Yehovha U Ta Ponisa Misava

RIVALA ra Swihaha-mpfhuka leri kumekaka exihlaleni xa Maldives ri pfariwa tiawara ti nga ri tingani siku na siku. Ha yini? Hikuva mati ya magandlati loko ma ri ehenhla swinene ma pfala ndlela, ma endla leswaku swihaha-mpfhuka swi nga swi koti ku phatsama. Vativi van’wana va sayense va le ku chaveni ka leswaku mpimo wa mati ya lwandle eswihlaleni swa Maldive ma nga ha tshuka ma tlakuka hi mitara yin’we eka lembe-xidzana leri taka. Hambi leswi wu tikombaka wu ri mpimo lowu nga nyawuriki, ku tlakuka ko tano ku nga kukula matiko ya nkombo ya swihlala hi ku helela. Hakunene, hi ku ya hi UN Chronicle, ku tlakuka ka timitara timbirhi ku nga ha khubumeta ntlawa hinkwawo wa swihlala, swihlala swa kwalomu ka 1 200!

Xana ku tlakuka loku ka mati ya lwandle ku vangiwa hi yini? Hi ku ya hi Nongonoko wa Mbangu wa Nhlangano wa Matiko, nthyakiso wa moya wa misava hi tigasi leti hisisaka misava swi vanga leswaku malwandle lama nga ematikweni lama hisaka ma kukumuka, ku n’oka ayisi ni mapapa ya gwitsi, ivi, mimpimo ya mati ya lwandle yi tlakuka. Nhlangano wa Panos lowu kumekaka eLondon wu vula leswaku nthyakiso “wu nga ha va wu vange mhangu ya misava hinkwayo leyi taka hakatsongo-tsongo leyi cincaka vugimamusi bya tiko ni lwandle.”

Vukona bya ku hisa ka misava ka ha ri njhekanjhekisano exikarhi ka vativi va sayense. Hambi swi ri tano, hi nga tiyiseka leswaku swiphiqo swa mbango a swi nge xi siveli xikongomelo xa Xikwembu. Bibele yi ri: “Misav̌a yi tiyile yi nga ka yi nga ṭekaṭeki.” (1 Tikronika 16:30) Yehovha u lawula mbango wa misava, naswona hi nga tsaka hikuva ku nga ri khale u ta ponisa misava ni vanhu, leswaku swi nga lovi.—Pisalema 24:1, 2; 135:6; 2 Petro 3:13.

[Laha Xifaniso Xi Humaka Kona eka tluka 31]

Drawing based on NASA photo