Dzunisa Yehovha Hi Ku Chumayela Hi Xitshuketa

¹ Malandza ya Yehovha yo tshembeka ma lava tindlela leti ma nga n’wi dzunisaka ha tona siku ni siku. (Ps. 96:2, 3; Hev. 13:15) Ndlela yin’wana leyi hi nga n’wi dzunisaka ha yona i ku chumayela hi xitshuketa. Vagandzeri vo tala va Yehovha namuntlha va nkhensa swinene hikwalaho ka leswi ku veke ni munhu la va byeleke rungula ra Mfumo hi ku va chumayela hi xitshuketa.

² Hakanyingi ku chumayela munhu wo karhi hi xitshuketa, swi pfulela ni van’wana ndlela yo twa rungula ra Mfumo. Hi xikombiso, bulo ra Yesu ni wansati wa Musamariya exihlobyeni xa Yakobe, ri endle leswaku vo tala va twa mahungu lamanene. (Yoh. 4:6-30, 39-42) Loko Pawulo na Silasi va ri ekhotsweni eFilipiya, va chumayele murindzi wa khotso naswona ndyangu wa yena hinkwawo wu amukele ntiyiso.—Mint. 16:25-34.

³ Minkarhi Leyi Hi Nga Yi Tirhisaka: Hi yihi minkarhi leyi hi nga chumayelaka hi xitshuketa ha yona? Van’wana va chumayela hi xitshuketa loko va ye eku xaveni, va famba hi swo famba swa mani na mani kumbe va ha rindzele ku voniwa hi dokodela. Van’wana va chumayela hi minkarhi yo wisa entirhweni kumbe exikolweni. Ku veka yin’wana ya tibuku ta hina ta Bibele erivaleni swi nga ha endla leswaku van’wana va lava ku tiva hi tidyondzo ta hina.—1 Pet. 3:15.

⁴ Ndlela Yo Sungula Bulo: Xinhwanyetana xa malembe ya nkombo lexi nga ni tingana, loko xi ri eminhlanganweni xi twe leswaku i swa nkoka ku va hinkwerhu hi chumayela. Kutani loko xi ya exitolo ni mana wa xona, xi hoxe tibroxara timbirhi ebegeni ya xona. Loko mana wa xona a ha ri eku hakeleni, xinhwanyetana xi fambisele wansati un’wana broxara, naswona u yi amukele hi mandla mambirhi. Loko xi vutisiwa leswaku xi xi kume kwihi xivindzi xo vulavula ni wansati yoloye, xinhwanyetana lexi xa tingana xi te: “Ndzi lo kanya mbilu, kutani ndzi ya!”

⁵ Leswaku hi kota ku chumayela hi xitshuketa, hi fanele hi va ni moya lowu fanaka ni wa xinhwanyetana xolexo. I yini lexi nga hi pfunaka? I ku khongelela xivindzi xo vulavula. (1 Tes. 2:2) Lunghiselela xivutiso kumbe marito yo karhi lama tsakisaka, lawa u nga ta sungula bulo ha wona. Loko u endle tano, vana ni ntshembo wa leswaku Yehovha u ta katekisa matshalatshala ya wena.—Luka 12:11, 12.

⁶ Ku chumayela hi xitshuketa eka vanhu lava hi hlanganaka na vona siku ni siku, swi yisa ku dzuneka eka Yehovha naswona swi hi tisela ntsako. Swi nga ha pfuna un’wana leswaku a vona ndlela leyi yaka evuton’wini lebyi nga heriki.