Hisekela Ku “Nyikela Vumbhoni Bya Rixaladza”
1, 2. I yini lexi ku tsakisaka malunghana ni ndlela leyi Pawulo a a wu teka ha yona ntirho wo chumayela mahungu lamanene, naswona hi nga xi tekelela njhani xikombiso xa yena xo “nyikela vumbhoni bya rixaladza”?
1 Ku fana na Yesu ni malandza man’wana yo tala yo tshembeka ya le minkarhini ya khale, Pawulo a a ri muchumayeri la hisekaka wa mahungu lamanene, a a “nyikela vumbhoni bya rixaladza” ku nga khathariseki swiyimo leswi a nga eka swona. Hambileswi a yirisiwile ku huma endlwini ya yena, a a va “amukela hi musa hinkwavo lava a va ta eka yena, a chumayela hi mfumo wa Xikwembu eka vona ni ku dyondzisa swilo leswi khumbaka Hosi Yesu Kreste hi ntshunxeko lowukulu wo vulavula.”—Mint. 28:16-31.
2 Na hina hi nga hiseka nkarhi hinkwawo loko hi “nyikela vumbhoni bya rixaladza.” Sweswo swi katsa ku chumayela vanhu lava hi hlanganaka na vona loko hi ya ni loko hi vuya eNtsombanweni wa Muganga lowu nge “Vangamisa Xikwembu” ni loko hi ri edorobeni leri ntsombano wu khomeriwaka eka rona.—Mint. 28:23; Ps. 145:10-13.
3. Hi nga endla njhani leswaku ku nyikela ka hina vumbhoni hi xitshuketa ku nga vi nchumu lowu nga lunghiseleriwangiki?
3 Xana Ku Chumayela Hi Xitshuketa Swi Vula Yini? Ku chumayela hi xitshuketa a hi nchumu lowu ngo tiendlekela wu nga languteriwanga kumbe wu nga kunguhatiwanga, onge hi loko wu nga ri wa nkoka. Nhlamuselo leyi a yi fambisani ni ntirho wa hina. Hilaha Pawulo a endleke ha kona, ku dzunisa Xikwembu hi ku nyikela vumbhoni i swa nkoka eka hina, naswona hi fanele hi lunghekela ku chumayela kun’wana ni kun’wana laha swi faneleke kona, loko hi ya entsombanweni. Hambiswiritano, ndlela leyi hi yi tirhisaka loko hi vulavula ni van’wana, yi vuriwa ku chumayela hi xitshuketa—hikuva vanhu lava hi vulavulaka na vona va va va nga swi rindzelanga naswona minkarhi yin’wana hi va hi nga ambalanga ku fana ni loko hi ya ensin’wini. Endlelo leri ri nga humesa mihandzu leyinene.
4. I yini lexi pfuneke Pawulo leswaku a kota ku chumayela a ri endlwini ya yena?
4 Lunghiselela Ku Nyikela Vumbhoni: Pawulo u lave minkarhi yo chumayela loko a ha yirisiwile ku huma endlwini ya yena eRhoma. U rhambe varhangeri va Vayuda va ndhawu yoleyo leswaku va ta ekaya ra yena. (Mint. 28:17) Hambileswi a ku ri ni vandlha ra Vukreste eRhoma, Pawulo u xiye leswaku Vayuda va ndhawu ya kwalaho a va nga si tshama va twa rungula ra Vukreste hi ku kongoma. (Mint. 28:22; Rhom. 1:7) A nga tshikanga ku “nyikela vumbhoni bya rixaladza” malunghana na Yesu Kreste ni Mfumo wa Xikwembu.
5, 6. Hi yihi minkarhi leyi yi nga hi pfulekelaka leswaku hi nyikela vumbhoni hi xitshuketa, naswona hi wahi malunghiselelo lawa hi nga ma endlaka leswaku hi byi nyikela hi ndlela leyi humelelaka?
5 Anakanya hi vanhu lava u nga ha hlanganaka na vona loko u ri karhi u famba, lava va nga ti tiviki kahle Timbhoni ta Yehovha. Swi nga ha endleka va nga swi tivi ni leswaku hi fambisa tidyondzo ta le kaya ta Bibele mahala. Xalamukela minkarhi yo chumayela lava u hlanganaka na vona loko u famba, laha u yimaka kona u wisa, loko u chela petirolo, u ri eku xaveni eswitolo, u ri etihoteleni, loko u ri eku dyeni exitolo xo xavisa swakudya, loko u tirhisa xo famba xa mani na mani ni swin’wana. Kunguhata ka ha ri ni nkarhi leswi u nga ta swi vula leswaku u sungula bulo ni ku nyikela vumbhoni hi ku komisa. Kumbexana u nga titoloveta ka ha ri emahlweni hi ku chumayela hi xitshuketa eka vaakelani va wena, maxaka, lava u tirhaka na vona ni van’wana lava u va toloveleke.
6 U fanele u va ni minkandziyiso yo hlaya leyi u nga ta yi tirhisa loko u nyikela vumbhoni hi xitshuketa. Hi yihi minkandziyiso ya kona? U nga ha tirhisa xiphephana lexi nge Xana U Lava Ku Tiva Swo Tala Hi Bibele? Kandziyisa tindzimana to sungula ta ntlhanu, laha ku hlamuseriwaka swivangelo swo hambana-hambana swo hlaya Bibele. N’wi kombe xibokisana lexi nga endzhaku ka xiphephana lexi, lexi loko a lava ku kombela dyondzo ya le kaya ya Bibele ya mahala a nga xi tataka. Loko u kuma munhu la tsakelaka, n’wi nyike broxara leyi nge Leswi Xi Swi Languteleke. Leswaku u lunghekela vanhu lava va nga ha vulavulaka ririmi rimbe, famba ni xibukwana lexi nge Good News for All Nations. Eka tluka 2 ku hlamuseriwa ndlela leyi u nga xi tirhisaka ha yona leswaku u nyikela vumbhoni. Loko u famba hi movha, u nga swi kota ku teka minkandziyiso yin’wana yo hlaya leyi u nga ta yi fambisela vanhu lava ri tsakelaka swinene rungula ra Mfumo.
7, 8. Hi swihi swilo leswi hi faneleke hi swi tsundzuka malunghana ni ku languteka ka hina ni ndlela leyi hi tikhomaka ha yona loko hi ri endleleni ni loko hi tiwiserile endzhaku ka nongonoko wa siku?
7 Xiya Ndlela Leyi U Langutekaka Ha Yona Ni Leyi U Tikhomaka Ha Yona: Hi fanele hi tiyiseka leswaku swiendlo swa hina ku katsa ni ndlela leyi hi ambalaka ha yona swin’we ni ku tisasekisa ka hina a swi nge endli leswaku vanhu va va ni vonelo leri hoxeke kumbe swi va endla leswaku va ‘sandza’ nhlengeletano ya Yehovha. (Mint. 28:22) Leswi a swi tirhi ntsena loko hi ri eminhlanganweni, etinhlengeletanweni ni le mintsombanweni kambe ni loko hi famba ni loko hi tiwiserile endzhaku ka nongonoko wa siku. Xihondzo xo Rindza xa August 1, 2002, tluka 18, ndzimana 14, xa tsundzuxa: “Ku languteka ka hina a ku fanelanga ku koka ngopfu mahlo, ku chavisa naswona swiambalo swa hina a swi fanelanga swi pfuxa nyanyuko wa rimbewu, swi vonikela kumbe swi kombisa leswaku hi hlongorisa fexeni. Ku engetela kwalaho, hi fanele hi ambala hi ndlela leyi kombisaka leswaku hi ‘chava Xikwembu.’ Leyi i mhaka yo anakanyisisa ha yona, a swi tano ke? A hi fanelanga hi ambala kahle ntsena loko hi ya eminhlanganweni ya vandlha [kumbe hi nkarhi wa ntsombano] kambe loko hi ri kun’wana hi ambala hi ndlela leyi humeke endleleni. Minkarhi hinkwayo ku languteka ka hina ku fanele ku va loku xiximekaka, hikuva hi Vakreste siku hinkwaro.”—1 Tim. 2:9, 10.
8 Hi fanele hi ambala hi ndlela leyi xiximekaka. Loko ku languteka ka hina nkarhi hinkwawo ku kombisa leswaku hi vanhu va Xikwembu, a hi nge chavi ku nyikela vumbhoni hi xitshuketa hikwalaho ka leswi ku languteka ka hina ku nga amukelekiki.—1 Pet. 3:15.
9. Hi byihi vuyelo lebyinene lebyi Pawulo a veke na byona loko a nyikela vumbhoni eRhoma?
9 Ku Nyikela Vumbhoni Hi Xitshuketa Swa Vuyerisa: Eka malembe mambirhi lawa eka wona Pawulo a a yirisiwile ku huma endlwini ya yena le Rhoma, u kume vuyelo lebyinene hikwalaho ka matshalatshala ya yena yo chumayela. Luka u vule leswaku “van’wana va sungul[e] ku kholwa swilo leswi vuriwaka.” (Mint. 28:24) Pawulo hi yexe u vulavule hi vuyelo lebyinene lebyi a veke na byona bya ku “nyikela vumbhoni bya rixaladza” loko a tsala a ku: “Timhaka ta mina a ti endlanga swin’wana handle ka leswaku mahungu lamanene ma ya emahlweni, lerova timpecana ta mina ti tiviwa erivaleni hi ku fambisana na Kreste exikarhi ka Varindzi hinkwavo va Mufumi-nkulu ni lavan’wana hinkwavo; naswona vo tala va vamakwerhu eHosini, lava titwaka va tiyiseka hikwalaho ka timpecana ta mina ta khotso, va kombisa xivindzi lexikulu xo vulavula rito ra Xikwembu handle ka ku chava.”—Filp. 1:12-14.
10. Hi byihi vuyelo lebyinene lebyi mpatswa wun’wana wu veke na byona n’wexemu, hi ku nyikela vumbhoni?
10 Lembe leri hundzeke, endzhaku ko heta siku hinkwaro entsombanweni wa muganga, mpatswa wun’wana wu ve ni vuyelo lebyinene loko wu nyikela vumbhoni hi xitshuketa eka mutirhi wa xisati wa le hotela loyi a vutiseke malunghana ni makhadi ya wona ya ntsombano. Wu n’wi hlamusele hi ntsombano swin’we ni ntshembo lowu Bibele yi wu nyikaka vanhu malunghana ni vumundzuku bya vona. Wu n’wi nyike xiphephana lexi nge Xana U Lava Ku Tiva Swo Tala Hi Bibele? kutani wu n’wi hlamusela hi lunghiselelo ra dyondzo ya le kaya ya Bibele ya mahala. Wansati loyi u vule leswaku wa swi tsakela ku endzeriwa, u tsale vito ni adirese yakwe exibokisanini lexi nga endzhaku ka xiphephana naswona a kombela mpatswa leswaku wu endla malunghiselelo ya leswaku a endzeriwa. Hi byihi vuyelo lebyinene lebyi u nga vaka na byona lembe leri hi ku hisekela ku “nyikela vumbhoni bya rixaladza”?
11. Xana hi tihi timfanelo leti hi faneleke hi ti hlakulela leswaku hi kota ku chumayela mahungu lamanene elembeni leri loko hi “nyikela vumbhoni bya rixaladza”?
11 Chumayela Mahungu Lamanene Hi Rixaladza: Anakanya hi ntsako lowu Pawulo a veke na wona loko a twa leswaku Vakreste-kulobye a va tekelela xikombiso xakwe xo hiseka! Onge hinkwerhu hi nga endla hinkwaswo leswi hi nga swi kotaka leswaku hi chumayela mahungu lamanene, hi ku chumayela hi xitshuketa malunghana ni ripfumelo ra hina leri sekeriweke eBibeleni.
[Bokisi leri nga eka tluka 3]
Minkandziyiso Leyi Lavekaka Loko Hi Nyikela Vumbhoni Hi Xitshuketa
■ Xana U Lava Ku Tiva Swo Tala Hi Bibele? (xiphephana)
■ I Yini Leswi Xikwembu Xi Swi Languteleke Eka Hina? (broxara)
■ Good News for All Nations (xibukwana)
■ Minkandziyiso yin’wana leyi hi nga sungulaka tidyondzo ha yona
[Bokisi leri nga eka tluka 4]
U Nga Va Rivali!
Va mani? Hinkwavo lava tsakelaka lava veke kona eXitsundzuxweni xa rifu ra Kreste kumbe eka nkulumo yo hlawuleka. Xana hi va rhambile leswaku va va kona eminhlanganweni eHolweni ya Mfumo? Hakanyingi, vo tala va va vona, loko va khutaziwile, va nga va kona. Loko va ri karhi va tsakela xinakulobye eminhlanganweni swin’we ni nongonoko lowu khutazaka wa swakudya swa moya, va ta tshinela ekusuhi na Yehovha ni nhlengeletano ya yena. Ha yini u nga va rhambi kutani u vona loko va ta humelela? Va nyike vuxokoxoko hinkwabyo lebyi lavekaka, ku katsa ni minkarhi ya minhlangano ni malunghiselelo ya minhlangano leyi n’wana.