Xana U Swi Lunghekerile Ku Chumayela Hi Xitshuketa?
1. Hi xihi xikombiso lexi kombisaka leswaku ku chumayela hi xitshuketa swi nga va ni vuyelo lebyinene?
1 Ku chumayela hi xitshuketa swi nga va ni vuyelo lebyinene. Bibele yi ni swikombiso swo tala swa vanhu lava nga chumayela hi xitshuketa naswona va nga va ni vuyelo lebyinene. (Yoh. 4:7-15) I yini leswi hi nga swi endlaka leswaku hi lunghekela ku chumayela hi xitshuketa?
2. Ndlela leyi hi ambalaka ni ku tisasekisa ha yona yi nga hi pfuna njhani leswaku hi lunghekela ku chumayela?
2 Maambalelo Ni Ku Tisasekisa: Minkarhi hinkwayo ku ambala ni ku tisasekisa hi ndlela leyinene swi nga hi pfuna leswaku hi byela van’wana hi ripfumelo ra hina hi ntshunxekile. (1 Tim. 2:9, 10) Loko hi swi xiya leswaku ndlela leyi hi nga ambala ha yona a yi xiximeki, swi nga hi tikela ku chumayela hi xitshuketa. Hi hala tlhelo, ku hleleka ka hina ni ndlela leyi hi nga basa ha yona swi nga endla leswaku van’wana va lava ku tiva leswaku ha yini hi ambale hi ndlela leyi. Hi xikombiso, loko mpatswa wun’wana lowu nga Timbhoni wu teka riendzo naswona wu ambale hi ndlela leyi xiximekaka, a wu tshame ekusuhi ni wanuna un’wana wa Mumoslem. Hi ku vona ndlela leyi a wu languteka ha yona, wanuna loyi u va vutisile loko va ri Vakreste. Leswi swi endle leswaku va heta tiawara tinharhu va ri karhi va bula hi Bibele.
3. Ku tekelela xikombiso xa Yesu swi ku pfune njhani leswaku u sungula bulo?
3 Ndlela Yo Sungula Mabulo: Loko Yesu a kuma wansati wa Musamariya exihlobyeni xa Yakobe, u sungule bulo hi ku kombela leswaku a n’wi nyika mati. Hilaha ku fanaka, hi nga ha sungula bulo hi ku vula swo karhi kumbe hi ku vutisa xivutiso xo olova. Minkarhi yin’wana leswi a swi olovi, kambe ku titshega hi mpfuno wa Yehovha swi nga hi pfuna leswaku hi ‘kuma vurhena.’—1 Tes. 2:2.
4. I yini leswi hi nga swi endlaka leswaku hi lunghekela ku chumayela hi xitshuketa?
4 Kuma Tindlela To Chumayela Hi Xitshuketa: Vahuweleri vo tala va kume tindlela to chumayela hi xitshuketa. Kambisisa swiyimo swa wena naswona u ehleketa hi vanhu lava u nga ta hlangana na vona siku rero. Famba ni minkandziyiso leyi faneleke swin’we ni Bibele leyitsongo. Vana ni vuxiyaxiya naswona u kombisa leswaku wa va tsakela vanhu lava nga ekusuhi na wena. Ku ehleketa ka ha ri emahlweni hi nkarhi lowu nga ha ku pfulekaka siku rero, swi nga ku pfuna leswaku u lunghekela ku chumayela hi xitshuketa.—Filp. 1:12-14; 1 Pet. 3:15.
5. Ha yini hi fanele hi tshama hi swi lunghekerile ku chumayela hi xitshuketa?
5 Hi ni swivangelo swimbirhi leswi endlaka leswaku hi chumayela hi xitshuketa—ku rhandza Xikwembu ni ku rhandza vaakelani. (Mat. 22:37-39) Leswi ntirho wo chumayela wu nga wa xihatla, hi fanele hi tshama hi swi lunghekerile ku chumayela hi xitshuketa. Onge minkarhi hinkwayo hi nga tshama hi swi lunghekerile ku tirhisa nkarhi wun’wana ni wun’wana leswaku hi byela vanhu hi mahungu lamanene ya Mfumo nkarhi wa ha ri kona.