Dzunisani Yehovha Siku Na Siku
1 Xikwembu xa hina, Yehovha, xa hlamarisa, i Muvumbi wa rirhandzu, i Xihlovo xa vutomi hinkwabyo ni ntsako. Hikwalaho ka vukulu bya xona, entiyisweni xi faneriwa hi ku dzunisiwa hi swivumbiwa swa xona hinkwaswo. Ha un’we-un’we, hi navela ku vula hi laha mupisalema a vuleke ha kona: “Nḍi v̌a nḍi engetela ku ku ḍunisa. Nomu wa mina wu ta twarisa ku lulama ka wena.” (Ps. 71:14, 15) Leswaku hi endla tano, hi fanele hi lava tindlela to dzunisa Yehovha siku na siku naswona hi susumeteleka ku vulavula kahle ha yena, hi ku lulama ka yena ni malunghiselelo ya yena yo ponisa.
2 Vakreste vo sungula va veke xikombiso lexinene xo dzunisa Yehovha. Malunghana ni vanhu va 3 000 lava khuvuriweke hi Pentekosta, hi hlaya leswi landzelaka eka Mintirho 2:46, 47: “Masiku hinkwawo a va chivirika ku hlangana eTempeleni, va ri mbilu yin’we, . . . va dzunisa Xikwembu, va tsakeriwa hi tiko hinkwaro. Kutani . . . Hosi a yi engetela nhlengeletano ya vona hi lava a va ri karhi va ponisiwa.” A va dyondza mintiyiso leyi hlamarisaka mayelana na Yehovha na Mesiya wa yena. Ntsako wa vona a wu khumba van’wana, wu va khutaza leswaku va yingisela ni ku dyondza ni ku dzunisa Yehovha.
3 Malunghelo Ma Kona Masiku Hinkwawo: Namuntlha vo tala va kuma leswaku va nga dzunisa Yehovha siku na siku hi ku vula vumbhoni hi xitshuketa. Ku hlela ka ha ri na nkarhi swi va pfuna leswaku va humesa mihandzu yo tala. Makwerhu un’wana wa xisati loyi a a tiyimisele ku hlanganyela eku vuleni vumbhoni hi xitshuketa u kume leswaku ku ni munhu la fayeke mafasitere mambirhi ya movha wakwe. U vitane lava lunghisaka kutani a tilunghiselela ku vula vumbhoni eka mulunghisi. Ku lunghiselela ka yena ku katse ku khongelela nkongomiso wa Yehovha. Hi laha swi endlekeke ha kona, u vule vumbhoni eka mulunghisi ku ringana awara ivi a n’wi fambisela buku leyi nge Hanya Hi Masiku.
4 Makwerhu un’wana wa xisati minkarhi hinkwayo a a hlangana ni muakelani wakwe loko va ri karhi va famba ni timbyana ta vona. Enkarhini wun’wana, va burisane swinene hi swiphiqo swa vutomi, kutani bulo rolero ri tswale mabulo yo hlaya. Hi ku famba ka nkarhi, dyondzo ya Bibele yi sunguriwile. Lexi tsakisaka, endzhakunyana muakelani u phofule leswaku a a nga ta ti yingisela Timbhoni ta Yehovha loko a ti lo ta ekaya ra yena, hikwalaho ka leswi a a nga pfumeli eka Xikwembu kumbe eBibeleni.
5 Van’wana va swi kuma swi koteka ku vula vumbhoni loko vaxavisi kumbe van’wana va ta emakaya ya vona. Makwerhu wa xisati wa le Ireland u kume riqingho leri humaka eka munhu loyi a khutazaka vanhu ku nghenela ndzindza-khombo. Makwerhu wa xisati u hlamusele leswaku yena u langutele ku ya tiphina hi vutomi lebyi nga heriki. Leyi a ku ri mhaka leyintshwa hi laha ku heleleke eka wanuna loyi, loyi a kurisiweke a ri Murhoma Khatoliki. U teke buku leyi nge Hanya Hi Masiku, u ve kona eminhlanganweni vhiki leri landzeleke a tlhela a pfumela ku va na dyondzo ya Bibele. Sweswi muxavisi yoloye i makwerhu la khuvuriweke.
6 Hinkwerhu ka hina hi fanele hi xalamukela minkarhi yo dzunisa Yehovha siku na siku. Swa pfuna ku tshama hi ri na timagazini kumbe swiphephana swi nga ri swingani swi ri erivaleni leswaku swi ta kota ku voniwa ni ku fambiseriwa vaendzi. Etindhawini tin’wana nkarhinyana lowu u wu hetaka u tshame ebenceni ra le phakini wu nga ku nyika minkarhi yo vula vumbhoni eka van’wana lava va wisaka timinete ti nga ri tingani. Vantshwa van’wana lava nga Timbhoni, loko va ri exikolweni va veka tibuku ta Bibele ehenhla ka desika tanihi ndlela yo sungula bulo ni loyi a ti xiyaka kutani a vutisa swivutiso. Tshama u ri karhi u tsundzuka Tsalwa rin’we kumbe mambirhi lawa u nga ma tirhisaka. Kombela Yehovha leswaku a ku pfuna. U ta katekisiwa loko u endla tano.—1 Yoh. 5:14.