U Nga Swi Kota Ku Chumayela Hi Xitshuketa!
1. (a) Swi katsa yini ku chumayela hi xitshuketa? (b) I vangani lava nga laha, lava nga kuma ntiyiso hi ku chumayeriwa hi xitshuketa?
1 Evandlheni ra n’wina, i vangani lava nga kuma ntiyiso hi ku va va chumayeriwa hi xitshuketa? Nhlamulo ya xivutiso lexi yi nga ku hlamarisa. Ku chumayela hi xitshuketa swi katsa ku chumayela mahungu lamanene eka vanhu lava hi hlanganaka na vona siku ni siku—hi nga ha va hi ri eku tekeni ka riendzo, hi endzela maxaka kumbe vaakelani, hi ri eswitolo, exikolweni, entirhweni kumbe kun’wana. Exikarhi ka Timbhoni to tlula 200 leti khuvuriweke, 40 phesente wa tona ti kume ntiyiso hi ku chumayeriwa hi xitshuketa! Kutani a swi kanakanisi leswaku ku chumayela hi xitshuketa swi tswala mihandzu.
2. Hi swihi swikombiso swo chumayela hi xitshuketa leswi hi nga na swona eMatsalweni?
2 Vakreste va lembe-xidzana ro sungula na vona a va tala ku chumayela hi xitshuketa. Hi xikombiso, loko Yesu a hundza eSamariya, u chumayele wansati loyi a a te eku keni ka mati exihlobyeni xa Yakobe. (Yoh. 4:6-26) Filipi u sungule bulo ni ndhuna ya Muetiyopiya, leyi a yi hlaya buku ya Esaya hi ku yi vutisa xivutiso lexi nge: “Xana kahle-kahle wa swi tiva leswi u swi hlayaka?” (Mint. 8:26-38) Loko muapostola Pawulo a ri ekhotsweni le Filipiya u chumayele mulanguteri wa khotso. (Mint. 16:23-34) Loko a ri endlwini leyi a a nga pfumeleriwi ku huma eka yona, Pawulo “a a va amukela hi musa hinkwavo lava a va ta eka yena, a chumayela hi mfumo wa Xikwembu eka vona ni ku dyondzisa swilo leswi khumbaka Hosi Yesu Kreste.” (Mint. 28:30, 31) Na wena u nga swi kota ku chumayela hi xitshuketa hambiloko u ri ni tingana. Njhani?
3. I yini lexi nga hi pfunaka leswaku hi hlula tingana?
3 Ndlela Yo Sungula: Vanhu vo tala swa va tikela ku vulavula ni vanhu lava nga va tiviki. Minkarhi yin’wana sweswo swa tika hambi eka vanhu lava hi va tivaka. Ku anakanyisisa hi vunene bya Yehovha, swi ta hi susumetela ku vulavula hi ntiyiso lowu a wu nyikeke malandza yakwe ni hi xiyimo xo biha lexi vanhu va nga eka xona. (Yon. 4:11; Ps. 40:5; Mat. 13:52) Ku engetela kwalaho, hi nga kombela Yehovha a hi pfuna leswaku hi va ni ‘vurhena.’ (1 Tes. 2:2) Xichudeni xin’wana xa le Giliyadi xi te: “Ndzi xiye leswaku xikhongelo xa ndzi pfuna leswaku ndzi kota ku vulavula ni vanhu loko swi ndzi tikela.” Loko swi nga ku oloveli ku vulavula, endla xikhongelo xo koma hi mbilu.—Neh. 2:4.
4. Hi yihi pakani leyi hi nga tivekelaka yona naswona ha yini?
4 Ku chumayela hi xitshuketa a swi bohi leswaku hi sungula bulo hi ku tirhisa Matsalwa. Kumbexana hi nga tivekela pakani yo sungula bulo handle ko tibyela leswaku hi lava ku chumayela. Vahuweleri vo tala va vula leswaku leswi swa va pfuna leswaku va kota ku chumayela hi xitshuketa. Loko munhu wa kona a nga swi tsakeli ku vulavula na wena, u nga n’wi sindzisi. Gimeta bulo ra wena hi ndlela ya xichavo.
5. I yini leswi pfuneke makwerhu un’wana wa xisati la nga ni tingana leswaku a chumayela hi xitshuketa?
5 Loko makwerhu un’wana wa xisati la nga ni tingana a ri exitolo, u sungula hi ku languta munhu kutani a n’wayitela. Loko munhu wa kona na yena a n’wayitela, wa n’wi vulavurisa. Loko a kombisa ku tsakela, sweswo swi n’wi nyika xivindzi xo yisa bulo emahlweni. U rhiya ndleve a ri karhi a ringeta ku vona leswaku hi yihi mhaka leyi nga ta khumba munhu la bulaka na yena. Hi ku tirhisa ndlela leyi, u fambise tibuku to tala naswona u sungule ni dyondzo ya Bibele.
6. Hi nga ri sungula njhani bulo loko hi chumayela hi xitshuketa?
6 Ku Sungula Bulo: I yini leswi hi nga swi vulaka leswaku hi sungula bulo? Loko Yesu a vulavula ni wansati loyi a a ri exihlobyeni, u sungule hi ku kombela mati. (Yoh. 4:7) Kumbexana na hina hi nga sungula bulo hi ku xeweta kumbe hi ku vutisa xivutiso. Loko mi ri karhi mi bula, u nga ha kuma nkarhi wo n’wi chumayela kutani swi nga ha endleka leswaku u byala mbewu ya ntiyiso. (Ekl. 11:6) Van’wana va kote ku sungula bulo hi ku vula mhaka leyi endlaka munhu a lava ku tiva swo tala. Hi xikombiso, loko u yimele ku nghena eka dokodela, u nga ha sungula bulo hi ku vula u ku, “Ndzi nga tsaka loko ndzo ka ndzi nga ha vabyi ni siku ni rin’we.”
7. Ku va ni vuxiyaxiya swi nga hi pfuna njhani leswaku hi chumayela hi xitshuketa?
7 Ku va ni vuxiyaxiya swi nga hi pfuna leswaku hi kota ku sungula bulo. Loko hi xiya mutswari la nga ni vana lava nga ni mahanyelo lamanene, hi nga ha n’wi bumabumela kutani hi n’wi vutisa hi ku, “I yini lexi ku pfuneke leswaku u kurisa vana va wena hi ndlela leyi?” Makwerhu un’wana wa xisati u rhiya ndleve loko vatirhi-kulobye va ri karhi va bula entirhweni, kutani a va byela leswi Bibele yi swi vulaka hi mhaka leyi a va bula ha yona. Endzhaku ko twa leswaku wansati un’wana la tirhaka na yena u lava ku cata, u n’wi nyike Xalamuka! leyi hlamuselaka ndlela yo hlela mucato. Leswi swi endle leswaku va bula swo tala hi Bibele.
8. Hi nga yi tirhisa njhani minkandziyiso ya hina ku sungula bulo?
8 Ndlela yin’wana yo sungula bulo i ku hlaya minkandziyiso ya hina vanhu va ri karhi va hi vona. Makwerhu un’wana u pfula xihloko lexi vanhu va nga ta xi rhandza eka Xihondzo xo Rindza kumbe eka Xalamuka! kutani a sungula ku xi hlaya. Loko a xiya leswaku ku ni munhu la languteke magazini wakwe, u n’wi vutisa xivutiso kumbe a n’wi byela leswi xihloko xexo xi vulavulaka ha swona. Leswi swi endla leswaku va sungula ku bula naswona u hetelela a n’wi chumayerile. Ku veka minkandziyiso ya hina endhawini leyi vanhu va nga ta yi vona, swi nga ha endla leswaku swichudeni-kulobye kumbe vatirhi-kulobye va lava ku tiva leswi yi vulavulaka ha swona.
9, 10. (a) Xana hi nga ti lava njhani tindlela to chumayela hi xitshuketa? (b) Xana hi tihi tindlela leti wena u tshameke u ti tirhisa?
9 Ku Lava Tindlela Ta Kona: Hikwalaho ka leswi vanhu hinkwavo va faneleke va twa mahungu lamanene, a hi fanelanga hi ehleketa leswaku hi ta chumayela ntsena hi xitshuketa loko hi pfulekeriwa hi nkarhi. Hi fanele hi lava tindlela to chumayela loko hi ri karhi hi endla mintirho ya hina ya siku ni siku. Ehleketa hi vanhu lava u talaka ku hlangana na vona, kutani u ehleketa hi ndlela leyi u nga ha sungulaka bulo na vona ha yona. Khoma Bibele ni nkandziyiso wa wena hi voko leswaku u ta bula ni lava tsakelaka.—1 Pet. 3:15.
10 Vahuweleri vo tala va swi kotile ku kuma tindlela to chumayela hi xitshuketa. Makwerhu un’wana wa xisati la tshamaka endhawini leyi swi nga oloviki ku nghena eka yona, u chumayela hi xitshuketa endhawini leyi vanhu lava tshamaka kwalaho va hungasaka eka yona hi ku veka mawetana yo saseka lama kombisaka ntumbuluko. Loko vanhu va bula hi ndlela leyi ma nga saseka ha yona, u tirhisa nkarhi wolowo ku sungula bulo na vona kutani a va byela hi xitshembiso xa Bibele xa “tilo lerintshwa ni misava leyintshwa.” (Nhlav. 21:1-4) Xana ti kona tindlela leti u nga ti tirhisaka leswaku u chumayela hi xitshuketa?
11. Xana hi nga ku hlakulela njhani ku tsakela eka munhu loyi hi n’wi kumeke loko hi chumayela hi xitshuketa?
11 Hlakulela Ku Tsakela: Loko u hlangana ni munhu la tsakelaka, hlakulela ku tsakela koloko. Loko swi fanerile, u nga n’wi byela u ku: “Ndzi swi tsakerile ku bula na wena. Xana swi nga koteka leswaku hi tlhela hi hlangana leswaku hi ta yisa bulo ra hina emahlweni?” Vahuweleri van’wana va nyika munhu yoloye adirese ni nomboro ya vona ya riqingho kutani va ku: “Ndzi swi tsakerile ku bula na wena. Loko u tsakela ku tiva swo tala hi leswi hi buleke ha swona, u nga ndzi fonela eka nomboro leyi.” Loko u nga ta swi kota ku tlhela u n’wi vona, hlela leswaku vandlha rin’wana ri hlakulela ku tsakela koloko hi ku tata fomo leyi nge Please Follow Up (S-43) kutani u yi nyika matsalana wa le vandlheni ra n’wina.
12. (a) Ha yini hi fanele hi wu vika nkarhi lowu hi wu hetaka hi chumayela hi xitshuketa? (b) Hi yihi mihandzu leyi veke kona hikwalaho ko chumayela hi xitshuketa? (Vona bokisi leri nge “Ku Chumayela Hi Xitshuketa Swi Tswala Mihandzu!”)
12 Nkarhi lowu hi wu hetaka hi chumayela hi xitshuketa hi fanele hi wu vika. Kutani wu hlayise, hambiloko timinete ta kona ti nga nyawuli. Xiya mhaka leyi: Loko muhuweleri un’wana ni un’wana o heta timinete ta ntlhanu siku ni siku a chumayela hi xitshuketa, sweswo swi nga endla leswaku hi n’hweti ku vikiwa tiawara to tlula 17 wa timiliyoni n’hweti yin’wana ni yin’wana!
13. I yini lexi faneleke xi hi susumetela ku chumayela hi xitshuketa?
13 Hi ni swivangelo leswi twalaka swo chumayela hi xitshuketa, sweswo hi swi endla hileswi hi rhandzaka Xikwembu ni vaakelani va hina. (Mat. 22:37-39) Leswi timbilu ta hina ti tlangelaka timfanelo ni swikongomelo swa Yehovha, ti hi susumetela ku vulavula hi “ku vangama ka vuhosi bya [yena].” (Ps. 145:7, 10-12) Ku khathala hi vaakelani va hina swi hi susumetela ku tirhisa nkarhi wun’wana ni wun’wana lowu hi wu kumaka leswaku hi va byela hi mahungu lamanene loko nkarhi wa ha pfumela. (Rhom. 10:13, 14) Loko hi tilunghiselela ka ha ri emahlweni, hinkwerhu hi nga swi kota ku chumayela hi xitshuketa naswona hi nga tiphina hi ku byela munhu la nga ni mbilu leyinene ntiyiso.
[Marito lama tshahiweke exihlokweni lama nga eka tluka 4]
Swi nga ha ku pfuna ku tivekela pakani yo sungula bulo ni vanhu
[Marito lama tshahiweke exihlokweni lama nga eka tluka 5]
Vahuweleri vo tala va swi kotile ku kuma tindlela to chumayela hi xitshuketa
[Bokisi leri nga eka tluka 5]
Swiringanyeto Swo Sungula Bulo
◼ Khongela
◼ Bula ni lava tikombaka va ri ni xinghana naswona va nga khomekangiki
◼ Languta vanhu, u n’wayitela naswona u vula swo karhi leswi nga ta va tsakisa
◼ Vana muyingiseri lonene
[Bokisi leri nga eka tluka 6]
Ku Chumayela Hi Xitshuketa Swi Tswala Mihandzu!
• Loko makwerhu un’wana a ri egaraji a yimele leswaku movha wakwe wu lunghisiwa, u chumayele vavanuna lava a va ri ekusuhi na yena a tlhela a va nyika swirhambo leswaku va ta yingisela nkulumo ya le rivaleni. Endzhaku ka lembe, u xewete hi munhu la nga n’wi tiviki entsombanweni. A ku ri un’wana wa vavanuna lava a nga tshama a va rhamba leswaku va ya yingisela nkulumo! Wanuna loyi u yile a ya yingisela nkulumo ya le rivaleni naswona u kombele ku dyondzeriwa Bibele. Sweswi yena ni nsati wakwe va khuvuriwile.
• Makwerhu un’wana wa xisati la nga kuma ntiyiso hi ku chumayeriwa hi xitshuketa, u tibyela leswaku nsimu yakwe i vanhu lava a hlanganaka na vona hikwalaho ka vana vakwe vanharhu. Nsimu ya kona yi katsa vaakelani vakwe ni vatswari lava a hlanganaka na vona loko a ya etinhlengeletanweni ta vatswari exikolweni. Minkarhi hinkwayo loko a titivisa u vula leswaku Bibele hi yona yi n’wi pfunaka leswaku a kurisa vana vakwe, kutani a ya emahlweni ni mhaka leyi a lavaka ku vulavula ha yona. Leswi se a sunguleke bulo, u kuma swi n’wi olovela ku ta ni Bibele loko va tlhela va hlangana. Hi ku endla tano, u pfune vanhu va 12 leswaku va khuvuriwa.
• Loko makwerhu un’wana wa xisati a endzeriwe hi wanuna la tirhaka endzawulweni ya ndzindza-khombo, u tirhise nkarhi wolowo ku n’wi chumayela. U n’wi vutise loko a ta swi tsakela ku va ni rihanyo lerinene, ntsako ni ku kuma vutomi lebyi nga heriki. Wanuna yoloye u pfumerile kutani a n’wi vutisa leswaku u yi kuma kwihi mhaka leyi. Wansati yoloye u n’wi kombe switshembiso swa le Bibeleni kutani a n’wi nyika yin’wana ya minkandziyiso ya hina, naswona nkandziyiso wa kona u wu hlaye hi vusiku byin’we. Wanuna yoloye u dyondzeriwe Bibele ivi a sungula ku ya eminhlanganweni naswona hi ku famba ka nkarhi u khuvuriwile.
• Loko makwerhu un’wana wa xisati a famba hi xihaha-mpfhuka u chumayele wansati loyi a a tshame etlhelo kakwe. Loko va chika, makwerhu loyi wa xisati u nyike wansati yoloye adirese ni nomboro yakwe ya riqingho a tlhela a n’wi khutaza leswaku loko a endzeriwa hi Timbhoni ta Yehovha, a kombela ku dyondzeriwa Bibele. Hi siku leri landzeleke, wansati yoloye u endzeriwe hi Timbhoni timbirhi. U sungule ku dyondza Bibele, a endla nhluvuko hi ku hatlisa ivi a khuvuriwa, naswona a swi tekanga nkarhi leswaku na yena a va ni tidyondzo tinharhu ta Bibele.
• Makwerhu un’wana la feke mahlo, la nga ni malembe ya 100 naswona a tshamaka ekaya ra vadyuhari a a tala ku vula leswi: “Hi lava Mfumo.” Leswi swi endle leswaku vaongori ni vavabyi va lava ku tiva leswaku i yini Mfumo lowu a vulavulaka ha wona. Muongori un’wana u n’wi vutise leswaku i yini leswi a swi languteleke eParadeyisini. U te: “Ndzi ta pfuleka mahlo, ndzi kota ku famba naswona xitulu lexi ndzi fambaka ha xona ndzi ta xi hisa.” Leswi a nga voniki, u kombela muongori yoloye leswaku a n’wi hlayela timagazini. Loko n’wana wa nhwanyana wa makwerhu yoloye a endzela tata wakwe, muongori yoloye u kombele ku famba ni timagazini toleto ekaya kakwe. U tlhele a n’wi byela a ku: “Hinkwerhu laha xibedlhele hi tshama hi ri karhi hi ku: ‘Hi lava Mfumo.’”
• Loko makwerhu un’wana wa xisati a yimele ku xava erhesiturente, u twe vakhalabye van’wana va bula hi swa tipolitiki. Wanuna un’wana u vule leswaku hulumendhe a yi nge swi tlhantlhi swiphiqo swa hina. Makwerhu loyi wa xisati u tibyele a ku, ‘Lowu i nkarhi wa mina.’ U endle xikhongelo xo koma kutani a va tshinelela. Endzhaku ko titivisa, u va byele hi hulumendhe leyi nga ta tlhantlha swiphiqo swa vanhu, ku nga Mfumo wa Xikwembu kutani a va nyika broxara leyi a a ri na yona. Hiloko mininjhere wa kwalaho a n’wi tshinelela. Makwerhu loyi wa xisati a a ehleketa leswaku u ta n’wi hlongola. Ku ri na sweswo, u n’wi byele leswaku a a yingisile loko a ri karhi a bula ni vakhalabye volavo naswona na yena u lava broxara yoleyo. Mutirhi wa kwalaho loyi na yena a a yingisile u n’wi tshinelerile a ri karhi a rila. U tshame a dyondzeriwa Bibele naswona sweswi se a a lava ku ya emahlweni ni dyondzo yakwe.