambe, a ku [eka Deteronoma 32:43]: ‘N’wina vamatiko, tsakani, swin’we ni vanhu va Xikwembu.’ Nakambe, va ku [eka Pisalema 117:1]: ‘N’wina vamatiko hinkwenu, dzunisani Hosi, vanhu hinkwavo a va yi dzunise.’” (Xiitaliki i xerhu.)—Varhoma 15:7-11.
11. Xana Xikwembu xi va pfunise ku yini vanhu vamatiko hinkwawo leswaku va dyondza mintiyiso ya xona, naswona ku ve ni vuyelo byihi?
11 Vanhu a va nge swi koti ku dzunisa Yehovha hi vun’we handle ka loko vo veka ntshembo wa vona eka Yesu Kreste, loyi Xikwembu xi n’wi hlawuleke leswaku a fuma vanhu vamatiko hinkwawo. Leswaku xi va pfuna ku twisisa mintiyiso ya xona leyi yisaka evuton’wini lebyi nga heriki, Xikwembu xi veke nongonoko wa ku dyondzisa wa matiko hinkwayo. Xi nyikela nkongomiso wa xona hi ku tirhisa ntlawa wa nandza wa xona lowo tshembeka. (Matewu 24:45-47) Ku va ni vuyelo byihi? Ku tlula ntlhanu wa timiliyoni ta marito ya vadzunisi lava tsakeke ma yimbelela swidzuniso swa Yehovha ematikweni yo tlula 230. Naswona vanhu va timiliyoni va kombisa ku tsakela ku endla leswi fanaka. Vona leswaku i vangani lava veke kona eXitsundzuxweni hi 1996: 12 921 933. Swa hlamarisa hakunene!
Ntshungu Lowukulu Wa Vadzunisi Lava Tsakeke Wu Vhumbhiwile
12. Hi xihi xivono lexi tsakisaka lexi muapostola Yohane a xi voneke, naswona hi wihi ntiyiso wa xona?
12 Exivonweni, muapostola Yohane u vone “ntshungu lowukulu wa vanhu” lava humaka ematikweni hinkwawo. (Nhlavutelo 7:9) Xana hi yihi nhloko-mhaka ya swidzuniso leswi ntshungu lowu lowukulu wu swi yimbelelaka swin’we ni masalela ya Xikwembu lama totiweke? Yohane wa hi byela: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!” (Nhlavutelo 7:10) Leswi swi karhi swa huweleriwa hi xivindzi eswiphen’wini hinkwaswo swa misava. Hi ririmi ro fanekisela, hi tamele marhavi ya mincindzu, hi dzunisa Xikwembu tanihi Hosi Leyikulu ya Vuako Hinkwabyo naswona hi ntsako hi phofula eka tilo ni misava leswaku ku ponisiwa ka hina ‘ku titshege’ eka xona ni le ka N’wana wa xona, ku nga Xinyimpfana, Yesu Kreste. Oho, vona ntsako lowu muapostola Yohane a veke na wona loko a ri karhi a vona xivono lexi lexi tsakisaka xa ntshungu lowukulu! Naswona vona ntsako lowu hi nga na wona namuntlha loko hi ri karhi hi vona ni ku va xiphemu xa xiviri xa leswi Yohane a swi voneke!
13. I yini lexi hambanisaka vanhu va Yehovha ni misava?
13 Tanihi malandza ya Yehovha, hi byarha vito ra yena hi ku tinyungubyisa. (Esaya 43:10, 12) Ku va hi ri Timbhoni ta Yehovha swi hi endla hi hambana ni misava leyi. Mayana ntsako wonghasi wo byarha vito ra Xikwembu leri hlawulekeke ni ku endla ntirho wa xona tanihi xikongomelo xa hina evuton’wini! Xikongomelo-nkulu xa Yehovha xa ku kwetsimisa vito ra yena lero kwetsima ni ku lwela vuhosi bya yena bya vuako hinkwabyo hi ku tirhisa Mfumo, swi ve nchumu lowukulu evuton’wini bya hina. Naswona u hi pfunile leswaku hi hoxa xandla exikongomelweni xa Xikwembu malunghana ni vito ra xona ni Mfumo wa xona. Leswi u swi endle hi tindlela tinharhu.
Ku Byarhisiwa Ntiyiso
14, 15. (a) Hi yihi ndlela yin’wana leyi Xikwembu xi hi pfuneke ha yona leswaku hi hoxa xandla exikongomelweni xa xona malunghana ni vito ra xona ni Mfumo wa xona? (b) Xana Mfumo lowu simekiweke hi 1914 C.E. wu hambana njhani ni lowu wisiweke hi 607 B.C.E.?
14 Xo sungula, Yehovha u byarhise vanhu va yena ntiyiso. Ku paluxiwa loku tsakisaka swinene hileswaku Mfumo wolowo wu sungule ku lawula hi 1914. (Nhlavutelo 12:10) Hulumendhe leyi ya le tilweni yi hambanile ni mfumo wo fanekisela wa le Yerusalema, laha tihosi a ti vekiwa eswiluvelweni swa vuhosi hi ku ya hi nxaxamelo wa Davhida. Mfumo wolowo wu wile, naswona ku sukela hi 607 B.C.E., Yerusalema ri ve ehansi ka vulawuri bya mimfumo ya misava ya Vamatiko hilaha ku heleleke. Mfumo lowuntshwa lowu Yehovha a wu simekeke hi 1914 i mfumo wa le tilweni lowu nga ta ka wu nga nyikiwi munhu un’wana, kambe wu ta va wa Yehovha ntsena, naswona a wu nga herisiwi. (Daniyele 2:44) Nakambe, vulawuri bya wona a byi fani ni byin’wana. Hi ndlela yihi? Nhlavutelo 11:15 ya hlamula: “Ku twakala ni marito lama huwelelaka hi le tilweni ma ku: ‘Matimba ya ku fuma misava, sweswi ma nyikiwile Hosi ya hina ni Mesiya wa yona, kutani ú ta fuma hilaha ku nga heriki.’”—Xiitaliki i xerhu.
15 ‘Mfumo wa Hosi ya hina ni wa Kreste wa yona’ wu fuma ehenhla ka misava hinkwayo ya vanhu. Nhlamuselo leyi leyintshwa ya vuhosi bya Yehovha, lebyi katsaka N’wana wa yena wa Vumesiya, ni vamakwavo va Yesu va 144 000, lava vunyingi bya vona se va pfuxeriweke eku kwetsimeni ka le tilweni, a ko va dyondzo yo karhi ya xiyenge lexi tlakukeke ntsena—dyondzo ya mianakanyo leyi swichudeni swi nga ha rhandzaka ku bula ha yona. E-e, Mfumo lowu wa le tilweni i hulumendhe ya xiviri. Naswona ku langutela ka hina loku tsakisaka ko hanya vutomi lebyi hetisekeke hilaha ku nga heriki hikwalaho ka vulawuri bya wona swi hi nyika xivangelo lexikulu xo hambeta hi tsakile. Hikwalaho ko va hi nyikiwe mintiyiso ya Rito ra Yehovha, nkarhi hinkwawo swi hi susumetela leswaku hi vulavula ha rona hi ndlela leyinene. (Pisalema 56:10) Xana wa swi endla sweswo nkarhi na nkarhi hi ku byela un’wana ni un’wana leswaku Mfumo wa Xikwembu wa Vumesiya sweswi wa lawula etilweni?
Ku Pfuniwa Hi Moya Lowo Kwetsima Ni Hi Vumakwerhu Bya Misava Hinkwayo
16, 17. Hi yihi ndlela ya vumbirhi ni ya vunharhu leyi Xikwembu xi hi pfuneke ha yona leswaku hi hoxa xandla exikongomelweni xa xona?
16 Ndlela ya vumbirhi leyi Xikwembu xi hi pfuneke ha yona leswaku hi hoxa xandla exikongomelweni xa xona i ku hi nyika moya wa xona lowo kwetsima, lowu hi endlaka hi swi kota ku humesa mihandzu ya wona leyinene evuton’wini bya hina leswaku hi amukeriwa hi xona. (Vagalatiya 5:22, 23) Ku tlhandlekela kwalaho, Pawulo u tsalele Vakreste lava totiweke a ku: “Hi amukerile Moya lowu humaka eka Xikwembu, leswaku hi ta tiva hinkwaswo leswi hi nyikiweke swona hi Xikwembu.” (1 Vakorinto 2:12) Hi ku angula ka hina eka moya wa Yehovha, sweswi hinkwerhu ka hina hi nga swi kota ku tiva ni ku twisisa swilo leswinene leswi nga kona sweswi, leswi xi hi nyikeke swona hi tintswalo—switshembiso swa xona, milawu ya xona, misinya ya milawu ya xona ni swin’wana.—Ringanisa Matewu 13:11.
17 Loko yi ri ndlela ya vunharhu leyi Xikwembu xi hi pfunaka ha yona, hi ni vumakwerhu bya hina bya misava hinkwayo ku katsa ni lunghiselelo leri tsakisaka swinene ra nhlengeletano ya Yehovha ra vugandzeri. Muapostola Petro u vulavule ha yona loko a hi khongotela ku ‘rhandza nhlengeletano ya misava hinkwayo ya vamakwerhu.’ (1 Petro 2:17) Ku rhandza ka hina ndyangu wa misava hinkwayo wa vamakwerhu va xinuna ni va xisati swi hi pfuna ku tirhela Yehovha hi ntsako lowukulu lowu humaka embilwini, hilaha Pisalema 100:2 yi lerisaka hakona: “Tirelani Yehova hi ku ṭaka, mi ta e mahlweni ka yena hi ku ṭaka lo’kukulu!” Ndzimana 4 yi ya emahlweni yi ku: “Nghenani tinyangweni ta yena hi minkhenso, ne makupakupeni ya yena hi tinsimu; ṅwi ḍuniseni, mi v̌onga v̌ito ra yena!” Kutani, hambi hi le ku chumayeleni ka le rivaleni kumbe ku va kona eminhlanganweni ya hina, hi nga va ni ntsako. Vona ku rhula ni nsirhelelo lowu hi wu kumeke eswivaveni leswo saseka swa le tempeleni ya Yehovha ya moya!
Dzunisa Yehovha Hi Ntsako!
18. Hikwalaho ka yini hi fanele hi tsaka loko hi ri karhi hi dzunisa Yehovha ku nga khathariseki ku xanisiwa kumbe swiphiqo swin’wana leswi hi hlaselaka?
18 Ku nga khathariseki leswaku ku ni swiyimo swihi swo nonon’hwa, nxaniso, kumbe swiphiqo swin’wana leswi nga ha hi hlaselaka, a hi tsakeni leswi hi nga endlwini ya Yehovha ya vugandzeri. (Esaya 2:2, 3) Tsundzuka leswaku ntsako i mfanelo ya mbilu. Vamakwerhu vo sungula va xinuna ni va xisati va Vukreste a va ri vadzunisi va Yehovha lava tsakeke ku nga khathariseki ku nonon’hweriwa ko tala ni ku lahlekeriwa loku va hlangavetaneke na kona. (Vaheveru 10:34) Vapfumeri-kulorhi namuntlha va fana na vona hilaha ku heleleke.—Matewu 5:10-12.
19. (a) Hi swihi swileriso leswi phindha-phindhiweke leswi hi susumetelaka ku dzunisa Yehovha? (b) Xana vutomi bya hina lebyi nga heriki byi titshege hi yini, naswona xana ku tiyimisela ka hina hi kwihi?
19 Hinkwerhu ka hina lava hi tirhelaka Yehovha hi tsakela ku yingisa swileriso swa Bibele swo va hi n’wi dzunisa. Hi ku phindha-phindha buku ya Nhlavutelo yi veka swidzuniso swa Xikwembu hi ndlela yo komisa hi marito lama nge “Dzunisani Jah!” (Nhlavutelo 19:1-6, NW) Eka tindzimana ta tsevu ta Pisalema 150, hi byeriwa ku dzunisa Yehovha minkarhi yo ringana 13. Lexi i xikombelo xa vuako hinkwabyo eka swivumbiwa hinkwaswo leswaku swi hlanganyela eku yimbeleleni ka swidzuniso swa Yehovha. Vutomi bya hina lebyi nga heriki, byi titshege hi ku hlanganyela ka hina eka risimu leri lerikulu ra Aleluya! Ina, vanhu lava nga ta hanya hilaha ku nga heriki hi lava dzunisaka Yehovha handle ko karhala. Hikokwalaho, leswi makumu ma tshinelaka, a hi tiyimiseleni ku namarhela swinene eka nhlengeletano ya yena leyi tshembekeke ya misava hinkwayo. Kutani, hi nga va ni ntshembo wo vona ku hetiseka ka marito yo hetelela ya Pisalema 150 hi xitalo: “Le’ŝi hefemulaka hikwaŝo a ŝi ḍunise Yehova. Ḍunisani Yehova!”
A Wu Ta Hlamurisa Ku Yini Xana?
◻ I yini lexi endlaka vanhu va Yehovha va va vo hlawuleka?
◻ Hikwalaho ka yini malandza ya Yehovha ma tsaka swonghasi?
◻ I yini lexi hi hambanisaka ni misava?
◻ Xana hi tihi tindlela tinharhu leti ha tona Xikwembu xi hi pfuneke leswaku hi hoxa xandla exikongomelweni xa xona?
[Xifaniso lexi nga eka tluka 17]
Kun’wana ni kun’wana lomu a kumeka a ri kona, Yesu u veke vumbhoni ha Yehovha ni ku n’wi dzunisa erivaleni