‘I Mani La Fanaka Na Yehovha Xikwembu Xa Hina?’
“I mani l’a fanaka na Yehova, Šikwembu ša hina, l’a akeke šiv̌andleni ša le henhla-henhla?”—PISALEMA 113:5.
1, 2. (a) Xana Timbhoni ta Yehovha ti languta Xikwembu na Bibele hi ndlela yihi? (b) I swivutiso swihi leswi faneleke ku xiyiwa?
VADZUNISI va Yehovha va katekile hakunene. I lunghelo lerikulu swonghasi ku va exikarhi ka ntshungu lowu wu tsakeke! Tanihi Timbhoni ta yena, hi amukela switsundzuxo, milawu, tidyondzo, switshembiso ni vuprofeta bya Rito ra Xikwembu, ku nga Bibele. Ha tsaka ku dyondza Matsalwa ni ku ‘dyondzisiwa hi Yehovha.’—Yohane 6:45.
2 Hikwalaho ka xichavo xa tona lexikulu eka Xikwembu, Timbhoni ta Yehovha ti nga vutisa ti ku: “I mani l’a fanaka na Yehova, Šikwembu ša hina?” (Pisalema 113:5) Marito wolawo ya mupisalema ma kombisa ripfumelo. Kambe ha yini Timbhoni ti ri na ripfumelo ro tano eka Xikwembu? Naswona xana ti ni swivangelo swihi swo dzunisa Yehovha?
Ripfumelo Ni Ku Dzunisa Swi Fanerile
3. Tipisalema ta ku Dzunisa i yini, naswona ha yini ti vitanisiwa sweswo?
3 Ripfumelo eka Yehovha ri kombisiwa hi leswi a nga Xikwembu lexi hlawulekeke. Leswi swi kandziyisiwa eka Tipisalema 113, 114 na 115, ku nga xiyenge xa Tipisalema ta tsevu ta ku Dzunisa. Hi ku ya hi Xikolo xa vufundhisi xa Hillel, Tipisalema 113 na 114 a ti yimbeleriwa hi nkarhi wa swakudya swa Paseka ya Vayuda endzhaku ka loko ku cheriwe xinwelo xa vumbirhi xa vhinyo ni loko nkoka wa nkhuvo lowu wu hlamuseriwile. Tipisalema 115 ku ya ka 118 a ti yimbeleriwa endzhaku ka xinwelo xa vumune xa vhinyo. (Ringanisa Matewu 26:30.) Ti vuriwa “Tipisalema ta ku Dzunisa” hikuva hi ku phindha-phindla ti tirhisa Hallelujah!—“Dzunisani Jah!”
4. Rito “Hallelujah” ri vula yini, naswona ri humelela hi ku phindha-phindha ku fikela kwihi eBibeleni?
4 “Hallelujah!” i ku hundzuluxeriwa loku landzaka mpfumawulo wa rito ra Xiheveru leri humelelaka ka 24 eka Tipisalema. Etindhawini letin’wana eBibeleni, xivumbeko xa rona xa Xigriki xi humelela minkarhi ya mune malunghana ni ntsako lowu tokotiwaka loko ku lovisiwa Babilona Lonkulu, mfumo wa misava wa vukhongeri bya mavunwa, ni ntsako lowu fambisanaka na sweswo loko Yehovha Xikwembu a sungula ku fuma tanihi Hosi. (Nhlavutelo 19:1-6) Loko sweswi hi kambisisa tinharhu eka Tipisalema ta ku Dzunisa, hi nga tivona kahle hi mahlo ya mianakanyo hi ri karhi hi yimbelela tinsimu leti, hi dzunisa Yehovha.
Dzunisani Jah!
5. Pisalema 113 yi hlamula xivutiso xihi, naswona xileriso lexi nga eka Pisalema 113:1, 2 ngopfu-ngopfu xi kongomisiwe eka vamani?
5 Pisalema 113 yi hlamula xivutiso lexi nge, Ha yini hi dzunisa Yehovha? Yi sungula hi xileriso lexi nge: “Ḍunisani Yehova! Ṅwina malanḍa ya Yehova, ḍunisani! Ḍunisani v̌ito ra Yehova! A ku nkhensiwe v̌ito ra Yehova, ŝeŝi ni masiku!” (Pisalema 113:1, 2) “Hallelujah!” Ina, “Ḍunisani Yehova!” Xileriso xexo ngopfu-ngopfu xi tirha eka vanhu va Xikwembu ‘enkarhini lowu wa makumu.’ (Daniyele 12:4) Ku sukela sweswi ku ya emahlweni, ni hi laha ku nga heriki, vito ra Yehovha ri ta dzunisiwa emisaveni hinkwayo. Timbhoni ta yena sweswi ti twarisa leswaku Yehovha i Xikwembu, Kreste i Hosi naswona Mfumo wu simekiwile etilweni. Sathana Diyavulosi ni nhlengeletano ya yena a nge swi koti ku sivela ku dzunisiwa loku ka Yehovha.
6. Yehovha u dzunisiwa njhani ‘ku sukela loko dyambu ri huma ku fikela loko ri pela’?
6 Risimu ra ku dzunisa ri ta ya emahlweni ku fikela loko Yehovha a endla leswaku ri tata misava hinkwayo. “E ku sukela v̌ušeni e ku fika v̌upeladyambu, a ku v̌ongiwe v̌ito ra Yehova.” (Pisalema 113:3) Leswi swi vula mhaka leyi tlulaka vugandzeri bya siku na siku bya swivumbiwa swo karhi swa laha misaveni. Dyambu ri huma evuxeni kutani ri ya nghena evupela-dyambu, ri hlanganisa misava hinkwayo. Hinkwako laha dyambu ri tlhavaka kona, vito ra Yehovha ku nga ri khale ri ta dzunisiwa hi vanhu hinkwavo lava ntshunxiweke evuhlongeni bya vukhongeri bya mavunwa ni nhlengeletano ya Sathana. Kahle-kahle, risimu leri ri nga ta ka ri nga heli, sweswi ri yimbeleriwa hi Timbhoni ta Yehovha leti totiweke ni lava va nga ta va vana va laha misaveni va Hosi leyi a yi vekeke, Yesu Kreste. Mawaku lunghelo lerikulu swonghasi leri va nga na rona tanihi vayimbeleri va risimu ro dzunisa Yehovha!
Yehovha A Nga Ringanisiwi Na Munhu
7. Hi tihi tinhla timbirhi ta vukulukumba bya Yehovha leti kombisiwaka eka Pisalema 113:4?
7 Mupisalema wa engetela a ku: “Yehova o tlakukile henhla ka matiko hikwawo, ku kwetsima ka yena ku tlakukile henhla ka matilo.” (Pisalema 113:4) Leswi swi kombisa tinhla timbirhi ta vukulukumba bya Xikwembu: (1) Eka Yehovha, La Tlakukeke “henhla ka matiko hikwawo,” ma fana ni thonsi leri humaka ekhuwaneni ra mati ni ntshuri lowu nga eswikalweni; (Esaya 40:15; Daniyele 7:18) (2) ku kwetsima ka yena i kukulu swinene ku tlula lokuya ka matilo ya xiviri, hikuva tintsumi ti endla ku rhandza ka yena loku tlakukeke.—Pisalema 19:1, 2; 103:20, 21.
8. Ha yini Yehovha a korhama leswaku a vona timhaka ta le tilweni ni ta le misaveni, naswona u swi endla hi ndlela yihi?
8 Hi ku susumetiwa hi vukulu bya Xikwembu, mupisalema u te: “I mani l’a fanaka na Yehova, Šikwembu ša hina, l’a akeke šiv̌andleni ša le henhla-henhla, l’a koramelaka hansi, a hlometela e matilweni ne misav̌eni?” (Pisalema 113:5, 6) Xikwembu xi tlakukile swinene lerova xi fanele ku korhama leswaku xi vona timhaka ta le tilweni ni ta le misaveni. Hambi leswi Yehovha a nga riki lontsongo eka munhu naswona a nga fanelangiki ku titsongahata eka van’wana, u kombisa ku titsongahata loko a tirhisa musa ni ntwela-vusiwana eka vadyohi lava titsongahataka. Ku va Yehovha a nyikele N’wana wa yena Yesu Kreste tanihi ‘gandzelo ro rivalela swidyoho’ swa Vakreste lava totiweke ni swa misava ya vanhu i xikombiso xa ku titsongahata ka yena.—1 Yohane 2:1, 2.
Yehovha U Ni Ntwela-vusiwana
9, 10. Xikwembu xi ‘pfuxa xisiwana, xi endla leswaku xi tshama ni tihosana’ hi ndlela yihi?
9 Loko a kandziyisa ntwela-vusiwana wa Xikwembu, mupisalema u engetela leswaku Yehovha u “pfuša e nṭhurini l’a nge khombyeni, kutani a humesa šisiwana e nḍopeni, a ta ṅwi ṭhamisisa ni tihosana, ni tihosana ta tiko ra yena. Nsati loyi a ṭhameke ndlwini ya yena a ri mhika, a ṅwi endla mana wa v̌ana, a tiṭakela e šikari ka v̌ona. Ḍunisani Yehova!” (Pisalema 113:7-9) Vanhu va Yehovha va ni ripfumelo ra leswaku a nga kutsula swisiwana leswi lulameke, a hundzula xiyimo xa swona, kutani a enerisa swilaveko ni ku navela ka swona loku faneleke. ‘La Tlakukeke ni wa le Henhla-henhla u pfuxeta moya wa lava nga ekhombyeni ni mbilu ya lava tshikileriwaka.’—Esaya 57:15.
10 Xana Yehovha u ‘xi pfuxa njhani xisiwana, a endla leswaku xi tshama ni tihosana’? Loko ku ri ku rhandza ka Xikwembu, xi veka malandza ya xona eswiyin’weni swa ku dzuneka loku ringanaka ni ka tihosana. Xi endle tano eka Yosefa, loyi a veke mulawuri wa swakudya swa le Egipta. (Genesa 41:37-49) Le Israyele, ku tshama ni tihosana kumbe vavanuna lava lawulaka exikarhi ka vanhu va Yehovha, a ku ri lunghelo leri a ri amukeriwa hi mavoko mambirhi. Tanihi vakulu va Vukreste namuntlha, vavanuna vo tano a va pfuniwa ni ku katekisiwa hi Xikwembu.
11. Ha yini ku nga vuriwaka leswaku Pisalema 113:7-9 ngopfu-ngopfu yi tirha eka vanhu va Yehovha va manguva lawa?
11 Ku vuriwa yini hi ‘ku endla wansati wa mhika a va mana wa vana loyi a tsakeke’? Xikwembu xi nyike Hana lowa mhika n’wana wa xinuna—Samuwele, loyi a n’wi nyikeleke entirhweni wa xona. (1 Samuwele 1:20-28) Xa nkoka swinene, ku sukela eka Yesu ni loko ku chuluriwe moya lowo kwetsima ehenhla ka vadyondzisiwa va yena hi Pentekosta ya 33 C.E., wansati wa Xikwembu wo fanekisela, Siyoni wa le tilweni, u sungule ku tswala vana va moya. (Esaya 54:1-10, 13; Mintirho 2:1-4) Naswona hi laha Xikwembu xi tlheriseleke Vayuda etiko-xikaya ra vona endzhaku ka vuhlonga eBabilona, hi 1919 xi ntshunxe masalela lama totiweke ya “Israel wa Šikwembu” evuhlongeni bya Babilona naswona xi va katekisile swinene hi tlhelo ra moya lerova marito ya Pisalema 113:7-9 ma tirha eka vona. (Vagalatiya 6:16, BX) Tanihi Timbhoni ta Yehovha leti tshembekaka, masalela ya Israyele wa moya ni vanakulobye va wona lava nga ni ntshembo wa ku hanya laha misaveni va angula hi mbilu hinkwayo eka marito yo hetelela ya Pisalema 113 lama nge: “Ḍunisani Yehova!”
Xikombiso Xa Ku Hlawuleka Ka Yehovha
12. Pisalema ya 114 yi kombisa ku hlawuleka ka Yehovha hi ndlela yihi?
12 Pisalema 114 yi kombisa ku hlawuleka ka Yehovha hi ku tshaha swiendlakalo swo hlawuleka leswi khumbaka Vaisrayele. Mupisalema u yimbelerile a ku: “Kute loko Israel a humile Egipta, yindlu ya Yakob loko yi suke tikweni ra ririmi riṅwana, Yuda a hunḍuke ku kwetsima ka Yehova, na Israel e ku fuma ka yena.” (Pisalema 114:1, 2) Xikwembu xi kutsule Israyele evuhlongeni bya Vaegipta, lava ririmi ra vona a ri nga tolovelekanga etindleveni ta vona. Ku kutsuriwa ka vanhu va Yehovha, lava a va vuriwa Yuda na Israyele hi marito yo phata, swi kombisa leswaku Xikwembu xi nga kutsula malandza ya xona hinkwawo namuntlha.
13. Pisalema 114:3-6 yi byi kombisa njhani vukulukumba bya Yehovha, naswona yi tirha njhani eka mintokoto ya Israyele wa khale?
13 Vukulukumba bya Yehovha ehenhla ka swivumbiwa hinkwaswo bya vonaka hi marito lawa: “E lwandle, loko ri ṅwi v̌ona ri baleka, yena Yordan a tlhelela nḍaku; e tinṭhav̌a a ti tlulatlula kukotisa tinyimpfu, e ŝiṭunga kukotisa ŝinyimpfana. A u ri na yini, wee lwandle, leŝi u nga baleka, na wena Yordan, loko u tlhelela nḍaku? Ṅwina tinṭhav̌a mi tlulatlulela yini kukotisa tinyimpfu, na ṅwina ŝitunga mi kotisela yini ŝinyimpfana?” (Pisalema 114:3-6) Lwandle ro Tshwuka ‘ri balekile’ loko Xikwembu xi pfulela vanhu va xona gondzo exikarhi ka rona. Kutani Israyele u vone voko ra Yehovha ra matimba ri lwisana ni Vaegipta lava feke loko mati ma vuya. (Eksoda 14:21-31) Loko wu kombisa matimba ya Xikwembu, Nambu wa Yordani na wona wu ‘sungule ku tlhelela endzhaku,’ wu pfumelela Vaisrayele ku pela va ya eKanana. (Yoxuwa 3:14-16) ‘Tintshava ti tlulatlule ku fana ni swinyimpfana’ loko Ntshava ya Sinayi yi humesa musi ni ku tsekatseka loko ku simekiwa ntwanano wa Nawu. (Eksoda 19:7-18) Loko risimu ra yena ri ri kusuhi ni ku hela, mupisalema u veke timhaka hi tlhelo ra swivutiso, kumbexana a kombisa leswaku lwandle, nambu, tintshava ni switsunga leswi nga hanyiki swi chavisiwe hi swikombiso leswi swa matimba ya Yehovha.
14. I yini leswi endliweke hi matimba ya Yehovha eMeriba ni le Kadexe, naswona leswi swi fanele ku khumba malandza ya yena ya manguwa lawa hi ndlela yihi?
14 Loko a tlhela a kombetela eka matimba ya Yehovha, mupisalema u yimbelerile a ku: “Wena, misav̌a, rurumela e mahlweni ka Hosi! E mahlweni ka Šikwembu ša Yakob, le’ši hunḍulušaka ribye ri v̌a tiv̌a ra mati, ni tamba ma v̌a mati la’ma pfelelaka!” (Pisalema 114:7, 8) Hi ndlela yo fanekisela, xisweswo mupisalema u kombisa leswaku vanhu va fanele ku chava Yehovha, Hosi ni Mufumi la Tlakukeke wa misava hinkwayo. A a ri “Šikwembu ša Yakob” kumbe Israyele hi laha a nga ha kona eka Vaisrayele va moya ni vanakulobye va vona va laha misaveni. Le Meriba ni le Kadexe emananga, Yehovha u kombise matimba ya yena hi ku nyika Vaisrayele mati hi ku tirhisa singita, a “[hundzuluxa] ribye ri v̌a tiv̌a ra mati, ni tamba ma v̌a mati la’ma pfelelaka.” (Eksoda 17:1-7; Tinhlayo 20:1-11) Switsundzuxo swo tano swa matimba ya Yehovha lama chavisaka ni nkhathalelo lowukulu swi nyika Timbhoni takwe swivangelo leswi twalaka swo pfumela eka yena hi ku helela.
A Nga Fani Ni Swifaniso Swa Swikwembu
15. Pisalema 115 yi nga va yi yimbelerisiwe ku yini?
15 Pisalema 115 yi hi khutaza ku dzunisa ni ku tshemba Yehovha. Yi kombisa leswaku hi yena loyi a katekisaka ni ku pfuna, ivi yi kombisa leswaku swifaniso swa swikwembu a swi pfuni nchumu. Pisalema leyi yi nga ha va yi yimbeleriwe hi ku siyerisana. Hi leswaku rito ri nga ha va ri yimbelele ri ku: “Ṅwina mi tšhav̌aka Yehova, tiṭhembeleni Yehova!” Nhlengeletano yi nga ha va yi hlamurile yi ku: “Hi yena mupfuni wa v̌ona ni šitlhangu ša v̌ona.”—Pisalema 115:11.
16. I ku hambana kwihi loku nga kumiwaka exikarhi ka Yehovha ni swifaniso swa swikwembu swa matiko?
16 Ku dzuneka a ku fanelanga ku ta eka hina, kambe ku fanele ku ya evitweni ra Yehovha, Xikwembu xa tintswalo ta rirhandzu, kumbe xa rirhandzu ra xiviri ni xa ntiyiso. (Pisalema 115:1) Valala va nga ha vutisa hi ku monya va ku: “Ši kwihi Šikwembu ša v̌ona?” Kambe vanhu va Yehovha va nga hlamula va ku: “Šikwembu ša hina ši le matilweni, ši endla hikwaŝo leŝi ši ŝi ranḍaka.” (Tindzimana 2, 3) Hambi swi ri tano, swifaniso swa swikwembu swa matiko a swi endli nchumu, hikuva i swifaniso swa silivhere ni nsuku leswi endliweke hi vanhu. Hambi leswi swi nga ni milomu, mahlo ni tindleve, a swi vulavuli, swi fe mahlo naswona a swi twi. Swi ni tinhompfu, kambe a swi nun’hweti, swi ni milenge, kambe a swi koti ku famba, swi ni mikolo kambe a swi humesi rito. Lava va endlaka swifaniso swa swikwembu leswi nga pfuniki nchumu ni lava va swi tshembaka va ta pfumala vutomi tanihi swona.—Tindzimana 4-8.
17. Tanihi leswi vafi va nga swi kotiki ku dzunisa Yehovha, hina hi fanele ku endla yini, naswona hi langutele yini?
17 Endzhaku ku nyikeriwa xikhutazo xo tshemba Yehovha tanihi Mupfuni ni Xitlhangu lexi sirhelelaka xa Israyele, xa yindlu ya vuprista ya Aroni ni xa hinkwavo lava chavaka Xikwembu. (Pisalema 115:9-11) Tanihi lava va chavaka Yehovha, hi ni xichavo lexikulu eka Xikwembu ni ku chava lokunene ka ku xi hlundzukisa. Nakambe ha pfumela leswaku ‘Muendli wa tilo ni misava’ wa va katekisa vagandzeri va yena lava tshembekaka. (Tindzimana 12-15) Matilo i xivandla xa xiluvelo xa Xikwembu, kambe xi endle misava yi va kaya ra hi laha ku nga heriki ra vanhu lava tshembekaka ni lava yingisaka. Tanihi leswi vafi lava nga vulavuriki ni lava nga twiki nchumu va nga swi kotiki ku dzunisa Yehovha, hina lava hi hanyaka hi fanele ku endla tano hi ku n’wi chava ni ku tshembeka hi laha ku heleleke. (Eklesiasta 9:5) Hi lava va dzunisaka Yehovha ntsena lava nga ta kuma vutomi lebyi nga heriki, va tlhela va kota ku ‘dzunisa Jah’ hi laha ku nga heriki, va vulavula kahle hi yena “hi laha ku nga heriki.” Kutani a hi tihlanganiseni ni lava va hlayisaka xikhutazo lexi nge: “Ḍunisani Yehova!”—Pisalema 115:16-18.
Timfanelo Ta Yehovha Leti Hlamarisaka
18, 19. Timfanelo ta Yehovha ti n’wi hambanisa njhani ni swikwembu swa mavunwa?
18 Ku hambana ni swifaniso swa swikwembu leswi pfumalaka vutomi, Yehovha i Xikwembu lexi hanyaka, lexi kombisaka timfanelo leti hlamarisaka. I rirhandzu naswona i “ša tintŝalo ni v̌unene, le’ši hlwelaka ku kariha, le’ši teleke tintŝalo ni ku ṭhembeka.” (Eksoda 34:6; 1 Yohane 4:8) Xi hambana swonghasi na Moloko, xikwembu xa tihanyi xa Vakanana, lexi vana a va nyikeriwa eka xona! Ku vuriwa leswaku xifaniso xa xikwembu lexi xi ni xivumbeko xa munhu ni nhloko ya nkuzi. Ku ya hi swiviko, xifaniso lexi a xi hisiwa xi kala xi tshwuka hi ndzilo, kutani ku hoxiwa vana emavokeni ya xona lama tshambulutiweke, va wela etiveni leri pfurhaka ehansi ka xona. Kambe Yehovha u ni rirhandzu ni tintswalo swinene lerova mianakanyo ya magandzelo yo tano ya vanhu a yi kalanga yi ta ‘embilwini ya yena.’—Yeremiya 7:31.
19 Timfanelo ta Yehovha letikulu ti katsa ni vululami lebyi hetisekeke, vutlharhi lebyi nga riki na mpimo ni matimba hinkwawo. (Deteronoma 32:4; Yobo 12:13; Esaya 40:26) Ku vuriwa yini hi swikwembu swa ntsheketo? Ematshan’wini yo tirhisa vululami, swikwembu swa le Babilona a swi rihisela. Swikwembu swa le Egipta a swi nga ri swikombiso swa vutlharhi, kambe a swi hlamuseriwa tanihi leswi nga ni ku tsana ka vumunhu. Sweswo a swi hlamarisi, tanihi leswi swikwembu swa mavunwa swi endliweke hi vanhu lava ‘nga pfuniki nchumu’ lava tivulaka tintlharhi. (Varhoma 1:21-23) Ku vuriwa leswaku swikwembu swa Magriki a swi tlulana milenge. Hi xikombiso, ku ya hi ntsheketo wa kona, Zewusi u tirhise matimba ya yena hi ndlela yo biha hi ku susa tata wa yena Cronus exiluvelweni, loyi na yena a nga susa Uranus tata wa yena exiluvelweni. Mawaku nkateko lowu ku nga wona ku tirhela ni ku dzunisa Yehovha, Xikwembu lexi hanyaka ni xa ntiyiso, lexi kombisaka rirhandzu, vululami, vutlharhi ni matimba hi laha ku hetisekeke!
Yehovha U Faneriwa Hi Ku Dzunisiwa Hi Laha Ku Nga Heriki
20. I swivangelo swihi swa ku dzunisa vito ra Yehovha leswi Hosi Davhida a swi nyikeke?
20 Hi laha Tipisalema ta ku Dzunisa ti kombisaka ha kona, Yehovha u lulameriwa hi ku dzunisiwa hi laha ku nga heriki. Hi ndlela leyi fanaka, loko Davhida ni Vaisrayele-kulobye va endla minyikelo ya ku akiwa ka tempele, u vule leswi landzelaka emahlweni ka nhlengeletano: “A ku nkhensiwe Yehova, Šikwembu ša Israel tata wa hina, hi masiku ni masiku! E ka wena Yehova ku v̌e v̌ukulu, ni matimba, ni ku twala, ni ku kwetsima, ni v̌uhosi, hikuv̌a hikwaŝo le’ŝi nge tilweni ne misav̌eni, ŝi na wena; e ka wena Yehova, ku v̌e ku fuma, wena l’a titlakuseke ku v̌a hosi henhla ka ŝilo hikwaŝo! Ku fuma ni ku twala ku hume ka wena; wa fuma henhla ka ŝilo hikwaŝo: matimba ni ku tiya ŝi le v̌okweni ra wena; hi wena l’a tiv̌aka ku nyika v̌ukulu hikwabyo ni matimba hikwawo. Oho! Šikwembu ša hina! Ŝeŝi ha ku v̌onga, hi ḍunisa v̌ito ra wena le’ri kwetsimaka.”—1 Tikronika 29:10-13.
21. Nhlavutelo 19:1-6 yi nyika vumbhoni byihi bya ku va Yehovha a dzunisiwa hi mavandla ya le tilweni?
21 Yehovha u ta nkhensiwa ni ku dzunisiwa hi laha ku nga heriki ni le matilweni. Muapostola Yohane u twe “ntshungu lowukulu le tilweni” wu ku: “Aleluya! Ku hlayiseka, ni ku kwetsima, ni matimba i swa Xikwembu xa hina, hikuva ku avanyisa ka xona ka tshembeka, ku lulamile minkarhi hinkwayo. Xi avanyisile muoswi lonkulu [Babilona Lonkulu] loyi a boriseke misava hi vuoswi bya yena, kutani xi rihiserile ngati ya malandza ya xona ehenhla ka yena.” Va engete va ku: “Aleluya!” Sweswo swi endliwe na hi “vakulukumba va 24 . . . ni swivumbiwa leswi hanyaka swa mune.” Rito leri humaka exiluvelweni ri te: “Dzunisani Xikwembu xa hina, n’wina hinkwenu malandza ya xona, na n’wina lava mi xi chavaka, lavakulu ni lavatsongo.” Kutani Yohane u engeterile a ku: “Kutani ndzi twa leswi fanaka ni rito ra ntshungu lowukuku kumbe mpfumawulo wa mati layo tala, swi fana ni mpfumawulo wa ku baleka lokukulu ka tilo, swi ku: ‘Aleluya! Ku fuma i ka Hosi, Xikwembu xa hina lexi nga ni matimba hinkwawo.’”—Nhlavutelo 19:1-6.
22. Xana Yehovha u ta dzunisiwa ku yini emisaveni ya yena leyintshwa leyi a yi tshembiseke?
22 Swi fanela swonghasi leswi mavandla wolawo ya le tilweni ya dzunisaka Yehovha! Emisaveni ya yena leyintshwa leyi sweswi yi tshineleke swinene, vanhu lavo tshembeka lava nga ta pfuxiwa eku feni va ta tihlanganisa ni vaponi va makumu ya mafambiselo lawa eku dzuniseni ka Jah. Tintshava leti tlakukeke ti ta tlakusa tinhlohlorhi ta tona ti yimbelela tinsimu ta ku dzunisa Xikwembu. Switsunga swa rihlaza ni mirhi leyi tswalaka mihandzu swi ta yimbelela tinsimu ta ku xi dzunisa. Phela xivumbiwa xin’wana ni xin’wana lexi hanyaka ni ku hefemula xi ta dzunisa vito ra Yehovha kun’we ni ntshungu lowukulu lowu yimbelelaka risimu ra Hallelujah! (Pisalema 148) Xana rito ra wena ri ta twala eka ntshungu wolowo lowu tsakeke? Ri ta twala loko u tirhela Jah hi ku tshembeka kun’we ni vanhu va yena. Xexo ku fanele ku va xikongomelo xa wena evuton’wini, hikuva i mani loyi a fanaka na Yehovha Xikwembu xa hina?
A Wu Ta Hlamurisa Ku Yini Ke?
◻ Ha yini ku dzunisiwa Yehovha Xikwembu?
◻ Yehovha a nga ringanisiwi na munhu hi tindlela tihi?
◻ Hi byihi vumbhoni lebyi byi nga kona bya leswaku Yehovha u ni ntwela-vusiwana?
◻ Yehovha u hambana njhani ni swifaniso swa swikwembu leswi nga riki na vutomi ni swikwembu swa mavunwa?
◻ Ha yini hi nga vulaka leswaku Yehovha u ta dzunisiwa hi laha ku nga heriki etilweni ni le misaveni?
[Xifaniso lexi nga eka tluka 9]
Tipisalema ta ku Dzunisa a ti yimbeleriwa hi nkarhi wa swakudya swa Paseka