Xana U Nga Hlanganyela Eku Nyikeleni Ka Vumbhoni Hi Xitshuketa?

¹ Hanyelo ra hina ra nkarhi na nkarhi ri katsa minkarhi yo karhi ya ku vulavula ni vanhu hi Yehova. Hi veka nkarhi etlhelweni wa ku nyikela vumbhoni hi xitshuketa hi yindlu na yindlu, ku endla maendzo yo vuyela ni ku fambisa tidyondzo ta Bibele. Hambi swi ri tano, ku ni minkarhi yin’wana leyi hi nga vulavulaka ha yona ni vanhu hi ntiyiso. Ku chumayela loku, hi ku vula ku nyikela vumbhoni hi xitshuketa.

² Vahuweleri van’wana va kuma minkarhi yo tala yo hlanganyela eka muxaka lowu wa vutirheli. Anakanya hi tindlela to nyikela vumbhoni eka vaendzi, maxaka, vatirhi-kulorhi, vadyondzi-kulorhi, vanhu lava hi hlanganaka na vona loko hi xava ni lava hi hlanganaka na vona exikarhi ka makaya kumbe tindlu loko hi ri entirhweni wa nsimu. Xana u ta yi tirhisa kahle minkarhi leyi leswaku u nyikela vumbhoni bya xitshuketa?

³ Endla Makungu Ka Ha Ri Ni Nkarhi: Ku lunghiselela ni ku anakanyisisa ka ha ri emahlweni swi ta hi pfuna ku nyikela vumbhoni hi xitshuketa hi ndlela leyi humelelaka. Emhakeni leyi, hi hlomisiwe kahle hi tibuku to tala ta ku hi pfuna ku endla leswi. Ku engetela eka Xihondzo xo Rindza ni Awake!, hi ni swiphephana swo talanyana leswi kandziyisaka tinhloko-mhaka leti pfuxaka mianakanyo leswaku swi pfuxa ku tsakela. Ku ni tibroxara leti tsakisaka vanhu va swisekelo ni vukhongeri byo hambana-hambana. Nakambe hi ni tibuku to nghena exikhwameni leti hlanganisaka tinhloko-mhaka leti tsakisaka sweswinyana. Hi tihi tibuku leti mi titwaka mi tshunxekile ku ti tirhisa? Anakanyisisani hi swona tanihi ndyangu. Kutani mi titoloveta leswi mi nga ta swi vula loko nkarhi lowu faneleke wu fika.

⁴ Loko U Ri Eku Wiseni: Nkarhi lowunene ngopfu wa ku nyikela vumbhoni hi xitshuketa hi loko u ri eku wiseni. Xana u hlela riendzo ra ku famba hi xihaha-mpfhuka, xitimela kumbe bazi? Kutani famba ni Bibele ni yin’wana ya tibuku leti boxiweke laha henhla. Ku hlaya tibuku to tano eka swo famba swa mani na mani hakanyingi swi pfuxa bulo. Loko u famba hi movha, anakanya hi leswi u nga swi vulaka loko u yima exitichini xa petirolo kumbe ekhefini kumbe loko u ri ehoteleni. Hi mikarhi yo tano, u nga tshama ni nhlayo yitsongo ya swiphephana emavokweni leswaku u swi nyika vanhu lava tsakelaka. Loko u ri eribuweni kumbe ephakini yo saseka, kumbexana u nga ha sungula ku nyikela vumbhoni hi ku vutisa un’wana u ku: “Xana a swi nga ta tsakisa loko misava hinkwayo a yi languteka hi ndlela leyi?”

⁵ Eka Maxaka: Hakanyingi maxaka ya hina lama nga pfumeriki ma swi tiva leswaku hi Timbhoni ta Yehova. Va nga ha lava ku tiva hi tidyondzo kumbe mintirho ya hina kambe va kanakana ku vutisa hikuva va nga swi lavi ku ‘chumayeriwa’ kumbe ku katseka eka bulo ro leha. Ha yini u nga vuli swo karhi mayelana ni ntiyiso ivi u nyika xaka ra wena nkarhi wo yisa bulo emahlweni loko ri swi lava? Kumbe u nga ha vula ntsena ndhawu leyi u khomeleke ntsombano lowu hundzeke eka yona, ivi u va komba yin’wana ya tibuku letintshwa leti humesiweke. Maxaka hakanyingi ma va yingisa vana.

⁶ Minkarhi hinkwayo hi fanele hi xalamukela nkarhi lowu hi nga na wona wo nyikela vumbhoni hi xitshuketa. Hambi swi ri tano, tsundzuka nkoka wa ku va ni xinghana ni ku kombisa ku tsakela ka ntiyiso eka munhu un’wana. (Swiv. 15:23; 1 Pet. 3:15) Ndlela leyi ya ku chumayela yi tswala mihandzu, naswona malandza ya Yehova ma fanele ku hlanganyela eka yona. Ku kotisa Yesu, onge rirhandzu ra hina eka vanhu-kulorhi ri nga hi susumetela ku vulavula nkarhi wun’wana ni wun’wana lowu faneleke!—Mat. 5:14-16.