Xana U Ta Dzunisa Yehovha?
“HI LAHA v̌ito ra wena ri v̌ongiwaka, oho Šikwembu! Ŝi tano ni ku ḍuna ka wena e ku yisa e makuṅweni ya misav̌a.” Lawa i marito ya risimu ra vuprofeta ra vana va Kore. (Pisalema 48:10) Namuntlha, ntlawa wa vuyimbeleri bya matimba, wa timiliyoni wa Timbhoni ta Yehovha, wu dzunisa Xikwembu ni ku endla leswaku vito ra xona ri tiviwa hi ku chumayela mahungu lamanene ya Mfumo wa xona. Hi ku endla leswi eka matiko ya 232, ni le swihlaleni swa lwandle, ni hi tindzimi leti tlulaka 300, hi ku kongoma va fikelela ‘makumu ya misava.’
I yini lexi susumetelaka vanhu va xisekelo lexi hambaneke xa ndhavuko, swiyimo ni tindzimi, leswaku va dzunisa Yehovha? Ku tlangela ka vona vutivi lebyi kongomeke bya Rito ra Xikwembu, Bibele, i xivangelo lexikulu. Ntiyiso wa moya wu va tshunxile eka vukholwa-hava ni le vuhlongeni bya tidyondzo ta vukhongeri to tanihi ku xanisiwa hi laha ku nga heriki. (Yohane 8:32) Nakambe ntiyiso wu va pfuna ku twisisa timfanelo leti hlamarisaka ta Xikwembu, to tanihi rirhandzu, matimba ni vululami bya xona, leswi taleke hi tintswalo. Ku twisisa leswaku ha yini Xikwembu xi nyikele hi N’wana la nga un’we wa xona, Yesu Kreste, tanihi gandzelo ra nkutsulo ra vanhu swi susumetela vanhu, lava lulameke ku dzunisa ni ku tirhela Yehovha.
Hi ku ya hi buku ya Bibele ya Nhlavutelo, ntlawa wa vayimbeleri wa le tilweni wu ri: “We Hosi, Xikwembu xa hina u lulameriwile hi ku amukela ku twala, ni ku dzunisiwa, ni matimba, hikuva hi wena Muendli wa swilo hinkwaswo, kutani hi ku rhandza ka wena swi tumbulukile, swi kuma ku hanya.” (Nhlavutelo 4:11) Ku dzunisa ko tano a ku vi kona hikwalaho ko titwa u boheka. Ematshan’wini ya sweswo, ku vangiwa hi xichavo lexikulu eka Yehovha.
Dzunisa Xikwembu Hi Ku Vula Mahungu Lamanene
Loko a dzunisa Yehovha, munhu u landzelela xikombiso lexikulu xa Yesu Kreste, mudzunisi lonkulu wa Xikwembu. Ku landzelela mintila ya Yesu swi katsa ku hlanganyela entirhweni wo chumayela mahungu lamanene ya Mfumo wa Xikwembu. (Matewu 4:17, 23; 24:14) Ntirho lowu wo chumayela wu ve nchumu lowukulu wo dzunisa Yehovha emisaveni hinkwayo.
Ntirho wo chumayela i wa nkoka ngopfu lerova handle ko kanakana Bibele yi wu hlanganisa ni ku pona. Varhoma 10:13-15 yi hlayeka hi ndlela leyi: “‘Un’wana ni un’wana la khongelaka vito ra Hosi, ú ta ponisiwa.’ Kambe va ta khongerisa ku yini eka loyi va nga pfumelangiki ka yena xana? Va ta pfumerisa ku yini eka loyi va nga twangiki ta yena ke? Va ta ti twisa ku yini, loko va nga ri na mudyondzisi xana? Kutani vanhu va ta dyondzisisa ku yini, loko va nga rhumiwanga ke? Hilaha ku tsariweke hakona va ku: ‘A hi ku tsakisa ku vona lava taka, va tisa Mahungu Lamanene!’”
Lembe leri hundzeke ntsena, Timbhoni ta Yehovha ti nyikele tiawara leti tlulaka gidi ra timiliyoni entirhweni wo chumayela. Naswona ku ve ni vuyelo lebyinene ngopfu hikwalaho ko dzunisa Xikwembu! Vanhu va kwalomu ka 314 000 va hlanganyerile eka risimu ro dzunisa hi ku kombisa ku tinyiketela ka vona eka Yehovha hi ku khuvuriwa ematini.
Hambi swi ri tano, ku nga vuriwa yini hi vanhu va kwalomu ka 12 288 917 lava veke kona eXitsundzuxweni xa rifu ra Kreste hi 1994? Exikarhi ka vona a ku ri ni 7 000 000 wa vona lava nga siki dzunisaka Yehovha tanihi vachumayeri va mahungu lamanene. Kambe vukona bya vona eka xiendlakalo lexi xo hlawuleka, eku heteleleni ku nga ha endla leswaku ku engeteleka timiliyoni ta ntlawa wa vadzunisi. Xana ku nga endliwa yini leswaku ku pfuniwa lava tsakelaka leswaku va va vadzunisi va Yehovha?
Mpfuno Lowu Kumekaka
Vanhu vo tala lava tsakelaka va nga ha navela ku dzunisa Yehovha kambe va titwa onge a va nge swi fikeleli swilaveko swa kona. Swi nga va swinene loko vo tsundzuka marito ya mupisalema: “Nḍi tlakusela mahlo ya mina e tinṭhaveni . . . . Ku pfuna ka mina ku ta huma kwihi? Ku pfuna ku ta huma e ka Yehovha l’a endleke tilo ni misav̌a.” (Pisalema 121:1, 2) Entiyisweni, mupisalema u tlakusele mahlo ya yena etintshaveni ta Yerusalema laha tempele ya Yehovha ni xiluvelo xa yena xa laha misaveni xa mfumo wa le tilweni a swi ri kona. Hi ku xiya leswi, hi nga heta hi ndlela leyi faneleke hi ku vula leswaku mpfuno lowu lavekaka wa ku dzunisa Xikwembu ni ku twarisa rungula ra Mfumo wu huma eka Yehovha ni nhlengeletano yakwe ntsena.—Pisalema 3:4; Daniyele 6:10.
Namuntlha, lava va navelaka ku dzunisa Yehovha va nga amukela mpfuno wa rirhandzu eka nhlengeletano ya yena ya laha misaveni. Hi xikombiso, Timbhoni ta Yehovha ti nyikela mpfuno hi ku fambisa tidyondzo ta le kaya ta mahala ta Bibele ni vanhu lava tsakelaka. Nongonoko lowu wa dyondzo a wu katsi ku dyondza tidyondzo ta Bibele ntsena. Wu pfuna xichudeni ku kurisa ku twisisa leswi xi swi dyondzaka ni nhlengeletano leyi Yehovha a yi tirhisaka.
Hi ku pfumelelana ni leswi, Mbhoni leyi fambisaka dyondzo ya Bibele yi ringeta ku tiyiseka leswaku ntiyiso lowu wa ha ku kumiwaka a wu fikeleli mianakanyo ntsena kambe wu fikelela ni mbilu. Naswona mudyondzisi a nga fanelanga a tshika ku komba xichudeni ndlela leyi Yehovha a tirhisaka nhlengeletano ya Yena ha yona ku hetisisa xikongomelo xa Yena hi misava. Broxara leyi nge Timbhoni ta Yehovha Ti Endla Ku Rhandza Ka Xikwembu Hi Vun’we eMisaveni Hinkwayo na khasete ya vhidiyo leyi nge Jehovah’s Witnesses—The Organization Behind the Name hakanyingi ti tikombe ti ri ni mpfuno eku hetisiseni ka leswi.
Minhlangano ya Vukreste na yona i ya nkoka eku pfuneni ka lava lavaka ku va vadzunisi va Yehovha. Emasungulweni ya dyondzo ya Bibele, xichudeni xi nga ha rhamberiwa eminhlanganweni ya Vukreste. Hi ku famba ka nkarhi, xi ta dyondza nkoka wa ku va kona nkarhi hinkwawo ni ku hlamula eminhlanganweni hinkwayo ya vandlha. (Vaheveru 10:24, 25) Valanguteri va nga nyikela mpfuno wa nkoka eka vapfumeri-kulobye ni le ka lava lavaka ku va vadzunisi va Yehovha hi ku lunghiselela minhlangano leyi akaka ni leyi pfunaka hi tlhelo ra moya.
Pfuna Vana Leswaku Va Dzunisa Yehovha
Vana va le xikarhi ka vunyingi lebyi nga vaka vahuweleri va mahungu lamanene enkarhini wu nga ri wungani lowu taka. Ngopfu-ngopfu vatatana va ni vutihlamuleri lebyi humaka eBibeleni byo kurisa vana va vona “hi ku va laya ni ku va dyondzisa ta Hosi.” (Vaefesa 6:4) Loko va dyondzisiwe kahle hi vatswari lava chavaka Xikwembu, hambi ku ri vana lavatsongo va nga kurisa ku navela ka vona ku dzunisa Yehovha.
Xinhwanyatana xin’wana eArgentina xi tshinelele vakulu va vandlha hi ku phindha-phindha tin’hweti to hlaya, xi kombela mpfuno wa vona leswaku xi ta fanelekela ku va muhuweleri wa Mfumo. Hi ku famba ka nkarhi, vatswari va xona ni vakulu va pfumerile leswaku xi va muhuweleri la nga khuvuriwangiki. Ana se xi nyikela rungula ra Mfumo hi ku hiseka emakaya. Hambi leswi xinhwanyatana lexi xi nga ni malembe ya ntlhanu ntsena hi vukhale naswona xi nga tiviki ku hlaya, xi nhlokohate laha tindzimana tin’wana ta Bibele ti kumekaka kona. Endzhaku ko kuma tsalwa, xi kombela n’wini wa muti leswaku a hlaya kutani xi ri hlamusela.
Swi le rivaleni leswaku vakulu ni vatswari va nga endla leswinene hi ku khutaza ni ku pfuna lava endlaka nhluvuko wa ku dzunisa Yehovha.—Swivuriso 3:27.
Vuxaka Lebyi Nga Heriki Na Yehovha
Hambi swi ri tano ku vuriwa yini hi loko u ri ni nkarhi wo leha u ri karhi u hlanganyela ni Timbhoni ta Yehovha kambe u nga si hlanganyela na tona entirhweni wo chumayela? Swi nga va swa nkoka ku tivutisa swivutiso leswi landzelaka: ‘Xana ndza pfumela leswaku ndzi kume ntiyiso ni leswaku Yehovha i Xikwembu xi ri xoxe xa ntiyiso? Xana ndza tiyiseka leswaku Mfumo wa Yehovha hi yona ndlela yi ri yoxe yo lulamisa swiphiqo swa vanhu? Xana ndzi byi tshikile vukhongeri hikwabyo bya mavunwa ni mindhavuko ni mikhuva ya misava, leswi nga n’wi tsakisiki Yehovha? Xana ndzi na rona rirhandzu ra xiviri eka Xikwembu ni swilaveko swa xona leswi lulameke?’ (Pisalema 97:10) Loko hi ku tshembheka u nga vula u ku ina eka swivutiso leswi, i yini lexi ku sivelaka ku dzunisa Yehovha?—Ringanisa Mintirho 8:36.
Ku dzunisa Yehovha a swi katsi ku chumayela mahungu lamanene ntsena. Loko u ri ni vutivi lebyi kongomeke, u ri ni ripfumelo ra ntiyiso naswona u pfumelelanisa vutomi bya wena ni swilaveko swa Xikwembu, u fanele u tiyisa vuxaka bya wena ni Xikwembu. Njhani? Hi ku tinyiketela eka xona hi xikhongelo kutani u kombisa leswi hi ku khuvuriwa ematini. Vutomi lebyi nga heriki byi nga ha ku lahlekela. Hikwalaho, tirhisa ndzayo ya Yesu sweswi: “Nghenani hi nyangwa leyo khuma, hikuva nyangwa leyi yisaka eku loveni yi ahlamile, ni ndlela leyi yaka kona, yi anamile, kutani lava nghenaka hi yona va tele. Kasi nyangwa leyi yisaka evutomini yi khumile swinene, ni ndlela leyi yaka kona yi larile, kutani lava va yi kumaka a va talanga.”—Matewu 7:13, 14.
Tanihi leswi mafambiselo ya sweswi ya swilo ma tshinelaka emakumu ya wona lama chavisaka, lowu a hi wona nkarhi wo kokela endzhaku. Teka magoza ya xihatla yo endla vuxaka lebyi nga heriki na Yehovha. Hakunene, sweswi i nkarhi wo angula kahle eka xivutiso lexi nge, Xana u ta dzunisa Yehovha?